Законот за аудио и аудиовизуелни медиумски услуги за помалку од девет месеци третпат трпи промени, а Владата, како и досега, го менува во сктарена постапка без никаква консултација со новинарските и медиумските организации и без јавна расправа, се вели во реакцијата на Здружението на новинари (ЗНМ) испратена до медиумите во земјава.

Од таму констатираат дека со ваквото постапување, Владата покажува оти целта на Законот не е да ја заштити слободата на медиумите и да ги промовира интересите на медиумите и новинарите, туку да им послужи на дневно-политичките интереси.

Од ЗНМ велат дека со најновите измени Владата ги зголемува овластувањата на директорот на Агенцијата за аудио и аудиовизуелни медиумски услуги „со цел да ги дисциплинира медиумите“ и го уредува начинот на исплата на надоместокот „на националните радиодифузери за производство на домашна документарна и играна програма“.

„Владата наместо да ги покрие половина од трошоците за домашна продукција, треба да ги преполови часовите за емитување на домашна документарна и играна програма на националните радиодифузери. Ние се сомневаме дека со делумната компензација на трошоците за производство на ваков вид програма, Владата нема намера да го поттикне домашното производство, туку да го зголеми уште повеќе финансискиот притисок врз медиумите за да се зајакне контролата врз нивната уредувачка политика“, се вели во соопштението.

Со ова решение, како што велат од ЗНМ, Владата влијае и врз содржината на домашната продукција „зашто оценката за подобноста некој проект да биде финансиран од Владата ќе ја донесе  меѓу – ресорска комисија, која е политички орган“.

Од ЗНМ побараа Владата наместо вакви решенија со кои го зголемува учеството во финансирањето на медиумите, да отвори дебата за законско регулирање на владините кампањи.

„Тоа е барање на новинарските и медиумите организации во земјата, но и на Обединетите нации и на Европската унија. Тој закон треба да го дефинира јасно јавниот интерес на владините кампањи, трошењето да биде транспарентно и распределбата да биде врз основа на јасни критериуми“, се додава во соопштението.

Според ЗНМ, само на тој начин Владата може да ја подобри состојбата со слободата на медиумите во земјава и да престане да паѓа на светските ранг листи за слобода на медиумите./крај/мф/ап