Македонија
Нема да се вработуваат Македонци на бродовите оти изнудувале пари од компаниите
Најголемите компании кои ангажираа работници од регионот за работа на брод нема веќе да ангажираат работници од Македонија, Србија и Босна и Херцеговина, бидејќи често лажеле дека се повредиле на брод и изнудувале пари од компаниите во договор со лекари и адвокати.
Од агенцијата која врши посредување за работа на брод во Македонија „Коузон“ за Фактор.мк велат оваа одлука се однесува за 14 држави, меѓу кои е и Македонија, а истото не важи за Црна Гора, Хрватска и Словенија.„Причината за оваа неочекувана одлука на најголемата компанија Royal Caribbean, која ангажира работници за работа на брод од регионот, се симулираните лекарски проблеми од страна на лицата кои заминуваат да работат. Ова е смислен и организиран атак врз компанијата која на овој начин губи многу пари и е принудена да го прекине договорот. Заминуваш на работа, работиш одредено време, симулираш лекарски проблем, се пожалуваш и бараш отштета од компанијата, ова е сценариото кое го симулираат одредени лица и истото ги натера надлежните од компанијата во одреден период ја запрат побарувачката за работен труд од нашата земја и регионот“, велат од Коузон.За овој случај пишуваат и српските медиуми.„Србите кои се мрзливи и не сакаат да работат туку да дојдат до леб без мотика, се досетиле да ги тужат компаните за лажни повреди на работното место, исчашен рбет, ишијас, спондилоза. Да биде уште полошо, агенти од адвокатски канцеларии врбуваат такви луѓе за да ги тужат компаниите, да земат пари, а адвокатите да земат дебела провизија и од тоа да направат добар бизнис“, изјавил за „Блиц“, жител на Белград на кого по добивањето на датум за почеток на работа на брод, компанијата Royal Caribbean му јавила дека сепак нема да почне со работа поради промени на потребите на компанијата.Компаниите оваа политика ја оправдуваат со „насочување кон западот“, односно вработување на луѓе од Швајцарија, Норвешка, но и Кина. Сепак компаниите кои се посредници меѓу бродските компании и кандидатите за работа, тврдат дека компаниите ја затвораат вратата за цели нации поради изнудување на пари со лажни повреди во договор со лекари и адвокати. „Каков народ сме? Наместо да работат, тие се фолираат. Поради два отсто луѓе кои лажат наместо да работат, ќе пати цела нација. Тоа трае веќе некое време, „Сelebrity“ не прима работници од овој регион веќе година дена, а по тој пат тргнаа и другите компании. Постои можност на Србите да им биде забранета работа на сите бродови. Во некои од компаниите сега примаат само девојки. Поради нив, ќе платат сите, нив им е гајле, се забавуваат по Америка, па се враќаат и земаат пари“, вели за „Блиц“, правниот застапник на компанијата “Safe Cruise”.Лажирањето на повредите воопшто не е лесно, бидејќи компаниите ги проверуваат своите вработени. „Повредените“ користат лажни дијагнози, а со лекарите ја делат исплатата, односно отштетата по пола.„Го поминав интервјуто, тренинзите, сите лекарски проверки. Кога го добив датумот за одење на брод, дадов отказ, извадив виза, ја оставив девојката која ја сакам, која сакаше да се омажи за мене. А потоа ми стигна мејл во кој ми соопштуваат дека сепак не можат да ми понудат работа поради промени на стратегијата на компанијата“, раскажува белграѓанецот кој требало да замине на брод.Конкурсот, вадењето на документи и подготовката за на брод, кандидатите ги чини и по 1.000 евра.Компаниите кои засега го запреле вработувањето на Срби на бродовите се „Royal Caribbean” i “Celebirty”, додека “Carnival” моментално вработува само девојки. „Не е точно дека само Србите прават проблеми, туку прсти замешала изгледа и политиката. Не знам што им фали на нашите земји, но речено ни е дека поради насочување на компаниите кон запад, мажите од Србија не се добредојдени“, вели вработен во агенцијата “Sea agency”, агенција која ги поврзувала кандидатите со компанијата “Royal Caribbean”.Според „Фактор“, од Македонија оваа година на брод требало да заминат 30-40 лица, но поради оваа одлука истите сега ќе останат дома, додека оние кои веќе се таму и работат си остануваат и за нив оваа одлука не се однесува./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Kовачки: Kај активисти на ДУИ пронајдено оружје, пари и списоци за гласање, приведени се
Лудилото со поткуп од страна на ДУИ и СДС не’ застанува. Штотуку ме информираа дека кај активисти на ДУИ било пронајдено оружје, биле пронајдени пари и биле пронајдени списоци за гласање. Истите биле приведени, тврди Драган Ковачки, член на Извршниот комитет на ВМРО-ДПМНЕ и носител на ИЕ 3.
„Немојте да се плашите, ДУИ не смее да извади пратеник во тројка. Ве повикувам сите масовно да излеземе на гласање. А, за активистите на ДУИ им упатувам порака – на 9-ти мај ќе одговарате, за ова се лежи затвор. Ќе лежите сите од прв до последен. Нема да ве спаси Али Ахмети. Нема да ве спаси ниеден што ве пратил таму да правите поткуп. Бидете сериозни. Го кршите демократскиот процес“, порачува Ковачки.
Македонија
Костадиновска-Стојчевска: На дело покажавме како се грижиме за македонската култура и културното наследство, така и ќе продолжиме во следните 4 години
Коносителката на листата на СДСМ во петтата изборна единица, Бисера Костадиновска-Стојчевска во пораката до граѓаните да гласаат за европска и просперитетна држава ја нагласи заложбата на Социјалдемократскиот сојуз за заштита и афирмација на културата и македонскиот културен идентитет.
„Вложуваме во зачувувањето на културниот идентитет и националните интереси. СДСМ го потврди тоа изминативе години и со истиот дух и заложба ќе продолжи во следните 4 години. Инвестирањето во културата е инвестиција во нашиот идентитет и историја. Создадовме слободна и европска култура. Изработивме нов Закон за употреба на македонскиот јазик. Направивме вистински потфат во унапредувањето на јазикот и зајакнување на македонскиот идентитет. Го заштитивме и го афирмираме македонскиот јазик, денес е признат и во Обединетите нации и во Европската Унија. Тој е потврден во сите стратешки документи и никој нема право да преговара за македонскиот јазик и идентитет“, ја потврди Костадиновска-Стојчевска, заложбата на СДСМ за постојана промоција на културата, идентитетот и историјата.
Таа ги истакна политиките на СДСМ за почитување и вреднување на трудот на културните работници и најави дека платите ќе се зголемуваат и во новиот мандат.
„Го почитуваме и го вреднуваме трудот на културните работници, после рекордните 52 отсто зголемени плати во овој мандат, во следниот платите секоја година ќе растат за 10 проценти“- уверува Костадиновска-Стојчевска и ги наброја приоритетите за следниот мандат: Продолжуваме со рамномерен културен развој и достапност до културното наследство, нови 50 милиони капитални инвестиции за локалните заедници. Зголемување на средствата од националниот буџет наменети за културата Унапредување на услугите од областа на културата, нов Закон за култура, Закон за финансирање во културата, Закон за манифестации и фестивали, Закон за дигитализација во културата.
Таа додаде дека грижата за заштитата на културното наследство ќе продолжи, како и спроведувањето на препораките и целосно почитување на стандардите на УНЕСКО.
Министерката за култура Костадиновска-Стојчевска најави дека за прв пат СДСМ воведува културна дипломатија преку која ќе ја претставиме македонската култура пред светот, како и дека ќе продолжи поддршката за локалните самоуправи за инвестирање во културата.
Во таа насока изјави дека предвидени се капитални инвестиции за реконструкција и реновирање на поголем број објекти од културата, а веќе овој месец дека се започнува со реконструкција на кино Партизан.
„На дело покажавме како се грижиме за македонската култура и македонското културно наследство. Така ќе продолжиме и во следните 4 години. Со СДСМ нема откажување од македонската култура. Со СДСМ македонската култура, јазик и историја се признати и европски“ – ги повика граѓаните, коносителката на СДСМ во петтата изборна единица, да се одлучат за европска иднина и европска култура.
Македонија
Од полноќ почнува изборниот молк
На полноќ почнува изборниот молк пред парламентарните и вториот круг од претседателските избори, кои ќе се одржат в среда.
Изборниот молк ќе трае до среда до 19 часот, односно до затворањето на избирачките места.
Се гласа на 3.480 избирачки места.
Утре (7 мај) гласаат иселениците, болните и изнемоштените, затворениците, лицата во старските домови и две раселени лица.
Според Државната изборна комисија (ДИК), за претседателските избори биле пријавени 1.814.317 гласачи, а за парламентарните избори вкупно 1.815.350 гласачи.
За време на молкот, медиумите продолжуваат да известуваат за изборниот процес, но престануваат сите облици на изборно медиумско претставување на учесниците во изборната кампања, информираат од Агенцијата за аудио и аудиовизуелни медиумски услуги.
„Според Изборниот законик, за прекршување на изборниот молк се смета емитувањето какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија кампања и можат да влијаат врз одлуката на избирачите, податоци со кои се открива идентитетот на политички субјекти и/или поединци вклучени во инциденти или неправилности на денот на гласањето; како и изјави од кандидати во изборниот процес, од претставници на политички партии и од носители на функции во органите на власта“, се појаснува во соопштението од Агенцијата за аудио и аудиовозуелни медиумски услуги.