Македонија ги укина визите за руските граѓани, па можете слободно да дојдете во Македонија и да се уверите дека неколку руски фирми успешно работат и дека има добри услови за работа, им порача премиерот Никола Груевски, на руските бизнисмени, во среда, на бизнис форумот во Калининград.

Бизнис форумот во Калининград се одржа во организација на Стопанската комора на Калининград и Асоцијацијата на инвеститори на Калининград, а на него учествуваа претставници на компании од областа на производството, туризмот и земјоделството. Калининград е регион од Руската Федерација кој има интензивен и динамичен економски развој кој, меѓу другото, се должи и на статусот на своевидна слободна економска зона.

Премиерот Груевски во своето обраќање ги повика калининградските и руските инвеститори да ја посетат Македонија и изворно да се запознаат со условите кои им стојат на располагање и поволностите за инвестиции.

„Македонија ги укина визите за руските граѓани и може да дојдете во Македонија за да се уверите на дело во нашите поволности. Во Македонија има руски инвестиции како што се „Протект груп“, „Солвеј груп“, „Лукоил“, „Гришко“ и од нив може да добиете потврда за можностите за водење на успешен бизнис во нашата земја“, рече Груевски пред присутните.

„Kако резултат на реформите за унапредување на бизнис климата Република Македонија е на листата на респектабилната Светска Банка каде за 6 години напредуваше од 94 на 23 место, а Прајсвотерхаус Купер ја прогласи нашата земја за 24 – та најпријателска земја во светот за бизнисмените во однос на фискалната политика и даночната политика, што е доказ за соодветната бизнис клима во која Владата и институциите се спремни да придонесат и да излезат во пресрет на инвеститорите“, изјави Никола Груевски во обраќањето пред присутните во Калининград.

Претседателот на Асоцијацијата на инвеститорите на Калининград, Стефан Влаховиќ ги охрабри бизнисмените да ги истражат можностите кои се презентираат и кои постојат во Македонија. Присуството на руски бизнисмени во Македонија е доказ за отвореноста и добрата бизнис атмосфера. Македонија и Калининградската област може да воспостават поконкретни односи и на полето на инвестициите и на полето на трговијата со производи, смета тој.

„Ние даваме субвенции за привлекување на туристи од Русија што ги прави аранжманите поконкурентни и поприфатливи за руските туристи и тоа е добра шанса за калининградските туристички агенции која може да придонесе за зголемување на нивниот бизнис“, рече вицепремиерот Владимир Пешевски.

Министерот Бил Павлески ги претстави можностите за инвестиции во земјоделството и во производството.

„Поддршката која ја дава Владата за производство и пласман на земјоделските производи создава квалитет кој е препознатлив бренд за Македонија“, рече Павлески.

Директорот на Дирекцијата за технолошки индустриски развојни зони Виктор Мизо се задржа на поволностите за инвестирање во технолошко индустриските зони акцентирајќи ги погодностите во даночната сфера кои им стојат на располагање на инвеститорите како и низата други мерки кои ги презема Владата на тој план./крај/со/бб