Македонија
МОН: Прашањата за екстреното се изведени и изготвени согласно наставните планови, програми и цели
Министерството за образование и наука и Државниот испитен центар информираат дека согласно објавените распореди на интернет страницата prasanjaeksterno.dic.edu.mk, денес во 9:30 часот започна процесот на екстерната проверка на постигањата на знаењата на вкупно 43.613 ученици од четврто одделение во основно образование до трета година во средно образование.
Според информациите од кол центрите, ангажираните тестатори и надбљудувачи, процесот се реализира непречено и согласно акцискиот план и дефинираната динамика, при што, заклучно со 12:00 часот истиот е целосно заокружен во 103 основни и средни училишта. До овој момент нема пријави за технички или проблеми од каква било друга природа.
„Сите прашања коишто се дел од процесот на екстерното тестирање се изведени и изготвени согласно наставните планови, програми и цели. Истите се прилагодени на возраста на учениците и развојните карактеристики на соодветната возраст“, информираат од МОН, негирајќи ги објавите во дел од медиумите дека имало нелогични прашања и дека на некои прашања им се додавала политичка конотација.
Од МОН појаснуваат дека доколку некој забележи извесна грешка од техничка или друга природа во прашањата, да пријави со само еден клик на апликацијата/прозорчето поставено веднаш до секое прашање на интернет страницата prasanjaeksterno.dic.edu.mk.
„Доколку во меѓувреме додека трае тестирањето се констатира извесна потреба од корекција на прашање, информираме дека ниту еден ученик нема да биде оштетен со одземање на бодови при оценувањето, туку напротив, тоа прашање нема да се земе во предвид при формулирањето на конечната оценка од тестот“, се вели во соопштението од МОН.
Екстерната проверка на постигањата на знаењата на вкупно 183.280 ученици и проверка на објективноста на оценувањето на 17.803 наставници по 7.560 предмети, започна на 2.6.2015 година и ќе трае заклучно со 10.6.2015 година. Резултатите ќе бидат објавувани етапно, при што, поради претстојните уписи во задолжителното средно образование, предност ќе имаат деветто одделенците. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Филипче е човекот кој го уништи здравството, ќе биде запишан на најцрните страници“, рече Николоски од Радовиш
На 8 мај треба да имаме масовна референдумска излезност, сите да излезат за убедливо да победиме во изборна единица 4, да не се доведеме во ситуација основни здравствени услуги да не може да добиеме ни во Радовиш ни во Струмица. Да не се доведеме во ситуација да барате пријатели, врски за она што следува, за основна здравствена заштита, треба да се стави точка на таа работа, системот мора да функционира, а имаме луѓе кои може да го средат системот, професионалците да добијат шанса, изјави потпретседателот на ВМРО-ДПМНЕ и носител во изборна единица 4, Александар Николоски на митингот во Радовиш.
Николоски истакна дека како и за многу области има луѓе кои си ја работат професијата и луѓе кои ја злоупотребуваат и наша цел е да ги поканиме професионалците да ни помогнат заеднички да ја реализираме Платформа 1198 за заеднички да ги поправаме работите.
„Вечерва со нас е мојот пријател докторот професорот Виктор Камнар, би сакал да му се заблагодарам на поддршката, тој е најдобриот ортопед во целиот регион, кој направи прва трансплантација на коска во регионот, кој си ја сака професијата, медицината, врвен професионалец и кој сака да се подобрува здравството. Тоа се професионалци луѓе кои не ги интересираат провизии, мито, туку гледаат да помогнат на пациентите и не ги злоупотребуваат пациентите, не се сликаат со своите пациенти туку им помагаат, не ја злоупотребуваат својата професија и гледаат да не збогатат преку ноќ со крадење, туку да му помогнат на народот. Со вакви луѓе ќе го поправаме здравството“, изјави Николоски.
Тој нагласи дека од друга страна е неговиот против кандидат, човекот кој го уништи здравството, кој ќе остане запишан на најцрните страници на македонското здравство, влече десетици афери позади себе, дали е тоа случајот со приватизација на стерилизацијата, дали е тоа провизијата за вакцини кои не стигнаа, дали е тоа сомнителната набавка на апарати или неговата улога во случајот Онкологија каде што терапија не беше давана на болни од канцер на кои им беше најпотребна.
Николоски се осврна и на проектите за Радовиш и регионот.
„Во Радовиш планираме да се заврши изградбата на експресен пат од Радовиш до Струмица, кој треба да продолжува до Ново село и границата, односно од граница со Бугарија до Штип да има експресен пат кој би се врзувал со автопатот и целиот исток подобро да функционира. Тука е реконструкција и пренамена на оваа стоковна куќа во едукативен и забавен културен центар со содржини од јавни дејности и сум убеден дека градоначалникот ќе го направи на најдобар можен начин. Планираме уредување на речното корито на Радовишка река, уредување на населени места, спортско рекреативен центар и бројни други проекти кои треба да го подобрат животот во Радовиш“, рече Николоски.
Тој истакна дека нема да биде заборавени и земјоделието.
„Тутунот е основен извор на егзистенција и планираме да го донесеме законот за забрана на увоз на тутун за целиот македонски тутун да се откупува по пристојни цени. СДСМ не го гласа затоа што главен увозник е братот на министерот за земјоделие. Потребна е масовна референдумска излезност, секој еден да излезе на гласање, потребна е масовна поддршка, ВМРО-ДПМНЕ е единствената сила која може да ја направи промената“, нагласи Николоски.
Македонија
Сиљановска-Давкова: Не мора да влеземе во ЕУ за да ја градиме економијата, можеме и претходно
Денес во Кавадарци се одржа четвртата трибината од циклусот Македонија повторно горда за претставување на изборната програма на кандидатката за претседател на Република Македонија Гордана Сиљановска Давкова. На трибината зедоа учество Сања Божиновска, Маја Кадиевска Војновиќ и Зоран Ставрески.
Гордана Сиљановска-Давкова потенцираше:
„Еден амбасадор, мој пријател, често ми вели дека секогаш кога ќе појде во Кавадарци гледа нешто ново што го инспирира. Се сеќавам дека порано економската дипломатија на Македонија беше инспирација за сите соседи. За жал, последниве години не е така. Јас постојано мислам дека ако како мала земја, имате културна и спортска дипломатија, многу е важно да имате и економска дипломатија. Како претседателка, во однос на економските прашања, секогаш ќе се залагам, и кога одам надвор, и кога дочекувам званични лица, прво ќе се консултирам со економски тим. Да не говорам за средбите со стопанските комори. Не мора да влеземе во ЕУ за да ја градиме економијата, можеме и претходно. Еден од моите приоритети како претседателка ќе биде заедно со владата да поднесеме барање за итен влез во единствениот европски пазар. На тој начин, македонската економија, македонските компании, македонските институции ќе ги уживаат сите придобивки на Европскиот економски простор. Се разбира дека како претседателка ќе инсистирам и на економска соработка со дијаспората, ама мислам дека предуслов за тоа е владеењето на правото и правната држава.
Една од најважните функции на претседателот е предлагањето на гувернерот на Народната банка. Во тој дел, истакнувам дека еден одговорен претседател треба првично да се консултира со луѓе од економијата и да го избере најдобриот. Само со вистинските луѓе на вистинските места можеме да одиме напред!“
Македонија
Албанската опозиција организира завршен митинг во исто време, на исто место со Европскиот фронт, ова е провокација, рече Адеми
„Со длабоко жалење, Европскиот фронт и штабот на Европскиот фронт ја изразуваат својата загриженост и разочарување поради ненадејната одлука на албанската опозиција да организираат во ист ден, во исто време, на исто место, завршен митинг, за кој штабот на Европскиот фронт претходно доби потврда и дозвола од Секторот за внатрешни работи да ја одржи завршната средба на 6 мај на плоштадот Илирија“, рече Арбр Адеми.
„Оваа ненадејна одлука на албанската опозиција не дека е во спротивност со принципите на взаемно разбирање и соработка за да има слободни и демократски избори, туку претставува и провокација да се наштети на јавната безбедност и мирот, затоа апелираме до нив да ја преиспитаат својата одлука знаејќи дека Европскиот фронт, кој на 9 април поднесе барање за одржување на оваа завршна средба до Секторот за внатрешни работи, испрати известување до Општина Тетово, до Противпожарната служба и до Брза помош, институции кои треба да се заложат за успехот на еден ваков величествен собир.
Но, тоа што се случи по поднесувањето на нашето барање, дури на 22 април, замислете 10 дена откако СВР Тетово го прифати нашето барање, опозицијата на 22 април се обрати со барање, со кое СВР Тетово како надлежен орган кој дава дозволи за вакви активности, ги известува дека не можат да организираат ваков собир, направиле три обиди да остварат контакт и да избегнат ваква ситуација која би можела да ја ескалира ситуацијата, но претставниците на ВРЕДИ не реагирале, па дури и во писмена форма тие беа поканети да одржат координативен состанок.
Апелираме до албанската опозиција уште еднаш да ја преиспита својата одлука, нека се определат за друг простор или некој друг ден, сите заедно нека придонесат за слободни и демократски избори по европски стандарди кои и ние и тие ќе имаме можност да ги презентираме своите програми пред граѓаните со собир од ваков тип“, изјави Арбр Адеми.