Култура
Битолските актери задоволни од оставката на директорот Огненовски
По оставката на директорот на Битолскиот Народен театар, што беше основно барање на актерскиот колектив при оваа национална установа, битолските глумци изјавија дека се надеваат дека оставката ќе биде прифатена од Министерството за култура
„Со оглед на нашите барања до директорот Сашо Огненовски, на 19 ноември се формираше штрајкувачки одбор и се најави штрајк по сите законски регулативи. До истекувањето на 48-те часа (законски период пред да започне штрајкот) кое завршуваше во петок навечер во 19 часот, од директорот добивме писмена изјава која ви ја испраќаме во целост, како и поштенската преписка со која го доказува испраќањето на неговата оставка до Министерството за култура на Република Македонија“, се вели во соопштието на битолските актери. Глумците од Народниот театар – Битола велат дека со оставката на директорот Онгеновски било исполнето нивното основно барање и дека очекуваат оваа оставка да биде прифатена од Министерството за култура, во интерес на колективот на НТБ. Исто така, актерите во дописот додаваат дека ќе го стопираат штрајкот.Во саботата навечер директорот на Народен театар Битола, Сашо Огненовски, поднесе неотповиклива оставка од функцијата директор на оваа национална установа што ја вршеше повеќе од една година. Оставката е поднесена по барање на колективот на театарот, кои во изминатите неколку дена го прекинаа извршувањето на работните задачи во оваа национална институција, незадоволни од менаџирањето на директорот Сашо Огненовски.Се очекува наскоро Министерството за култура да назначи нов директор на Битолскиот театар.Како главни причини за своето незадоволство, вработените во НТБ ги наведуваат игнорантскиот однос на директорот кон вработените и кон публиката, слабата посетеност на претставите, лошите услови за работа во театарската сала, лошо менаџирање на куќата, огромни хонорари за претстави кои се изведени само еднаш, ангажирање на анонимни режисерски имиња, злоупотреба на службената должност, во која се наведени прикривање на добиените средства од Општина Битола, издавање на салата на театарот без никаков паричен надомест, сметки од ресторани кои стигнуваат на сметка на театарот, своеволно преименување на работните места, неиплатени авторски хонорари, никаква комуникација со медиумите…„Нашиот протест е во полза на театарската куќа која низ годините наназад беше пример за еден од најдобрите на Балканот и се надеваме дека публиката и целокупната јавсност не‘ поддржува, знаејќи го фактот за повеќе годишното тонење на театарската куќа. Се надеваме дека сето ова што е наведено ќе биде репер при изборот на следниот директор на театарската куќа“, се вели во соопштението од Битолскиот театар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.