Македонија
ЦУРМ додели награди и признанија, а новите цариници положија заклетва
Нововработените царински службеници во среда дадоа свечена заклетва, а на церемонијата им беше оддадено и признание на одредени поединци, институции и компании кои со својата работа допринесоа за успешна реализација на активностите на Царинската управа, додека на вработените кои навршиле 10, 20 и 30 години работен стаж, им беа доделени награди.
Свеченоста ја отвори директорката на Царинската управа, Наташа Радеска-Крстевска која истакна дека чествувањето на трудот, на заложбите и сработеното, на сите заеднички успеси, и неуспеси, чествувањето на моментот кога новите царински службеници ќе дадат службена заклетва за Царинската управа е чест и задоволство.
Радеска-Крстевска додели седум плакети и шест пофалници и тоа: за долгогодишна и успешна соработка во делот на вештачења, анализи, вешт наод и мислење, а особено заради нивната достапност 24 часа, беше доделена пофалница на Оддел за криминалистичко-техничко испитување и вештачења при МВР, кое само во 2013 година има извршено повеќе од 30 вештачења на опојни дроги, оружје, муниција и документи потребни за успешно водење на предистражната постапка на Царинската управа. Пофалницата ја прими Слободан Оклевски, началник на одделот.
На четири компании им беа доделени плакети и тоа: на компанијата Баргала – Штип која бесплатно ги острани ознаките на трговските марки од околу 3.000 пара обувки, на компанијата Ноел – Гевгелија која бесплатно ги острани ознаките на трговските марки од околу 800 парчиња облека, на компанијата од Јагја Мезлер од Штип, која бесплатно ги острани ознаките на трговските марки од околу 300 парчиња облека и на компанијата Дени Интернационал од Скопје која изврши бесплатен транспорт на горенаведените стоки од царинските магацини до компаниите и обратно, заради отстранување на ознаките, и ослободи дел од стоките од трошоци за складирање во својот магацин.
Со нивна помош, на 31-ви декември 2013 година на Министерството за труд и социјална политика Царинската управа му предаде 3.070 пара спортски обувки и 1.096 парчиња облека.
Плакета беше доделена и на компанијата Ксениа Какламанос од Гевгелија затоа што со своето успешно работење допринесува во спроведувањето на економската политика на Република Македонија, за развојот на општина Гевгелија и тежнее кон постојано унапредување и користење на царинските постапки за увоз за облагородување и забрзување на постапката при увоз и извоз, рече директорката на управата.
Од организационите единици на Царинската управа за постигнати исклучителни резултати, беа доделени плакети на: одделението за истраги при Секторот за контрола и за успешно завршена работа поврзана со борбата против трговија и пренос на дрога и дела против здравјето на луѓето, културното наследство и природните реткости, јавните финансии, правниот сообраќај и јавниот ред и на Царинска испостава Табановце-автопат при Царинарница Куманово – заради постигнати исклучителни резултати во работењето.
За исклучителен придонес во откривање на царински и девизни прекршоци, кривични дела и спречување на криумчарење на опојни дроги, Царинската управа им додели пофалници на пет царински службеници од царинските испостави Свети Наум, Ќафасан и Меџитлија.
На крај, на царинските службеници кои навршиле 30, 20 и 10 години работен стаж во Царинската управа им беа врачени златници и сребреници.крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Апасиев: Доста ни е од веќе видени пратеници и од гласање за помалото зло
„Во програмата имаме 13 поглавја кои го опфаќаат секој аспект од општественото живеење. Главната порака до граѓаните е да го заокружат бројот 5 на гласачкото ливче и да дозволат млади неподмитливи луѓе да ги застапуваат, бидејќи доста ни е од веќе видени пратеници и од веќе видено гласање за помалото зло. На тој начин ќе спречиме многу штетни политики“, рече лидерот на Левица, Димитар Апасиев од Прилеп, презентирајќи ја предизборната програма на неговата партија во пресрет на парламентарните избори.
-По првиот круг не паѓаме со духот, туку продолжуваме со првичната замисла, додаде Апасиев.
Партијата Левица очекува поддршка од прилепчани каде, како што велат од оваа партија, имаат реална основа за тоа.
– Земјоделството мора да биде планско. Планираме да се пополнуваат стоковите државни резерви строго со домашно производство, со однапред склучени договори за земјоделците да имаат некаква сигурност во производството. Планираме фиксни откупни цени, државни откупни центри за да не можат прекупците да ја местат цената како што ним им одговара, ладилници за складирање на произведената храна од кои ќе се снабдуваат Армијата, градинките, училиштата, болниците. Мерките, генерално ни се насочени кон државна интервенција во земјоделството, а не да биде оставено стихијно. Во стопанството планираме рестартирање или отворање државни профитабилни фирми во секоја стратешка стопанска гранка, рече носителот на кандидатската листа на пратеници во четвртата изборна единица, Сашко Јанчев при претставувањето во Прилеп.
Македонија
Спасовски од Шуто Оризари: Да не се попречува изборниот процес
Носителот на листа на кандидати за пратеници од СДСМ и коалицијата за европска иднина од ИЕ2, Оливер Спасовски, имаше свое обраќање во Шуто Оризари.
„Денеска продолжуваме со изборната кампања во Шуто Оризари на разговор со граѓаните за претседателските и парламентарните избори на 8 мај. Сакам да се сретнеме со сите граѓани, да влеземе во секоја куќа во општината Шуто Оризари, да поразговараме со секого за нашата перспектива на Македонија”, рече Спасовски. Притоа, тој ја истакна важноста да се гласа на 8 мај.
„Многу е важно граѓаните да останат смирени и овој втор круг од изборите да помине во демократска атмосфера. Упатувам порака до сите оние се дрзнуваат на било кој најчин да го попречуваат изборниот процес, да се закануваат, да навредуваат, да останат на ниво на демократски вредности. Да ги почитуваат граѓаните и на мирен, фер и демократски начин да заврши изборниот процес. Воедно ги повикувам сите граѓани масовно да излезат на изборите на 8 мај, да гласаат за нашиот претседател Стево Пендаровски заокружувајки го бројот 1, и да гласаат за листата на пратеници исто така под број 1 за коалицијата за европска иднина”, порача Спасовски.
Македонија
Меџити: Сите бегаат од ДУИ како од корона
Изет Меџити, лидерот на Демократското движење, чија партија е дел од коалицијата ВЛЕН рече дека „на ВМРО-ДПМНЕ ѝ треба албански партнер како ВЛЕН, за да биде целосна сликата“.
-Од ДУИ денес сите бегаат како од корона. Дури и ВМРО-ДПМНЕ и Максим Димитриевски бегаат од ДУИ и не сакаат влада со нив, рече Меџити на средби со граѓани во општина Чаир и во Сарај.
Ветува решавање на клучните проблеми на граѓаните во нивните општини.
За Меџити, само на тој начин ќе се претендира за европски вредности и европски фронтови. Немањето канализација и елементарни услови за живот е недозволиво, истакнува тој.