Култура
Подарени предмети од граѓани го збогатуваат Музејот на македонската борба
Со доделување повелби за најголем помагател и најдобар работник во Музејот на македонската борба, во петок се одбележа една година од постоењето на оваа музејска институција во Македонија.
Со повеќе од 70 различни стари оружја и амбиентални предмети Благој Механџиски, помогнал во збогатување на музејските поставки и добивање автентичен амбиент на музејот за времето кое го прикажува.
„Ги повикувам сите кои имаат вакви предмети да ги донесат, да ги подарат на овој музеј, затоа што само така може да се постигне нивната вредност, ако се покажат пред сите, ако сите можат да ги видат“, рече Механџиски по примањето на наградата.
За најдобар музејски работник беше прогласена Ана Вишнова, која помогнала во соработката со повеќе туристички агенции , да се донесат повеќе туристи кои ќе ги видат поставките на музејот.
Во изминатата една година, Музејот на македонската борба го посетиле 60.000 посетители од цела Македонија и 7.000 посетители од повеќе од 50 земји во светот.
„Музејот на македонската борба е своевидна туристичка атракција за сите домашни и странски посетители на нашата земја. Бројни се размислувањата на гостите кои своите импресии од посетата на музејот и богатството на изложените експонати редовно ги впишуваат во книгата за впечатоци“, рече министерката за култура Елизабета Канческа-Милевска.
Таа рече дека над 20.000 ученици го посетиле Музејот и имале можност да се запознаат со нашата богата историја и со сите историски предмети користени во остварувањето на борбата за своја држава.
„Организирањето на вакви посети е единствен начин како младите теоретското знаење го поврзуваат со оригиналните предмети, со претставените фотографии, документи, поставки, восочните фигури , портретите и масовни сцени“, додаде Канческа-Милевска.
Музејот на македонската борба остварува соработка со други македонски институции и музеи, како и со странски музеи, соработка со Универзитетот „Св. Кирил и Методиј“, како и со музичкото училиште „Илија Николовски-Луј“ од Скопје.
Со помош на професорите и учениците, посетители на Музејот имаат можност да ги слушнат најубавите, оригинални мелодии од времето на Дончо Штипјанчето и други, во изведба токму на учениците од „Илија Николовски – Луј“, што ја збогатуваат програмата на музејот.
Исто така, од неодамна беше издаден и каталог на Брајово писмо, со што на лицата со оштетен вид им е овозможено да ги доживеат богатствата на музејот.
Во музејот има сместено 109 восочни фигури, 63 уметнички слики и 17 портрети, 1.064 оригинални експонати, од кои 764 се откупени, а 310 подарени, појасни директорот Бранимир Светозаревиќ.
Тој се заблагодари на сите кои ги отстапиле предметите кои ги поседувале во корист на музејот, особено на овие анонимните, како Македонецот од Канада, кој донесол три примероци од весникот „Ла петит шурнал“, во кој на повеќе страни се илустрирани моменти од Илинденското востание и киднапирањето на Мис Стон./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Првата долгометражна анимација во историјата на Македонија со светска премиера на еден од најголемите фестивали за фантастика во светот
„Јон Вардар против галаксијата” – првиот долгометражен анимиран филм во историјата на Македонија, влезе во соѕвездието на најдобрите фантастични филмски остварувања на светот.
Филмот во режија на Гоце Цветановски и во продукција на Алан Кастиљо од „Линкс студио” ќе ја има својата светска премиера во Шпанија, на 57-мото издание на „Ситџес фантастик филм фестивал” – еден од најстарите и најзначајни жанровски фестивали во светот, којшто могумина го нарекуваат „Кан за фантастични филмови“.
„Јон Вардар против Галаксијата” отвора ново поглавје во историјата на македонската кинематографија, а е селектиран во фамилијарната секција на фестивалот. Ќе има две прикажувања во ударни термини во петок и сабота, на 5 и 11 октомври.
„Бидејќи жанрот не познава возраст, фестивалот во Ситџес повторно ќе ги прикаже моментално најфасцинантните фамилијарни проекти од светот. Меѓу селектираните филмови годинава го откривме ‘Јон Вардар против Галаксијата’ на Гоце Цветановски, првиот анимиран филм во историјата на Северна Македонија“, објавија организаторите на фестивалот.
Режисерот Цветановски изјави дека да се биде избран меѓу најдобрите фантастични филмови наменети за семејната публика на глобално ниво е голема чест.
„Огромен успех е што светската премиера на Јон Вардар ќе се одржи на престижен фестивал од овој калибар, и очекувам да продолжи со уште многу други успешни прикажувања низ целиот свет. Филмот е селектиран на уште еден голем филмски фестивал што ќе се одржи годинава, а деталите ќе бидат споделени наскоро“, објави режисерот Гоце Цветановски.
„Јон Вардар против галаксијата” ќе ве однесе меѓу планетите заедно со еден смотан човек, еден нарцисоиден робот и многу, многу, мнооооогу вонземјани кои ќе бидат на мисија да ја спасат Галаксијата од самите себеси!
Арт директор е Михајло Димитриевски – Тхе Мичо, а директор на анимација е Димитар Ѓоргиев. Продуценти на филмот се Алан Кастиљо, Ева Конрад, Браќа Калинови и Ладо Скорин. Во главните улоги настапуваат Жарко Димовски, Дамјан Цветановски и Емилија Мицевска.
Анимираниот филм е изработен со поддршка од Агенцијата за филм на Северна Македонија, а има копродукции во Унгарија, Бугарија и Хрватска.
Цветановски е дел и од тимот кој го почна проектот „Сказните на Биби“, режирајќи повеќе епизоди.
Тој е режисер и на крими-трилерот „Бизнисот на задоволството” којшто во моментов се прикажува низ кино-салите во Македонија и наидува на одличен прием од страна на публиката и на критиката. Досега со своите филмови, Цветановски ја претставувал Македонија на стотина фестивали низ светот, а „Бизнисот на задоволството” се закити со десет меѓународни награди.
Култура
„100 илјади поети за промена“ 14. пат во Струмица
Во сабота, 28 септември 2024 година, глобалното движење „100 Thousand Poets For Change“, во соработка со здружението „Контекст – Струмица“ го реализира 14 издание на поетската манифестација „100 илјади поети за промена“ со почеток во 19:00 часот во НУ Завод за заштита на спомениците од културата и Музеј – Струмица.
Манифестацијата ќе започне со отворање на изложбата на дигитални цртежи „Сенката на звукот“ на проф. Владимир Мартиновски, а потоа со промовирањето на годинешниот зборник „100 Илјади поети за промена“ ќе се одржи поетско читање на дел од застапените поети.
На конкурсот годинава конкурираа повеќе од 200 учесници.
Манифестацијата е поддржана од градоначалникот Костадин Костадинов и Општина Струмица.
Култура
„Сенката на звукот“ – изложба на дигитални цртежи на Владимир Мартиновски
Здружението за развој на културата и заштита на културното наследство „Контекст-Струмица“ како дел од годинештното 14 издание на 100 Илјади поети за промена, оваа сабота, 28 септември 2024 година во 19:00 часот во НУ Завод за заштита на спомениците на културата и Музеј на град Струмица ќе ја отворат изложбата на дигитални цртежи насловена „Сенката на звукот“ на проф. Владимир Мартиновски.
„Сенката на звукот“ е негова трета изложба на дигитални цртежи од овој циклус, а се состои од 12 цртежи (дигитален принт) кои тематски ја поврзуваат музиката, поезијата и ликовниот израз на Мартиновски. Под влијание на музичките фестивали кои редовно ги посетува, тој најде инспирација неговите емоции, чувства и размисли визуелно да ги изрази преку создавањето на овој циклус дела. Оваа изложба е своевидна презентација во која се вкрстуваат две негови пасии: музиката и сликарството.
Дигиталните цртежи визуелно го слават чинот на музицирање, во обидот на ликовен начин да се доловат различни мелодиски и ритмички структури. Освен со дигитални цртежи тој се има претставено со уште две изложби, на фотографија и цртеж, во моментот има тековна изложба во Шибеник, Србија, а во тек е подготовката на неговата нова изложба на акрилни дела.