За сите проблеми во владејачката коалиција ДУИ – ВМРО-ДПМНЕ постојано се дискутира и се наоѓаат решенаија, а нема табу теми, вели министерот за локална самоуправа Лирим Шабани, во неделното интервју за Радио Слободна Европа.

Прашан како функционира коалицијата ВМРО-ДПМНЕ и ДУИ со оглед на актуелната политичка ситуација, тој вели: „Во политичка смисла на вашето прашање, јас можам да одговорам дека и во едно тесно семејство понекогаш се појавуваат недоразбирања меѓу самите членови на едно семејство, така и ние понекогаш имаме случаи во коишто треба да се убедуваме, ни треба дебата, имаме несогласувања, нецелосно се согласуваме со некои одредби, меѓутоа важно е, што би истакнал, важно е дека ние сме отворени за дијалог, дебатираме цело време и честопати низ дијалог изнаоѓаме решение на сите проблеми, така што нема табу теми коишто не ги отвораме и не ги дискутираме заедно“.

На прашањето дали ДУИ е задоволна од тоа како се трошат парите наменети за локалната самоуправа, тој вели дека од 2011 година, имаат заедничка програма.

„После коалицирањето, после започнувањето на работа на владата, ние одиме на спроведување на таа владина програма, секако и буџетите согласно на оваа програма и проектите што се внатре се реализираат како што оди тајмингот. Инвестициите, дали сме ние задоволни од тоа како се трошат парите, има еден куп проекти коишто се инфраструктурни, проекти како на пример Коридорот 8 или Коридорот 10, за кои не можеме да речеме дека се проекти на ДУИ или на ВМРО-ДПМНЕ или на некој трет или четврт, тие се проекти кои служат за сите граѓани на Република Македонија. Втор пример ни е плоштадот Скендер-бег којшто е проект на Владата, заедно го градиме и се обидуваме да го поврземе модерното со традиционалното. Тоа е проект којшто се финансира од Владата, преку Министерството за локална самоуправа. Во тек е втората фаза со 11 милиони евра, така што можеме да кажеме дека сите овие проекти што ги финансира владата, согласно заедничката програма донесена од двете партии, оди според динамика пропишана однапред“.

За поплаките на општините водени од опозициски градоначалник дека не добиваат доволно пари од централната власт за свои проекти, Шабани вели дека тоа не е точно,, затоа што постои Совет за рамномерен регионален развој и преку него се доделауваат пари секаде подеднакво.

„Пред десетина дена заседаваше овој совет, давам пример да објаснам дека тоа не е баш така, заседаваше советот и распределивме околу 2 милиони евра за проекти рамномерно низ сите региони во Република Македонија, вклучувајќи ги речиси сите општини, затоа што општините аплицираат преку Центрите во Министерството и ние преку Советот рамномерно ги распределивме тие средства. На тој начин правиме и во другите случаи. Можам да дадам и други конкретни примери за опозициските општини. Пример Општина Струга, каде што во делот на образованието имаме инвестиции во училишта, во училиштата во Лабуништа и во Радолишта има реконструкции. Може да земеме трет пример, Општина Студеничани, село Морани и ред други така наречени опозициски општини каде што се градоначалници предложени од опозицијата, така што не би се согласил целосно дека тоа е така“, вели Шабани. /крај/рсе/бб