Култура
Промоција на „Цена од Ново маало“ од Владимир Плавевски
Утревечер во 20:30 часот, на локацијата на поранешна „Румба кафана“, Ново маало, ќе биде промовиран романот „Цена од Ново маало“ од авторот Владимир Плавевски. Издавач е Дирекцијата за култура и уметност на град Скопје
Во романот „Цена од Ново Маало” авторот Плавевски, како во своите претходни книги раскази „Играч на фанта”, „Амкање”, „Ловец на самовили” и „Поплава”, „страда” од автобиографска носталгија опсипувајќи не со лавина субјективни прикази на галерија ликови спопикани во скопскиот кварт наречен Ново Маало, во исклучително општествено-политичко невреме, во „Информбировска 48-та година” кога тогашната политичка власт запаѓа во политичкиот раскол со премоќниот комунистички СССР на генералисимусот Сталин, раскол што го разорува етичкиот дигнититет на луѓето и го обезличува битието на конзервативната средина на скопското маало во кое владее законот на посилниот, причинет од пеколните услови на скудното живуркање. Романескните случувања пребоени со љубовен заплет и задоени со политика резултира со губитништво во сите пори на маалското битисување. Авторот Плавевски со возбудлива страст го опишува маалското живеење чии драконски условности тешко се раскинувале дури и со бруталната контрола на тогашната власт. Следејќи ја автобиографската доследност како најсигурен начин за субјективна проценка на историските настани на своето Ново Маало, авторот Плавевски низ наративната призма на детето Владимир се втурнува во сите важни општествено-политички случувања кои со тектонска моќ го толчат неговиот личен, семеен и општествен статус. Главниот водечки лик на романот, неговата баба Цена, со својот стамен авторитет успева да владее со маалските и политичките тегобности подучувајќи го внукот и маалските херои и антихерои со наративна митологизација за животното премрежје на починатиот дедо-комита кој својот живот го посветил за слободна Македонија. Романот кулминира со крвава битка на Железниот Мост на Вардар, битка која е метафорички пораз и за маалото и власта. Сепак, еден од главните јунаци паѓајќи во матните води на реката Вардар отпливува во западниот свет за да се појави по педесетина години како феникс на нашите копнежливи доблести.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.