Овој исклучителен датум е симбол на почетокот на организираното македонско револуционерно движење и воскреснатата идеја за слобода и остварување на основните човекови права во Македонија, се истакнува во честитката што по повод големиот државен празник, 23-ти Октомври – Денот на Македонската револуционерна борба, до македонските граѓани и македонската дијаспора низ светот ја упати премиерот Никола Груевски.
 

„Овој државен празник преставува сеопфатен паметник за македонското револуционерно дело во кое подеднакво учествувале, го поддржувале и помагале луѓе од различни припадности, сите кои биле обесправени, кои посакувале достоинство и слобода. Организираното револуционерно движење бил нивниот одговор на состојбите кои им биле наметнати и времињата во кои живееле и како такво во секоја смисла е поврзанo со нашата земја – Македонија“, порачува во честитката премиерот Груевски.

Целта, којашто тие ја постигнале и темелот, се наведува натаму во празничната порака на Груевски, кој го поставиле биле сосема доволни за генерациите по нив да го преземат аманетот и да продолжат да се борат за слобода, за подобар живот, за подобра иднина на Македонија.

„Таквиот аманет го носиме и ние денес, нашата борба е економски развој, воспоставување на систем на вредности и принципи кои се во функција на развојот. Она што ќе го изградиме денес, тоа ќе го оставиме во наследство да го надоградуваат и развиваат нашите деца, нашите внуци и сите идни потомци“, се додава.

Груевски истакнува и дека за постигнување на споменатите цели потребно е единство и сплотеност околу важните и суштински прашања за напредокот на државата, потребно е меѓусебно почитување и разбирање, градење на доверба која ќе се темели на добрите дела кои меѓусебно ќе не зближуваат. Според македонскиот премиер, таквите подвизи се можни и потребни, а за тоа „говорат и многубројните дела и искуства на македонско револуционерно движење каде се покажало дека со единство и сплотеност заеднички можеме да постигнеме многу повеќе за сите нас“./крај/мф/сн

Извор: Макфакс