Култура
Реномираниот германски автор Инго Шулце во Скопје
Lитературноto документирање на Шулце на настаните од поновата историја на Германија, падот на Берлинскиот ѕид повторното обединување на Германија, придонесе тој да биде еден од најимпресивните литературни сведоци на оваа пресвртница, а со тоа и еден од најпреведуваните автори
Притоа, Инго Шулце не изнесува свои политички ставови за ситуацијата, туку едноставно ги остава своите протагонисти да се соочат со таа проблематика и да се пронајдат себеси. Тој тоа го прави претежно преку дијалози (особено во „Адам и Евелин“), што на делото му дава еден особено живописен и спонтан тек. И покрај раскажувачката „леснотија“, неговите дела поседуваат длабока литературна суштина и отвораат широк спектар на паралелни религиозни, дијалектички и антрополошки теми и мотиви. Културна установа Блесок, во соработка со Гете Институт во Скопје, а со поддршка од Германско-Македонското Друштво и Фондацијата Роберт Бош организира две книжевни средби со Инго Шулце, по повод објавувањето на две од неговите книги на македонски јазик.На 3-ти јуни во 21 часот во Менада (на влезот во Стара чаршија) ќе се одржи промоцијата на романот „Адам и Евелин“ од Инго Шулце, кој деновиве излезе во превод на македонски, и на збирката раскази „Мобилен“, која беше издадена минатата година. Авторот ќе зборува за своите дела, а ќе се читаат одбрани делови од преведените книги. Публиката ќе има и можност книгите да ги купи по промотивна цена, потпишани од авторот. Следниот ден, на 4-ти јуни во 11 часот во Германската читална при НУБ „Климент Охридски“ ќе се одржи средба и разговор со авторот, при што присутните ќе имаат можност да поставуваат прашања. И овде, книгите ќе може да се купат по промотивна цена, со авторски потпис. Двете книги се во издание на Блесок, а преведени од германски од Елизабета Линднер. Издавачот Игор Исаковски и преведувачката ќе бидат присутни и ќе ве водат низ двата настана.Инго Шулце е роден 1962 г. во Дрезден. Студирал класична филологија во Јена. Работел како уредник на списание и како театарски драматург во Алтенбург. Престојувал во Санкт Петербург и Њујорк. Од 1993 г. живее и работи во Берлин. Член е на Академијата на Уметностите Берлин и Германската Академија за Јазик и Поетика. Почнувајќи од 1995 г. досега има објавено десетици романи и прозни дела период во кој многупати е наградуван со германски и меѓународни книжевни признанија и награди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.