Култура
Од утре на Мостра во Венеција
Од 31 август до 10 септември ќе се одржи 68-то издание на Интернационалниот филмски фестивал во Венеција.
Од 31 август до 10 септември ќе се одржи 68-то издание на Интернационалниот филмски фестивал во Венеција.
Фестивалот ќе започне со проекцијата на политичката драма „Мартовските иди“ во режија на Џорџ Клуни.
За „Златен лав“ на годинашната Мостра ќе се натпреваруваат 23 наслови. Досега се познати 22, додека последниот филм дополнително ќе биде објавен во текот на фестивалот.
Во Венеција ќе отпатуваат голем број филмски ѕвезди, како Кира Најтли, Кејт Винслет, Гвинет Палтроу, Мет Дејмон, Колин Фирт.
Меѓу филмовите во конкуренција за „Златен лав“ е и новата адаптација на романот „Оркански висови“ од Емили Бронте, која ја постави Андреја Арнолд.
Во натпреварувачката програма се и филмовите „Момче, дама, крал, шпион“ на шведскиот режисер Томас Алфредсон, како адаптација на романот на Џон ле Каре со Колин Фирт, Гери Олдман и Џон Харт во главните улоги.
Меѓу најсериозните кандидати за награда се „Карнаж“ на Роман Полански, со Кејт Винслет, Џоди Фостер и Кристоф Валц, потоа „Килер Џо“ на Вилијам Фридкин и „Опасен метод“ на Дејвид Кроненберг.
Актерите Мет Дајмон, Марион Котијар, Кејт Винслет, Џуд Лоу и Гвинет Палтроу се јунаците во филмот „Зараза“ на Стивен Содерберг, додека Ал Пачино се режираше самиот себе како Кралот Херод во филмот „Дивата Саломе“.
Претседател на фестивалското жири е двојниот добитник на „Златен лав“, режисерот Дарен Аронофски./крај/бета/мф/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.