Култура
Германски недели во Македонија
Периодот од 23 септември до 31 октомври 2009 година целосно е во знак на германско-македонското пријателство. Германската амбасада и Гете-институтот од Скопје ги организираат Германските недели во Македонија
Повод за тоа е дваесетгодишнината од падот на Берлинскиот ѕид и 60-от роденден на Сојузна Република Германија. Шест недели исполнети со културни настани – филмови, театар, музички концерти, современ танц, литературни читања, промоција на германската кујна, спортски натпревари…Германските недели започнаа вчера, со пристигнувањето на Омнибусот за директна демократија на плоштадот Македонија и филмскиот фестивал „Демократија – за сите?“ во Кинотеката на Македонија. Германската читалница, Младинскиот културен центар, киното „Фросина“, Драмскиот театар, ноќните клубови „Хавана“ и „Кастро“ во Скопје, како и домовите на култура и ноќните клубови во Штип, Куманово, Тетово, Прилеп, Битола, се дел од станиците на кои до 31 октомври ќе се промовира германската култура и посетителите ќе имаат можност да уживаат во многубројните работилници, дискусии, размената на перспективи.Од богатата програма на Германските недели во Македонија би можеле да се издвојат Фестивалот на електронска музика „de:sonanz Festival“, на различни локации низ Скопје, а програмата на фестивалот ја сочинуваат аудио и видео работилници, видео-проекции, уметнички и документарни филмови, интерактивна мултумедијална уметност, настапи во живо, диџеј сетови кои опфаќаат иновативна денс музика и експериментални мултимедијални перформанси; потоа петтото издание на Фестивалот на новиот германски филм во кино „Фросина“, презентацијата на германската кујна во ресторанот „Дивино“, германското учество на манифестацијата „Бела ноќ“ и Скопскиот џез фестивал и многу други.Програмата може да ја погледнете овде.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.