Воведување можности за засилување на акционерскиот активизам на малцинските акционери и давање поголеми права на оваа група и пролонгирање на рокот за поднесување на годишните завршни сметки на компаниите се дел од реформата на Законот за трговски друштва најавен во средата од владата.

Со новиот текст на Законот акционер или група на акционери кои имаат најмалку 10% од основната главнина на трговското друштво, врз основа на постоење сомневање за можни нерегуларности во водењето на трговските книги и активностите на трговското друштво, односно дека трговското друштво постапува спротивно законските одредби имаат право да бараат од органот на управување да свика Собрание на трговското друштво на кое ќе се назначи овластен ревизор кој ќе изврши увид, ревизија, проверка, уверување или поврзани услуги во делокругот на активностите на трговското друштво за кои во барањето е изразено сомневање за постоење на можни нерегуларности, информираше владиниот портпарол Александар Ѓорѓиев.

Тој појасни дека доколку, по поднесувањето на барањето на малцинските акционери, Собранието на акционери не се свика во рок од 8 дена, или пак Собранието на акционери се свика, но одбие да номинира овластен ревизор или пак Собранието на акционери во рок од 60 дена од поднесување на барањето не донесе одлука за назначување на овластен ревизор, тогаш малцинските акционери кои поседуваат најмалку 10% од акциите од основната главница на друштвото можат да бараат од надлежен суд да донесе одлука за назначување на овластен ревизор.

Овластениот ревизор треба да исполнува два услови – со трговското друштво или акционерите да нема конфликт на интереси во смисла на Законот за ревизија, како и во последните три години да не давал консултантски услуги на трговското друштво или акционерите.

Трошоците за назначување и надоместок за овластениот ревизор паѓаат на товар на акционерите кои го барале назначувањето. Доколку по завршувањето на увидот, овластениот ревизор утврди дека постојат нерегуларности во водењето на активностите, односно во работењето на друштвото, трошоците за назначување и надоместок за овластениот ревизор паѓаат на товар на трговското друштво.

Втората измена на законот е на барањето на Комората на сметководители за пролонгирање на рокот за поднесување на завршните годишни сметки на микро, малите, средните и големите компании.

Со досегашниот текст на Законот компаниите имаа обврска годишната завршна сметка за претходната (оперативната) година да ја достават до Централниот регистар на Република Македонија до 28 февруари во годината што следи по претходната (оперативната) година. Со новите измени, новиот рок до кој што компаниите ќе може да ја поднесат годишната завршна сметка за претходната (оперативната) година е 15 март во годината што следи по претходната (оперативната) година. Средните и големите компании ќе имаат обврска да ја поднесат својата завршна годишна сметка исклучиво во електронска форма.

Трговците поединци ќе може како и досега годишната завршна сметка да ја доставуваат до 15 март, и во хартиена и во електронска форма. /крај/мф/сн