Култура
Промовирани глумците од серија „Од денес за утре“
Реномирана актерска екипа составена од доајени на македонското актерство, како и претставници на младата актерска генерација, ќе ги играат ликовите во македонската играна серија „Од денес за утре“
Главната женска улога, ликот на Цветанка, ќе го игра Билјана Беличанец Алексиќ, а главната машка улога, ликот на Томче Трикотажа ќе го толкува Сенко Велинов.Останатите улоги ќе ги толкуваат Ленче Делова, Диме Илиев, Ѕвезда Ангеловска, Митко Апостоловски, Јовица Михајловски, Јасмина Поповска, Ана Стојановска, Влатко Илиевски и изненадувањето, македонската гордост и чудо од дете Марко Чаласан, како и специјалната гостинка од Кина, Шуинг Донг. Актерската екипа составена од реномирани актери, изрази задоволство од можноста да бидат дел од македонска играна серија, по долг период на стагнација на домашна играна продукција. „Да се состави една ваква актерска екипа воопшто не беше лесно. Убедени сме дека го направивме вистинскиот избор и дека преку оваа актерска екипа ќе ја доловиме вистинската убавина и вредност на секојденевните мали нешта што често не ги забележуваме, а се тука околу нас и можат да не направат посреќни, затоа што се наши, автентични, уникатни… Веруваме дека ликот на Томче Трикотажа, главниот машки лик, што го игра Сенко Велинов, ликот на неговата сопруга Цветанка, главниот женски лик, што го игра Билјана Беличанец Алексиќ, како и сите други ликови во серијата, ќе станат препознатлив синоним за актерите што ги толкуваат овие улоги. Искрено се надеваме дека гледачите ќе уживаат во оваа серија, чија крајна цел меѓу другото е да ги расположи и опушти “, вели Иво Лауренчиќ режисер на серијата „Од денес за утре“. Актерската екипа, беше промовирана преку читачка проба на сцената „Семеен ручек“, со што беше на автентичен начин промовиран духот и содржината на серијата. Серијата обработува тематика од секојдневиот живот на просечно семејство од средната класа, составено од неколку генерации кои живеат под еден кров. Семејството се соочува со многубојни проблеми и предизвици на новото време, но серијата има намера да ги прикаже од духовитата, посветла страна на животот. На почетокот на мај ќе падне и првата клапа, со што ќе започне и снимањето на епизодите. Серијата ќе се реализира со поддршка од Cosmo – Тинекс, Комерцијална банка, Прима мебел, Ладна Вода, Порше, Гранд Кафе, Фруктал, Винчини – Виница, Алкалоид, МекДоналдс, Кроација Животно Осигурување, Ресторан – Далма, Ремедика и Спортлајф.
„Од денес за утре“, се работи според сценарио на познатиот македонски драматург Братислав Димитров и легендарниот сценарист од бившите југословенски простори Предраг Перишиќ. Режијата е на Иво Лауренчиќ, а музиката на познатиот македонски композитор и пејач Ристо Самарџиев. За сцанографијата е задолжена Снежана Поњавиќ Муча, додека костимограф е познатата Розе Трајчевска. Поголемиот дел од серијата ќе се снима студиски во Скопје, а остатокот на неколку локации во Македонија. Ќе се одработи 13 часа монтиран материјал од кој постпродукциски ќе се реализираат 13 епизоди. Серијата е во копродукција на Идеа Плус комуникации и Сител телевизија, на чија програма и ќе се емитува.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.
Култура
Распишани конкурсите за државните награди „11 Oктомври“ и „22 Ноември“
Денеска се распишани конкурсите за државните награди „11 Oктомври“ и „22 Ноември“ за 2024 година.
Со државната награда „11 Октомври“ се оддава највисоко признание за животно дело во областа на науката, уметноста, стопанството и во другите дејности од јавен интерес на државата. Наградата се доделува на поединци, група творци, екипи, установи, трговски друштва и здруженија на граѓани од земјава.
Со државната награда „22 Ноември“, пак, се оддава признание на личностите од политичкиот, културниот и општествениот живот во нашата држава кои дале свој придонес во унапредување на меѓучовечкиот соживот и меѓусебно разбирање меѓу припадниците на различните заедници, култури и вери.
Конкурсите за државните награди „11 Oктомври“ и „22 Ноември“ за 2024 година траат од 1 до 31 мај 2024 година.
Конкурсите се објавени и на веб–страницата на Министерството за култура на следните линкови:
Државна награда „11 Октомври“ – https://kultura.gov.mk/wp-content/uploads/2023/10/odluka-3.pdf
Државна награда „22 Ноември“ – https://kultura.gov.mk/22-%d0%bd%d0%be%d0%b5%d0%bc%d0%b2%d1%80%d0%b8/
Култура
Мајските оперски вечери немаат никакви примеси на економски ниту политички стремеж, организаторите го најавија 52-рото издание
Мајските вечери немаат никакви економски ниту политички стремеж, еден ваков уникатен собир ќе го обележи и Скопје и Македонија, соопштија организаторите на прес-конференција.
„Оваа манифестација датира од крајот на 60-тите години. Тогаш имало криза со публика, која не била изразена само во Скопје. Во првите години мајските оперски вечери се празни, но со текот на годините заинтересираноста расте“, изјавја организаторите.
Како што велат оттаму, ова е еден од најголемите фестивали во регионот и со квалитетна програма сите овие години.
„Оваа година ќе има екслузивна програма. Очекуваме одлични резултати“, додаваат оттаму.
Реномираниот македонски режисер Иван Поповски, со успешна кариера во Русија, ја поставува операта „Трубадур“ од Џузепе Верди, со чија премиера ќе се отворат 52. Мајски оперски вечери (МОВ) на 9 мај во Националната опера и балет (НОБ). Диригент ќе биде Енрико Довико (Италија), сценографијата ја работи реномираниот Миодраг Табачки од Србија, костимите Марија Пупучевска, а кореографијата Саша Евтимова.
Во рамките на 52. Мајски оперски вечери, во фоајето на Националната опера и балет, од 9 до 31 мај ќе биде поставена и изложбата „Оперска одисеја“ – наследството на Милка Ефтимова. Изложбата ќе ја сочинуваат донирани лични предмети од движно материјално и нематеријално културно наследство, класифицирани во категоријата лични предмети како и голем број награди, признанија, уметнички портрети и фотографии кои во детали ја прикажуваат нејзината богата музичка кариера.
„Оперска одисеја“ е резултат на институционалната соработка помеѓу Музејoт на македонската борба за самостојност и Националната опера и балет. Автор на изложбата е Василија Чали, соработник за визуелни уметности, дизајн и архитектура.