Економија
ЕК: Продолжување на рецесијата во ЕУ, постапно заздравување идната година

Европската комисија за оваа 2013 година предвидува продолжување на рецесијата во еврозоната со пад на бруто домашниот производ (БДП) од 0,4 отсто, невработеноста би требало да надмине 12 отсто, додека за целата Европска унија се предвидува пад на БДП-то од 0,1 отсто, а раст на невработеноста од 11 отсто.
Европската комисија во петокот ги објави пролетните економски прогнози за периодот 2013 – 2014 година со процени на растот, вработеноста, инфлацијата, буџетскиот дефицит во земјите членки, во земјите кандидати вклучително и Македонија и во големите светски економии, како САД, Јапонија, Кина и Русија.
Што се однесува до состојбата во зоната на единствената европска валута, Европската комисија предвидува заздравување во 2014 година со пораст од 1,2 отсто, а во целата Европската унија растот ќе биде малку поголем, односно 1,4 отсто. Минатата 2012 година падот на БДП-то во еврозоната изнесуваше 0,6 отсто, а во Европската унија – 0.3 проценти.
Германија, најголемата економија во Европа воопшто, во 2013 година ќе стагнира, а следната 2014 година би требало да забележи раст од 1,2 отсто Најголем раст годинава се предвидува во Латвија од 3,8 отсто, во Литванија од 3,1 проценти и во Ирска од 3 отсто.
„Имајќи ја предвид продолжената рецесија, мораме да сториме се` што можеме за да ја надвладееме кризата со невработеноста во Европа. Политиката на Европската унија е насочена на одржлив раст и создавање работни места. Финансиската консолидација продолжува, но со побавен ритам. Истовремено, мора да се интензивираат структурните реформи за да се придвижи растот во Европа”, изјави еврокомесарот за економска и монетарна политика, Оли Рен претставувајќи ги во петокот во Брисел на прес-конференција пролетните прогнози на Европската комисија.
Еврозоната се соочува со послаба внатрешна побарувачка и висока стапка на невработеност, којашто во 2013 година ќе достигне 12,2 проценти, а следната 2014 година незначително ќе се намали на 12,1 отсто. Меѓутоа, според она што го претстави Оли Рен, дел од земјите имаат многу ниска стапка на невработеност, ако што е Австрија од само 4,7 отсто, Германија, со 5,4 проценти, и Луксембург со 5,5 отсто, додека најлоша е ситуацијата во Грција и Шпанија со стапка на невработеноста од по 27 отсто и во Португалија со 18,2 проценти.
Осум земји во еврозоната ќе бидат во рецесија: Кипар со минус 8,7 отсто, Грција со – 4,2, Португалија со – 2,3, Словенија со – 2,0, Шпанија со – 1,5 отсто, Италија со – 1,3, Холандија со – 0,8 и Франција со – 0,1 отсто.
Еврокомесарот Рен изрази очекувања дека економските активности во првиот квартал од 2013 година ќе се стабилизираат, а кон средината на година ќе се направи свртување кон растот, кој следната година би требало да се забрза.
Фискалната консолидација и стабилизацијата на финансиските пазари уште не почнале поситивно да влијаат врз реалната економија. Малите и средните претпријатија во Европа имаат многу различни услови за финансирање, а особено со скапите кредити во послабите економии, што оневозможува подобрување на ситуацијата на пазарот на трудот.
Просечниот јавен долг во еврозоната годинава ќе изнесува 95, отсто, а следната 2014 година 96 проценти. Во Европската унија во целина јавниот долг годинава ќе биде 98,8 отсто, а следната 90,6 отсто, проценува Европската комисија,
Од 27-те земји членки на Европската унија, против 20 од нив во тек е постапка поради претераниот дефицит, бидејќи имаат буџетски дефицит поголем од три процента од БДП, колку што е договореното ограничување во Унијата. Еврокомесарот Оли Рен изјави и дека трите кандидати кои имаат најголеми шанси да биде кон нив прекината постапката се Латвија, Романија и Литванија, коишто би можел да имаат дефицит под три отсто оваа и следната година./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Трипуновски: Уште денеска ќе биде пуштена водата, земјоделците да бидат спокојни

„Утрово добив информација дека имало незадоволство околу почетокот на сеидбената сезона во делот на оризопроизводството. Затоа денеска дојдов тука на работен состанок со оризопроизводителите за да разговараме за наводнувањето, околу почетокот на сеидбата“, истакна министерот за земјоделство, шумарство и водостопанство, Цветан Трипуновски од Чешиново Облешево.
„Заедно со директорот на АД Водостопанство, во чија надлежност е пуштање на водата до оризовите полиња сме помеѓу земјоделците. Утрово директорот на Управата за хидрометеоролошки работи ме извести дека во наредниве денови ќе имаме интензивни врнежи што значи дека хидролошката состојба ќе се подобри“, појасни тој.
Министерот посочи дека заедно со директорот на АД Водостопанство ќе разговараат со земјоделците бидејќи од нивна страна имаше барање високите зони, песокливите површини да бидат ненасеани со ориз, а се останато да биде покриено вода.
„Информацијата што ја разменивме заедно со директорот со земјоделците е дека водата уште денеска ќе биде пуштена за да се запазат оптималните рокови кои согласно науката велат дека треба до 15-ти мај да се заврши сеидбата. Така да во делот на она што значи поплавување со површини на вода очекувам дека нема да има проблем, земјоделците треба да бидат спокојни“, додаде министерот.
Економија
Министерството за енергетика прифати амандмани поднесени од сите пратенички групи за Законот за енергетика

Предлог-законот за енергетика, како едно од најважните законски усогласувања со енергетската легислатива на ЕУ, го помина второто читање пред надлежните собраниски комисии за економски прашања, труд и енергетска политика и законодавно правната комисија. Во фазата на второто читање остана разгледување на текстот на Дополнетиот предлог на закон за енергетика на седница на Собрание, на која следи и постапка на донесување на законот и негово објавување во Службен весник.
„Како предлагачи на законот очекуваме истиот да биде донесен во текот на овој месец, со што во целост ќе се испочитуваат роковите за негово донесување од реформската агенда и обврските кон Европската енергетска заедница каде што сме членка. Станува збор за клучен закон кој отвора нови можности за пазарот и обезбедува фер услови за сите учесници –граѓаните, преку стопанството, до јавните институции. Ова е закон што ја носи Македонија чекор поблиску до европскиот енергетски пазар, но и ја зајакнува нашата внатрешна стабилност и отпорност“, изјави министерката Сања Божиновска.
Во текот на амандманската расправа беа прифатени 61 амандман (поднесени 71 амандман) од пратеници од сите пратенички групи. Крајната цел на Министерството е да се донесе усогласен и применлив закон во интерес на граѓаните и енергетскиот систем.
„Во амандманската расправа беа прифатени повеќе суштински амандмани, а како најзначајни ги издвојуваме амандманите кои се однесуваат на: задолжително воведување на складишта (батерии) за новите електроцентрали од варијабилен обновлив извор на енергија; воведување обврска инвеститорите да докажат дека имаат средства во износ од 100.000 евра на сметка или во основни средства при издавање на лиценца за вршење на енергетските дејности трговија и снабдување со електрична енергија; допрецизирани се одредбите за именување и разрешување на членовите на Регулаторната комисија за енергетика; исклучокот за друштвото кое врши дејност дистрибуција на гас да може да врши и дејности снабдување со гас, снабдување со гас со обврска за јавна услуга и снабдување со гас во краен случај, доколку има приклучени помалку од 100 000 потршувачи; делот за дополнителен приход за операторот на електродистрибутивниот систем кој го продава вишокот на електрична енергија за секоја продажба да има обврска да ја извести Регулаторната комисија за енергетика; во делот на одвоено сметководство додадена е обврска на носителите на лиценци за вршење енергетски дејности во годишната сметка доставена до Централниот регистар одделно по шифра на дејност да го прикажат приходот од секоја енергетска дејност за која поседуваат лиценца; допишани се преодни одредби за постојните одлуки за сертификација за МЕПСО и НОМАГАС како и преодни одредби за вршителите на енергетски дејност кои за прв пат ги воведуваме како енергетски дејности со овој закон за кои е потребно лиценца за вршење на дејноста“, појаснуваат од Министерството.
Главните придобивки од новиот закон, според Министерството, се либерализиран, транспарентен и конкурентен пазар за електрична енергија, што ќе значи поголем избор и пофер цени за потрошувачите, воведување на паметни броила, што овозможува прецизно мерење на реалната потрошувачка на електрична енергија и увид на крајниот потрошувач во својата потрошувачка на електрична енергија на дневна основа; поддршка за нови концепти како граѓански енергетски заедници и модели на активно управување со побарувачката; зголемена пазарна ликвидност и пристап до повеќе извори на снабдување за стопанството и подеднаква можност за инвестиции на сите и инфраструктурна стабилност, преку инвестиции во системи за складирање и дигитализација на системите.
Во рамките на новопредложената енергетска реформа, Министерството за енергетика, рударство и минерални суровини согласно своите надлежности законски го реализира и преносот на сопственичката структура на друштвото оператор на електропреносниот систем МЕПСО, како дел од напорите за подобра контрола, координација и управување со преносната мрежа.
„Стабилен и професионално управуван преносен систем е предуслов за раст на обновливите извори и сигурно снабдување на домаќинствата и индустријата. Со оваа одлука, го јакнеме капацитетот на државата да одговори на предизвиците на енергетската транзиција“, додаде министерката Божиновска.
Економија
Димитриеска-Кочоска се сретна со турскиот министер за трезор и финансии Шимшек: договорено интензивирање на соработката меѓу двете министерства

Интензивна соработка помеѓу двете министерства во областа на даночната политика и борбата со финансискиот криминал е договорена на средбата на министерката за финансии Гордана Димитриеска-Кочоска со турскиот министер за трезор и финансии Мехмет Шимшек, на која присуствуваа и директорите на УЈП Елена Петрова и на Управата за финансиска полиција Слободан Ивановски.
Даночните управи, како што е договорено на состанокот во Министерството за финансии на Турција, ќе работат на директна размена на информации за даночни ризици, заеднички даночни контроли и слични заеднички активности за мониторирање на активностите на поврзани даночни обврзници што може да влијаат врз плаќањето на даноците во двете земји.
Министерката потенцира дека Управата за јавни приходи игра значајна улога во прибирање на приходите во Буџетот и дека се многу значајни сите активности и мерки што се преземаат, а се во насока на зголемување на ефикасноста во прибирањето на даночните приходи, како и примена на меѓународни искуства.
Во таа насока е утврдена и потребата за идна соработка на Управата за финансиска полиција со Одделот за истраги на финансиски криминал преку споделување знаења и искуства за добри пракси. Воедно беше потенцирана и важноста на брза и ефикасна размена на податоци и информации, како и градење на институционалните капацитети преку размена на знаења и искуства.
Двајцата министри разменија мислења во однос на актуелните состојби на глобално ниво и мерките што се преземаат за справување со предизвиците.
Министерката за финансии Гордана Димитриеска-Кочоска во рамки на работната посета на Турција, вчера оствари средба во Министерството за трговија, со министерот Омер Болат, а утре ќе учествува на Евроазискиот економски форум. Во составот на делегацијата којашто ја предводи министерката се државниот секретар во МФ Андриана Матлиоска, Катерина Антовска, шеф на кабинет и посебен советник во МФ, како и директорите на Управата за јавни приходи Елена Петрова, на Царинската управа Бобан Николовски и на Управата за финансиска полиција Слободан Ивановски.