Економија
Владата годинава со 1,5 милиони евра ќе го помогне рибарството и аквакултурата
Владата на Република Македонија ја донесе Програмата за финансиска поддршка во рибарството и аквакултурата за 2014 година.
Вкупно средства за финансиска поддршка во рибарството и аквакултурата за 2014 година изнесуваат 90 000 000 денари, или 1,5 милиони евра.
„Со овие средства со кои ќе се финансираат мерки и активности во оваа област не само што ќе се подобрат условите за стопанските субјекти кои функционираат во оваа област за раст на нивниот бизнис и отворање на нови работни места и ќе се подобрат можностите на граѓаните, туку и се придонесува во унапредување на природната средина“, рече во вторник на прес конференција владиниот портпарол Александар Ѓорѓиев.
Тој додаде дека целата програма се состои од повеќе мерки кои се групирани во две поголеми подгрупи, и тоа за рибарство за која се издвоени 21 600 000 денари, и за аквакултура која ќе биде финансирана со 64 000 000 денари.
Прво, предвидената финансиска поддршка во рибарството ќе се реализира преку предложените мерки кои се однесуваат на порибување на риболовните води, изградба на риболовни пунктови, изградба на мандри за лов на риба и рехабилитација на риболовните води вклучително и мрестилишта.
Во областа на рибарството значајно е да се истакне дека оваа година за порибување на Охридското Езеро со пастрмка се издвоени 13 000 000 денари, двојно повеќе средства во однос на минатата година. Со континуираната поддршка во овој сектор и со новиот зголемен обем на средства кој ќе биде употребен за оваа година, врз основа на еколошки одржливи параметри, ќе се создадат услови за зголемување на дозволениот улов на охридска пастрмка за 2014 година и согласно риболовната основа за оваа година тој ќе изнесува 16 500 килограми, обем во кој се опфатени и стопанскиот и рекреативниот риболов. Овој зголемен обем на дозволен улов ќе биде од несомнено значење за стопанските субјекти кои се занимаваат со оваа дејност и за граѓаните од езерскиот регион.
Со средства од оваа програма ќе се изврши и порибување на Дојранското и Преспанското Езеро и вештачките езера Шпилје и Тиквеш, но и на останатите риболовни води и водите на кои не е доделена концесијата за риби.
Се предвидуваат и финансиски средства за изградба на нови и реконструкција на постоечки мандри за враќање на традиционален начин на лов на риба на Дојранското Езеро, која ќе се реализира во соработка со единицата на локална самоуправа и концесионерите на рибите, а за која се издвоени околу еден и половина милион денари.
Покрај овие мерки се предвидуваат и средства за отстранување на мрежите кои од разни причини се останати во водите на кои се врши стопански риболов, изградба на пунктови и рехабилитација на пунктови за порибување и останати потреби.
Второ, аквакултурата ќе се финансира со 64 000 000 денари.
„Основната цел на планираните мерки е зголемување на производството на риби во рибнички услови преку овозможување на искористувањето на проектираните капацитети за производството на риби во постоечките рибници и овозможување на производство на риба во новоизградени капацитети“, рече Ѓорѓиев.
Средства во овој дел се наменети за инвестиции во подигнување, изградба и проширување, реконструкција, адаптација и модернизација на постоечките капацитети, за изградба на нови капацитети за преработка на рибите, како и за набавка на опрема за доработка, преработка, складирање и пакување на рибите. За инвестициите се предвидени средства во вкупен износ од 19 400 000 денари.
Покрај ова, се предвидуваат и средства за директна поддршка, кои се наменети за реализација на две мерки.
Со мерката финансиска поддршка за порибителен материјал се врши покривање на дел од трошоците за чување на рибни матици и нивна селекција. За реализација на оваа мерка се предвидени средства во вкупен износ од 30 000 000 денари. Висината на вредноста на оваа поддршка изнесува 600 денари по матица за не повеќе од 700 броја обележани полово зрели матици по одделен вид риба за видовите охридска, речна и виножитна пастрмка и поточна златовчица, за не повеќе од 300 броја од видот крап и за не повеќе од 50 броја од видовите амур, сом и толстолобик.
Во оваа година како мерка за директна поддршка се предвидуваат и финансиски средства за произведен и продаден килограм риба на пазарот. На барање на рибопризводителите се предлага да се исплати надомест за килограм произведена и продадена риба на пазарот во 2014 година и тоа за автохтоните ендемични видови риби надомест во износ од 20 денари по килограм, а за останатите видови риби кои се произведуваат во рибниците надомест во висина од 10 денари по килограм. За реализација на оваа мерка се предвидени финансиски средства во вкупен износ од 15 000 000 денари. На овој начин и со оваа континуирана поддршка ќе се овозможи продолжување на трендот на зголемување на обемот на произведена риба, кој досега во изминатите неколку години е зголемен за два и половина пати.
Со овие средства ќе се финансираат и технички потреби, пилот проекти, развој на нови пазари и промотивни кампањи и колективни мерки и други мерки и активности. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Од полноќ нови цени на горивата
Регулаторната комисија за енергетика донесе одлука со која се врши намалување на малопродажните цени на нафтените деривати во просек за 1,70 % во однос на одлуката од 29.4.2024 година.
Од 8.5.2024 година од 00.01 часот максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 86,00 (денари/литар)
Моторен бензин ЕВРОСУПЕР БС-98 – 88,00 (денари/литар)
Дизел-гориво ЕВРОДИЗЕЛ БС (Д-Е V) – 74,50 (денари/литар)
Масло за горење екстра-лесно 1 (ЕЛ-1) – 74,00 (денари/литар)
Мазут М-1 НС – 45,832 (денари/килограм)
Малопродажните цени на бензините ЕВРОСУПЕР БС-95 и ЕВРОСУПЕР БС-98 и на екстра-лесното масло за домаќинство (ЕЛ-1) се намалуваат 1,50 денар/л.
Малопродажната цена на ЕВРОДИЗЕЛОТ (Д-Е V) се намалува 1,00 денар/л.
Малопродажната цена на „мазутот М-1 НС“ се намалува 0,829 денари/кг и сега ќе изнесува 45,832 денари/кг.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините 2,438 %, кај дизелот 2,100 %, кај екстра-лесното масло 2,605 % и кај мазутот намалувањето е 1,907 %.
Курсот на денарот во однос на доларот во изминатиот период по кој беа формирани цените со претходната пресметка е понизок 0,407 %.
Економија
Хрватска е привлечна за балканските работници поради платата, станува збор за многу пари
„Сезоната за извоз на работна сила практично започна веќе во април, поточно за келнери, готвачи и други работници во угостителството и туристичката индустрија“, пишува српски Блиц во текстот со наслов „На нашите градилишта пристигнуваат работници од Турција и Кина, а нашите келнери и готвачи масовно бегаат кон Јадранот“.
Милош Турински од локалната ПР Инфостуд, најголемата српска база на податоци за наоѓање работа, за споменатиот медиум изјави дека Црна Гора ги објавила првите огласи за овие работници уште во јануари, а потоа Словенија и Хрватска, па веќе пристигнале голем број работници од Србија на Јадранот, каде подготовките за новата летна сезона траат веќе подолго време.
„Ова е тренд на кој сме сведоци со години, додека, од друга страна, самата Србија се бори да најде работници во угостителството поради големиот дефицит. Проблемот само ќе се зголемува како што се загрева летната туристичка сезона на Јадранскиот брег“, вели Турински.
Според бројот на ангажирани работници од Србија на сезонски работни места во овој сектор, Хрватска е број еден, истакнуваат оттаму. Следуваат Словенија и Црна Гора.
„Хрватска е најпривлечна за српските работници поради многуте деловни можности и платата што можат да ја заработат. Тоа се многу пари, бидејќи најмногу им се плаќа за сместување и неколку оброци дневно. Од друга страна, навистина има многу работа на хрватското приморје, често без слободни денови во неделата, но нашите луѓе се свесни дека по летото можат да се вратат со висока заработка. Во Словенија и Црна Гора заработувачката за овие работни места е нешто помала, но сепак е на солидно ниво“, објаснува Милош Турински.
Турински за Блиц изјави и дека келнерите вработени во некои од одморалиштата во Хрватска можат да заработуваат од 1.500 до 2.000 евра месечно, додека платите на многу бараните готвачи се и до 3.000 евра месечно. Помошниците во кујна се платени од 800 до 1000 евра.
„Покрај угостителските работници, во Хрватска многу се бараат и работници за други работни места во туризмот, така што чистачките и собарките можат да заработат по 1.000 евра месечно. Оваа плата ја добиваат и хостесите кои работат на промоција на разни ресторани и други угостителски објекти“, вели Турински.
Кога станува збор за увозот на работници во Србија, тој и годинава ќе биде доминантен во градежната индустрија каде недостигот од домашна работна сила го покриваат градежниците од азиските земји, се вели во написот. Станува збор за претежно квалификувани работници кои се стручни за извршување на овие работни места.
„Сега започнува интензивната сезона во земјоделството и во таа стопанска гранка, како и претходните години, може да очекуваме и големи проблеми поради недостиг на луѓе. Поради ова се очекува многумина да ангажираат странски работници кои доаѓаат од земји во Азија и Африка“, објави српската ПР Инфостуд.
Пораснаа дневниците за работниците во земјоделството, па може да очекуваат дневна плата од 50 евра доколку не се вклучени превозот и оброците.
Економија
Комисијата за осигурување од автомобилска одговорност направи измени на тарифникот, Предлог-одлуката е доставена до Владата
Комисијата за осигурување од автомобилска одговорност денеска одржа нова седница на која ја разгледа Анализата за оправданоста и исправноста на донесените одлуки на друштвата за осигурување, подготвена и доставена до Комисијата од страна на Агенцијата за супервизија на осигурувањето, како регулатор на работењето на осигурителниот пазар.
По разгледување на Анализата, а врз основа на наодите, Комисијата за осигурување од автомобилска одговорност одржа седница и утврди потреба од измени на Тарифата за премии за осигурување и подготви Предлог-измени и дополнувања на Тарифата на премии со кои се доуредува член 3 во насока на заштита на корисниците, извести Министерството за финансии.
Предложените измени се насока на утврдување на опсег од 15% до 30% во кој друштвата за осигурување можат да го определат делот на премијата за вршење дејност на осигурување од автомобилска одговорност, а за секој износ на овие трошоци над 30% да побараат претходна согласност од Агенцијата за супервизија на осигурување. Ова значи враќање на цената на осигурувањето од автоодговорност на ниво од пред 25 април 2024 година.
Дополнително беше утврдено дека Комисијата најдоцна до 30 септември секоја година до Владата да доставува предлог за минимална и максимална стапка на техничка премија за осигурување за следната година.
Одлуката за донесување нова тарифа се заснова на Анализата на АСО со која се укажува дека на 23.04.2024 година, 11 друштва за осигурување кои вршат работи на осигурување во групата на неживотно осигурување доставиле известувања до Агенцијата за супервизија на осигурување за донесени одлуки на нивните органи на управување за зголемување на премиите за задолжително осигурување од АО, при што се повикуваат на одредбите од Тарифата на премии за осигурување од АО, објавена во „Службен весник на РМ“ бр. 191/2018, според кои одредби имаат можност самостојно да одлучат за висината на делот од премијата за спроведување на дејноста, односно т.н режиски додаток при одредувањето на крајната премија по договор за осигурување (член 3 од Тарифата). Притоа известувањата на друштвата до АСО не содржат финансиски анализи за изминати периоди, ниту пак конкретни проекции за очекуван развој на ризиците кои ги преземаат во осигурување. Единствен аргумент на кој се повикуваат друштвата за осигурување се растечките трошоци од работење, кои не се непосредно поврзани со настанување на ризиците, односно со настанатите и очекуваните штети, соопшти Министерството за финансии.
Дополнително, ставот на Комисијата е поткрепен со мислењето на АСО како регулатор дека ваквото постапување на Друштвата за осигурување влијае врз стабилноста, сигурноста и предвидливоста на функционирање на целиот систем на осигурување во насока на штета на осигурениците, односно сопствениците на моторни возила.
Предлог-одлуката што ја усвои Комисијата за осигурување од автомобилска одговорност на денешната седница е доставена на усвојување до Владата на РС Македонија.
Состојбите на пазарот ќе се следат и во наредниот период и ќе се преземаат соодветни одлуки, врз основа на анализи и во еден отворен и транспарентен процес. Во врска со донесените одлуки од страна на осигурителните компании за зголемување на висината на бруто-премијата за осигурување од автомобилска одговорност во втората половина од април 2024 година, Министерството за финансии ја свика Комисијата за осигурување од автомобилска одговорност која одржа седници на 26, 29 и 30 април и 02 мај 2024 година со цел да ги разгледа сите аспекти од носењето на овие одлуки, се додава во соопштението на Министерството за финансии.