Култура
„Форум Скопје 2010“ до 28 мај во Мала станица
Од утре до 28 мај во центарот Мала станица ќе се одржува „Форум Скопје 2010“ – платформа за урбанизам, архитектура, социологија и филозофија на градот. Форумот се одржува трета година по ред, а годинашното мото му е „Град на солидарноста“
Неформално настанот почнува вечер со претставување урбанистички трудови на студентите од Американ колеџ – Скопје. Организаторите денеска на прес-конференција најавија неколку дебати во наредните денови на кои ќе учествуваат голем број домашни и странски архитекти, експерти за урбанизам и политичари. Според нив, целта на „Форум Скопје 2010“ е да бидат разменети информации, знаења и искуства.„ Солидарноста е избрана како тема, зашто таа е битна на локално, но уште повеќе на глобално ниво. Треба да се воспостави ново ниво на етички соодноси меѓу различни нации, култури и религии. Солидарноста има голема улога во убавиот свет. Скопје е град на солидарноста“, рече архитектот Сергеј Никољски. Во врска со проектот „Скопје 2014“ со кој главниот град треба да добие нов лик, од „Форум Скопје 2010“ немаат конкретен став зашто, како што одговорија на новинарските прашања, тие како организатори на настанот не изнесуваат субјективни гледишта.„Форум Скопје 2010“ е отворена јавна дебата со учесници од цел свет. Неговото ниво е повисоко од поделеноста на наши и ваши. Целта е да се сублимираат знаењата од страна и да се насочат кон публиката, да се креира критичка маса и знаења за урбанизмот“, рече архитектот Иван Мирковски. Според него, гостите кои изминатите две години учестувале на форумот имале позитивен став кон Скопје и, како што рече, го сметаат за перфектен полигон за изучување на урбанизмот.Официјалното отворање на „Форум Скопје 2010“ е утревечер во Мала станица со предавање на Антонио Петров од универзитетот Харвард. В среда ќе биде одржана политичка вечер и ќе се дискутира за планирањето од европска перспектива, а на дебатата е најавено и учеството на европратеникот Зоран Талер. Наредниот ден ќе биде претставен регионален проект за начинот на создавање и толкување на архитектурата, во партнерство со учесници од Загреб, Белград и Љубљана и во соработка со Европската асоцијација за култура. „Форум Скопје 2010“ ќе заврши в петок со дебата за современите движења во архитектурата. хс/скс/13:53
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.