Култура
„Фејтлес“ со верба во Скопје
Позитивната енергија и одличната комуникација со публиката го одбележаа синоќешниот концерт на британскиот денс-состав „Фејтлес“ во Скопје.
Позитивната енергија и одличната комуникација со публиката го одбележаа синоќешниот концерт на британскиот денс-состав „Фејтлес“ во Скопје. Петтата хала на Скопскиот саем беше преполна за динамичните членови на светската денс атракција. Насмеаните лица во салата скокаа и пееја на песните како на сингловите од најновиот студиски проект „Calling all the faithfull“, така и на добро познатите хитови како „Mass destruction“ и „God is a Dj“. „Ние решивме токму тука, во Скопје да ја започнеме нашата нова турнеја,“ рече вокалистот Макси Џез на што фановите му одговорија со неповторлив аплауз. Систер Блис поддржана од другите диви инструменталисти во бендот, со комбинација на современа денс музика и други музички стилови, уште еднаш го потврди квалитетот на „Фејтлес“. Кулминацијата на концертот се случи кога бендот реши да ја отсвири „One“ и целата сала буквално во ист момент скокаше и танцуваше како „едно“. „Фејтлес“ по трет пат во Скопје докажа дека и комерцијалната музика понекогаш знае да биде квалитетна. Во публиката беа забележливи посетители од соседните држави, особено од Србија и Косово. Единствено оние кои ги платија поскапите „ВИП“ карти за концертот, беа сместени во балконот на крајот од халата, и повеќе изгледаа како да се на кино отколку на енергичен концерт, но што е тука е. Останатите фанови го добија она за кое платиле – Забава! За „Фејтлес“ посетата на Скопје претставува почеток на турнејата низ Европа, пред низата изведби на големите летни фестивали како „Глестонбери“, но и најава за објавувањето на шестиот студиски албум на 17 мај. „Фејтлес“ се комерцијално најуспешниот денс-состав во Британија. Нивната дискографија се состои од пет студиски албуми, четири ремикс-изданија, три компилациски остварувања, дваесет синглови и низа други објави. Досега имаат продадено повеќе од 10 милиони копии од својот авторски материјал, а две од тие плочи се искачија на врвот на топ-листите во Обединетото Кралство./крај/ко
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.