По повод Светскиот ден на лицата со попреченост, градоначалникот на Општина Центар, Горан Герасимовски, го посети Центарот за деца со церебрална парализа, кој одбележа 20 години постоење.

На приредбата, градоначалникот ја нагласи посветеноста на локалната самоуправа за постојано унапредување на овој Центар.

„Нашата општина има инклузивен и хуман пристап кон сите граѓани, а токму овој Центар е доказ за тоа“, истакна Герасимовски.

Центарот за деца со церебрална парализа продолжи со работа во 2019 година во ООУ „Киро Глигоров“.

Се простира на површина од 305 м² и располага со антибактериски подови, адаптирани тоалети, инклузивни стандарди, рампи за пристап, адаптибилно загревање и интерактивни табли.

Преку унапредувањето и функционирањето на овој Центар, Општина Центар континуирано ја покажува грижата и поддршката за лицата со попреченост, како и стремежот да се создаваат услови за поквалитетен живот за сите граѓани

Под слоганот „Заедно низ боја и тон“, основците од ООУ „Владо Тасевски“ на свој креативен начин го одбележаа Меѓународниот ден на лицата со атипичен развој – 3 декември, организирајќи во рамки на своето училиште инклузивен уметничко-музички настан. Иницијатор на денешниот настан беше специјалниот едукатор Весна Филиповска, а во организацијата учествуваа и образовните асистенти: Ирена Милевска, Ивана Јанкуловска, Светлана Блажевска, Кристина Ристовска, Ема Тосева и Верица Џијановска, како и Менде Дамчески (техника), Марија Бакоч (ликовна секција) и Елизабета Стабоевска (вокална изведба). Целта на едночасовниот перформанс беше промовирање на еднаквите можности, видливоста и активното учество на лицата со попреченост во нашето општество.

По тој повод, градоначалникот Сотир Лукровски, претседателот на Советот, Христо Саракинов, советникот Александар Петровски и претставник од Одделението за образование од Општина Карпош, присуствуваа на денешната свеченост, каде учениците со типичен и атипечен развој во придружба со возрасни уметници се претставија со своите музички и ликовни дела. Настанот го одбележа креативниот израз на талентираните ученици кои настапија заедно со своите гости од „Леон Бенд“, кои воедно се претставници од младинскиот центар „Крик“. „Нивниот настап беше конкретен пример како може уметноста, креативноста и заедништвото да ја подигнат свеста за значењето на инклузијата, создавајќи простор за секое дете и секој возрасен да го искаже својот став во јавноста. Ваквиот концепт овозможува природно поврзување меѓу различни генерации, таленти и способности, со што се поттикнува прифаќање и развивање на инклузивни вредности во училиштето и заедницата“.

Во оваа пригода, организаторите му врачија благодарница на градоначалникот Сотир Лукровски, за соработка, поддршка и придонес во развојот на инклузивни практики во ООУ „Владо Тасевски“. Првиот човек на Општината доби и уметничка слика, изработена од вредните раце на креативните дечиња. Општинскиот татко напомена дека локалната самоуправа останува посветена на унапредување на инклузијата, креативноста и еднаквите можности, со визија за градење на заедница во која различностите се прифатени, вреднувани и поддржани.

– „Морам да ви признаам дека сум воодушевен од вашиот перформанс, од длабоките емоции, од љубовта и позитивната енергија која ни ја пренесовте. За овие моменти вреди да се биде на жешкото столче во Општината. Сакам да им честитам на сите дечиња и на наставниот кадар кои беа дел од оваа програма, кои успеаја да направат една содржинска и тематска приредба. Јас како градоначалник ви ветувам дека локалната самоуправа ќе биде секогаш тука, за да ја поддржи секоја ваша иницијатива“ – истакна Лукровски.

Министерот за култура и туризам Зоран Љутков денеска во Порта Македонија се обрати на конститутивнaта седница на Советот за туризам, стратешко и советодавно тело кое има значајна улога во обликувањето и креирањето на туристичката политика на Македонија, со цел унапредување на координацијата и обезбедување системска поддршка за одржлив раст и развој на туристичката индустрија.

Во своето обраќање, Љутков ја истакна важноста на Советот како механизам за креирање современи, ефективни и одржливи туристички политики и мерки кои ќе испорачуваат конкретни резултати во интерес на туристичкиот сектор и економијата.

„Започнува новата ера во туризмот, а денешната конститутивна седница на Советот е потврда за тоа. Конституирањето на Советот значи дека најсложениот дел е зад нас. Воспоставивме функционални сектори за туризам, со јасна цел – да обезбедат ефикасно управување со туристичките дестинации и силна поддршка за стопанството“, рече министерот.

Тој ги нагласи актуелните предизвици со кои се соочува туристичката индустрија, потребата од модернизација на промотивните алатки, дигитализација, зајакнување на дестинацискиот менаџмент и поставување јасни стандарди за конкурентност.

„Од работата на Советот очекуваме и конкретни решенија кои ќе бидат во директна полза на сите чинители во туризмот. Предизвиците се големи и претстои доста работа, но верувам дека заедно можеме да постигнеме мерливи резултати во разумен временски рок. Верувам дека преку овој Совет ќе создадеме функционален механизам за координација, консултации и стратешко планирање што ќе ја насочи нашата работа во наредниот период“, дополни министерот Љутков.

Советот е составен од претставници на туристичките здруженија и асоцијации, високообразовните институции, ЗЕЛС, стопанските комори, како и експерти од областа на маркетингот, стратегискиот менаџмент и туризмот. За претседател на Советот беше избран Кристијан Џамбазовски, долгогодишен стопанственик со институционално искуство, кој ќе придонесе за поинтензивна и координирана соработка меѓу Советот и Министерството, со што ова тело и формално го започна својот мандат.

На седницата новиот претседател ја презентираше Предлог-програмата за промоција и поддршка на туризмот за 2026 година, документ кој опфаќа приоритетни активности, маркетинг-стратегии, интернационална промоција, развој на тематски туристички производи, унапредување на туристичката инфраструктура и зајакнување на капацитетите на локалните дестинации.

„Со формирањето на Советот, Министерството ја зајакнува институционалната поддршка за туристичкиот сектор и создава услови за интегрирано, конкурентно и одржливо позиционирање на нашата земја на меѓународната туристичка мапа“.