Министерот за економија Ваљон Сараќини денеска оствари работна посета на општина Липково, каде беше пуштена во употреба мала хидроелектрана на Брестјанска река.

Објектот го изгради компанијата „ЕМК Мали хидроелектрани“ ДООЕЛ Скопје, со која Министерството за економија има потпишано вкупно 18 Договори за концесија за вода за изградба на мали хидроелектрични централи.„Концесионерот ја изгради малата хидроелектрична централа на водотекот на реката Брестјанска, со вкупен инсталиран капацитет кој изнесува 607 kW, при што очекуваното годишно производство е проценето на околу 2500 МWh, а големината на  инвестицијата за оваа електрана би изнесувала околу 1,6 милиони евра“, информираше Сараќини, Тој додаде дека согласно обврската од Договорот за концесијата, концесионерот ќе уплаќа годишен надоместок за концесија во висина од 2% од остварениот приход од продадената електрична енергија, од кој почнувајќи од 2016 година 1% од остварениот приход ќе одат во буџетот на општина Липково.Садула Дураку, градоначалникот на општина Липково, истакна дека инвестицијата е за поздравување, дека за прв пат се инвестира во реални  проекти кои вредат над 4,6 милиони евра, притоа упатувајќи благодарност до Министерството за економија и инвеститорот.„Имаме прекрасна природа, хидрологија и голем капацитет за инвестиции во оваа област, што докажува дека Липково е безбедна општина за инвестиции а добредојдени се и други инвеститори“ истакна градоначалникот.Инвеститорот на хидроцентралата на Брестјанска река, Данило Фрас, по повод свечениот чин истакна: „Посебно ми е драго што денеска заедно со министерот за економија Сараќини имаме чест да пуштиме во употреба една нова хидорецентрала, која што ја изградивме во рекордно време. Може да им честитам на сите за брзо завршената процедура, што не е случај во останатите држави во регионот, каде што, исто така, инвестираме во мали хидроцентрали, за што сме специјализирани. Многу сме задоволни од соработката со Министерството за економија и општината Липково и слободно можам да кажам дека ова е најдобар пример за соработка помеѓу инвеститорот, локалната власт и централната власт во поглед на реализација на еден проект“.Од вкупно 70 потпишани Договори за концесија за мали хидроелектрични централи,со инсталиран капацитет од 60 MW и инвестиција која се проценува околу 120 милиони евра, во моментот изградени се вкупно 11 мали хидроелектрични централи и истите веќе произведуваат електрична енергија и ја предаваат на мрежа, а во изградба се уште 20-тина мали хидроелектрични централи и истите се очекува да бидат пуштени до крајот на 2013 година и почетокот на 2014 година./крај/