Култура
Кирил Џајковски главна ѕвезда на „Битола Отворен град 2010“
Македонскиот електро гениј, Кирил Џајковски, заедно со оркестарот „Серџук“ и Рас Твид се главните ѕвезди на деветтото издание на меѓународниот младински арт-фестивал „Битола отворен град 2010“.
Македонскиот електро гениј, Кирил Џајковски, заедно со оркестарот „Серџук“ и Рас Твид се главните ѕвезди на деветтото издание на меѓународниот младински арт-фестивал „Битола отворен град 2010“. Откако ја освои публиката на Ethno Fest (Палиќ, Србија), Sa SaZu (Прага, Чешка), Fusion-Festival (Ларц, Германија), We love music festival (Осијек, Хрватска), ДемоФест (Бања Лука, Босна и Херцеговина), Таксим плоштадот (Истанбул, Турција), во Аурора клубот (Примоштен, Хрватска), како и во Сараевскиот Дом на млади, Кирил доаѓа во Битола. На сцената поставена под отворено небо на Олимпискиот базен на 22 август 2010 тој екслузивно ќе се претстави пред македонската публика заедно со својот бенд во најсилен состав од 15 музичари. Како што информираат од Младински Културен Центар Битола, моментално Џајковски подготвува незаборавно шоу за Битола отворен град. Во музичката програма, покрај Џајковски, на фестивалот ќе се претстават повеќе музички имиња, меѓу кои и „Небо“, потоа „Бернајс пропаганда“, диџеите Горан Тех и Дејан Декс, како и „Д.Н.О.“ и „ПМГ колектив“. Арт-фестивалот опфаќа и повеќе придружни активности, како изложба на дигитални графики, улични перформанси, креативни работилници, графити работилница, изложба на уметничка фотографија, улични концерти и журки на отворено. Интернационалниот младински арт-фестивал е во организација на Младински културен центар – Битола од 21 до 25 август, а главниот настан на 22 август е во коорганизација на МКЦ-Битола и „Фреш јунион“. Во изминатите фестивалски изданија фановите на „Битола отворен град“ имаа можност да ги проследат настапите на повеќе од 500 уметници од четириесетина земји од цел свет. Кирил Џајковски е македонски музичар и композитор, чија музика се протега низ повеќе стилови. Автoр е и на филмска и театарска музика. Кариерата ја започнал уште во раните осумдесети години во рамките на првиот македонска електро-група Бастион во која членувал и познатиот режисер Милчо Манчевски. Има снимано албуми и заедно со групата Леб и сол со која и има настапувано низ цела Европа. Во почетокот на деведесеттите се преселил во Австралија каде продолжил да создава музика комбинирајќи го македонскиот етно со модерниот електронски звук, па како резултат произлегол неговиот прв соло албум „Syntetic Theatre“, кој по независните радио станици во Австралија станал прилично популарен. Неговиот албум „Homebound“ хрватскиот Playboy го објави за најдобар екс-ју албум на годината, а на синглот за нумерата „Primitive Science“ се наоѓаат ремикси од Bushwacka, Subsonic Legacy и Dreadzone. /крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.