Министерката за енергетика, рударство и минерални суровини, Сања Божиновска, денес оствари работна средба со градоначалникот на Општина Македонска Каменица, Димчо Атанасовски.

Главен фокус на дискусијата беа можностите за имплементација на проекти за енергетска ефикасност, како и потребата од унапредување на енергетската инфраструктура во општината со цел обезбедување енергетска стабилност и одржлив развој на локалните заедници.

Македонска Каменица, како рударски регион со значителен енергетски потенцијал, беше истакната како пример за локален развој кој може да придонесе кон националните енергетски цели.

Општините се клучен партнер во напорите за одржлива енергетска трансформација, потенцираше министерката Божиновска. За исполнување на националните приоритети потребно е преку заеднички проекти и поддршка да ги модернизираме локалните енергетски системи и да создадеме нови можности за развој на рударството во согласност со највисоките еколошки стандарди,

Градоначалникот Атанасовски ја истакна потребата од продолжување на инвестициските активности за подобрување на инфраструктурата во Македонска Каменица за да се обезбеди подобар квалитет на живот за граѓаните и посилен економски развој на регионот, потенцираше Атанасовски.

Министерството за енергетика останува посветено на развојот на локалните заедници преку инклузивен пристап и проекти кои носат долгорочни придобивки за граѓаните.

Државниот инспекторат за земјоделство излезе со соопштение по добивањето на известувањето од системот за брзо известување на ЕУ (RASAFF – Window) од Република Хрватска во врска со пратка на свеж кељ (Brassica oleracea var sabauda), која била идентификувана како небезбедна од страна на хрватската царинска служба при увозот. Првично од Државниот Инспекторат за Земјоделство потенцираа дека во медиумите се појавија соопштенија кои не се точни бидејќи посочуваат на пратки на зелка, а во конкретниов случај станува збор за свеж кељ. Според Хрватскиот извештај, се утврдило присуство на забранета активна материја imidacloprid во производот, којашто од 1.12.2020 во рамки на Регулативата на ЕУ 2020/1643 е забранета за употреба. Извозот е остварен на 9.1.2025 година а пратката која што била заджана на граничниот премин е со вкупно количество од 2700кг.

По добивањето на оваа информација, Државниот инспекторат за земјоделство направи 20 вонредни контроли од страна на внатрешни фитосанитарни инспектори кај регионалниот откупувач и извозник, при што е констатирано дека земјоделскиот производ свеж кељ е откупен од земјоделско стопанство во с.Јосифово, Валандово. Инспекцискиот надзор беше спроведен кај 20 земјоделски стопанства меѓу кои и производителот од кој потекнува свежиот кељ, и се земени мостри за да се утврди дали има присуството на забранената активна материја. По добиениете резултати Државната Фитосанитарната Лабораторија беше констатирано дека нема присуство на ниту една забранета активна материја во земените примероци. Во рамки на акцијата беа изречени решенија за водење на евиденција и глоба во износ од 700 евра, по истиот основ.

Во изминатите денови беа извршени дополнителни проверки и анализи, а директорот на Државниот инспекторат за земјоделство, Васе Анакиев, во рамки на изјавата за медиуми апелираше дека водењето на листа за евиденција на третирање на растенија и растителни производи е задолжително.

„Државниот инспекторат за земјоделство во континуитет ги следи сите аспекти на безбедноста на земјоделските производи што се извозуваат или увезуваат во нашата држава. Нашата основна задача е да обезбедиме гаранција дека производите кои ги испорачуваме на странските пазари, како и оние што ги увезуваме, не содржат забранети или опасни активни материи кои можат да претставуваат ризик за здравјето на луѓето. Во случајот со кељот извезен во Хрватска, по извршените контроли и анализи, можеме да потврдиме дека нема присуство на опасни материи. Но, и понатаму ќе продолжиме со интензивни надзори за да осигуриме безбедност на сите земјоделски производи во нашата држава“,посочи Анакиев.

Иако во Македонија пазарот на пестициди кои содржат imidacloprid е веќе регулиран, и понатаму се изведуваат редовни и вонредни инспекциски надзори. На овој начин, се осигурува дека земјоделците ги следат законските регулативи и дека не се користат забранети хемикалии кои можат да доведат до затруени производи.

За дополнителни информации, граѓаните се упатуваат да ги следат сите нови извештаи и да се консултираат со надлежните органи.

Министерот за социјална политика, демографија и млади, Фатмир Лимани денеска го посети Здружението за акција против насилство и трговија со луѓе – Отворена Порта и децата жртви на трговија со луѓе.

На средбата се разговараше за политиките на Министерството кое е целосно посветено на борбата против трговијата со луѓе, исполнувајќи ги законските барања и пракси во врска со развивање и подобрување на националните политики за превенција, подигање на јавната свест, насочување на интервенциите за заштита на жртвите на трговија со луѓе врз основа на почитувањето на основните човекови права и слободи.

Министерството е координатор на Националниот механизам за упатување на жртви на трговија и оваа обврска ја спроведува во тесна соработка со Министерството за внатрешни работи, Eдиницата за борба против трговија со луѓе, центрите за социјална работа и здруженијата на граѓани кои работат во оваа област.

Од страна на Министерството воспоставен е Центарот за жртви на трговија со луѓе како државно прифатилиште кое има значајна улога и придонесува кон соодветна заштита на жртвите на трговија со луѓе.

Во согласност со Законот за социјалната заштита, Министерството го финансира Центарот за жртви на трговија со луѓе кој има капацитет од 6 легла.

Денеска беше потпишан и нов Управен договор за 2025 година, за обезбедување на социјални услуги за Центар за привремен престој на жртви на трговија со луѓе помеѓу Министерството и Здружение за акција против насилство и трговија со луѓе Отворена Порта.

Во периодот јануари – декември 2024 година, петте мобилни тимови за идентификација на ранливи категории на граѓани вклучително и жртви на трговија со луѓе беа активни во спроведувањето на програмските активности вклучувајќи редовни состаноци, теренски посети, контакти, упатувања и помош на ранливи групи, жртви и потенцијални жртви на трговија со луѓе.

Во 2024 година идентификувани се 40 жртви на трговија со луѓе од кои 2 деца. Најголем дел се жртви на сексуална експлоатација – 37, додека 2 лица жртви на трудова експлоатација и 1 лице е жртва на присилен брак.

Министерот Лимани истакна дека „да се слушне гласот на децата жртви од страна на креаторите на политиките е од круцијално значење.“ Бидејќи тоа придонесува да се откријат слабостите во системот, да се зајакне превенцијата, заштитата и сузбивањето на ова злосторство.

„Секој може да биде цел, но секој исто така може да биде дел од решението. Ако сакаме да создадеме свет без трговија со луѓе, треба да ја подигнеме свеста во нашите заедници. Да едуцираме, да информираме и да ги охрабруваме другите да зборуваат, да ги препознаат опасностите, да знаат каде да се обратат за помош и поддршка. Секоја мала акција може да направи голема разлика,“ порача Лимани .