Култура
Сепак успешно 51-во Охридско лето
Со театарската претстава „Медеја“ во режија на Нада Кокотовиќ, синоќа заврши 51-то издание на Фестивалот Охридско лето.
Со театарската претстава „Медеја“ во режија на Нада Кокотовиќ, синоќа заврши 51-то издание на Фестивалот Охридско лето.За организацијата и атмосферата на фестивалот, за Макфакс проговорија одговорните селектори на музичката и драмската програма, Гордана Јосифова Неделковска и Ѓорѓи Јолевски.„Како креатор на музичката програма, моја задача е да направам, што попрофесионална и квалитетна програма, која му доликува на еден ваков престижен фестивал. Гостуваат светски имиња, а се со цел да се задржи реномето што фестивалот го има. Сметам дека фестивалот беше на високо рамниште, а тоа не е само мој впечаток, заклучокот го донесувам врз основа и на реакциите на стручната критика и врз основа на реакциите на публиката како и на музичарите кои гостуваа“, рече Гордана Јосифова Неделковска, селектор на музичката програма на Охридско лето. Ѓорѓи Јолевски, селектор на драмската програма на Охридско лето истакна дека е задоволен од овогодинешната понуда на драмската програма.„Пред се сум среќен и задоволен, не само со годинашнава програма туку и за целиот петгодишен период откако сум јас селектор на драмската програма. За мене вистинско отсликување на квалитетот, на претставите е големата посетеност и задоволните гледачи. Драго ми е што Нада Кокотовиќ, Дејан Дамјановски, Јозеф Наѓ, влегоа во театарското семејство на Охридско лето заедно со Питер Брук, Слободан Унковски, Александар Морфов, како и голем број квалитетни продукции. Сите тие веднаш по враќањето дома, ми испорачаа благодарници за поканата со желба повторно да дојдат“, истакна Јолевски. Марко Коловски, претседател на друштво на композитори на Македонија, вели дека за разлика од минатата јубилејна година, кога фестивалот имаше исклучително квалитетна програма, годинава, нивото е нешто пониско, што е и разбирливо. „Сепак имаше доволен број квалитетни музичари и ансамбли, без претерано излегување од шемите на Охридско лето. Имаше неколку концерти наменети за пошироката публика, кои навистина го оправдаа очекувањето (Влатко Стефановски и Дуке Бојаџиев). Никогаш во потполност не можат да бидат задоволени апетитите на македонските композитори и изведувачи. Кога јас би бил селектор на музичката програма би барал начин како и со што македонските композитори да бидат застапени или вклучени на Охридско лето“, истакна тој.Наш впечаток е дека годинашното издание на Охридско лето сепак не беше на минатогодишното рамниште иако за волја на вистината имаше вистински проблесоци, како во музичката така и во драмската програма. Ќе се памети свеченото отворање со продукцијата „Ла фура дел Баус“ од Шпанија и Македонската филхармонија, концертот на пијанистот Александар Гиндин од Русија, како и пијанистот Алексеј Володин исто така од Русија. Исклучително атрактивен беше завршниот концерт на братот и сестрата Димчевски (виолина и пијано), со што се заокружи музичкиот дел на фестивалот. крај/вгCopyright 2011 makfax. Сите права се задржани. Текстов не смее да се печати или емитува, во целина или во делови, без договор со makfax.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Музеите се огледало на минатото и на нашето културно наследство, порача министерката Костадиновска Стојчевска
Министерката за култура Бисера Костадиновска Стојчевска на сите музејски работници им го честита Меѓународниот ден на музеите – 18 Maj за кои вели дека се огледало на минатото и на нашето културно наследство.
„На 18 Mај, Меѓународниот ден на музеите ја нагласуваме нивната заштитничка улога на историјата, културата и македонскиот идентитет. Музеите се инспирација за креативност, истражување и критика, уникатни локации за интерпретација на уметноста, археологијата и науката. Со честитката до сите музејски работници ја нагласувам нивната посветеност во заштита на дејноста и придонесот за едукација на младите генерации во справувањето со комплексните општествени предизвици“, се вели во честитката.
Министерката за култура посочува дека денеска ја подигаме свеста и го насочуваме вниманието кон важноста на музејските институции со отворање на нивните врати за граѓаните.
Таа потенцира дека Министерството за култура поддржува голем број проекти на музеите во остварување на заедничката цел за достојно почитување и вреднување на културата и културното наследство.
„Музеи за едукација и истражување“ е мотото под кое денеска се одбележува Меѓународниот ден на музеите – 18 Мај, датум кој музејските институции низ светот со разновидни активности го одбележуваат од 1977 година.
На овој ден, музеите во земјава традиционално ги отворат своите врати и овозможуваат бесплатен влез за посетителите кои можат да ги видат актуелните изложби и да се запознаат со движното културно богатство.
Меѓународниот ден на музеите традиционално се одбележува секоја година на 18 мај со цел промоција на значењето на музејските институции во современото општество.
Култура
Лозано, Пајак, Сашко Коцев… денес во Градски парк како дел од кампањата „Крени глас против врсничко насилство“
Во рамки на кампањата на „Макпетрол“ за спречување на врсничкото насилство, во Градски парк денеска ќе се одржи отворен настан наменет за деца, млади, родители, баби, дедовци…
Диџеј Боно, Сашко Коцев, „Биби и Боби“, Лозано, Пајак, Весна Петрушевска со децата од нејзината актерска школа, како и други гости, ќе бидат дел од програмата на оваа забавна дружба што е дел од кампањата „Крени глас против врсничко насилство“, а за најмладите ќе има интерактивни содржини и популарни игри.
Марија Јосифовска-Спасовска, член на Управниот одбор и директор во „Макпетрол“, вели дека се пресреќни што во текот на нивната општествено одговорна активност добиле многу поддржувачи.
Почнувајќи од децата и младите, од кои добивме впечаток дека им е навистина мило што, конечно, така отворено и толку гласно, се зборува за проблем со којшто тие секојдневно се соочуваат. Секако, тука се и општините, кои ја препознаа вредноста на нашата идеја и активно се вклучија во обезбедувањето услови за учениците да се здобијат со знаења за булингот. Наставниците, стручните служби, како и родителите, исто така, застанаа зад кампањата и помогнаа фокусот на јавноста да се сврти кон врсничкото насилство. За да се реши проблемот со булингот потребна е уште работа и посветеност, но веруваме дека и со позитивната енергија од нашиот настан, ќе придонесеме да се придвижиме во вистинска насока, истакнува Јосифовска-Спасовска.
Како што информира организаторот, на кампањата „Крени глас против врсничко насилство“ досега се приклучиле 24 општини и за сите нив „Макпетрол“ обезбеди едукативни материјали и работилници предводени од психолог со долгогодишно искуство за проблемот со булингот.
Култура
Утре, бесплатен влез во музеите
„Музеи за едукација и истражување“ е мотото со кое утре ќе се одбележи Меѓународниот ден на музеите, 18 Мај, датум кој музејските институции во светот со разновидни активности го одбележуваат од 1977 година.
На овој ден музеите во земјата традиционално ги отворат своите врати и овозможуваат бесплатен влез за посетителите, кои може да ги видат актуелните изложби и да се запознаат со движното културно богатство.
Музеите, освен својот придонес како платформа за размена на идеи и знаења, имаат значајна улога во образованието и се афирматори на темите што денес силно го засегаат светот, а кои чекаат да бидат истражени и споделени.
Музејските институции ги поттикнуваат идните генерации на креативен, динамичен и интересен начин да се осврнат на комплексните општествени предизвици на денешницата, да се информираат за причините и последиците од човековото влијание врз природата и да развијат критичко размислување и лична одговорност неопходна за градење одржливо општество.
Меѓународниот ден на музеите традиционално се одбележува секоја година на 18 мај со цел промоција на значењето на музејските институции во современото општество. Денот посветен на музеите е урврден од Меѓународниот совет на музеите – ИКОМ, со седиште во Париз.