Управата за јавни приходи апелира до фирмите и до даночните обврзници, навремено да пријават персонален данок на доход, за што рокот истекува до 15 март, а до сега поднесени се само 1.000 пријави од очекуваните 200.000.

Образецот ПДД-ГДП е бесплатен, а граѓаните може да го симнат од интернет или да го добијат во канцелариите на УЈП.

Граѓаните се должни да поднесат годишна даночна пријава до 15 март, а пријавувањето трае од 1 јануари, информираат од УЈП.

„Субјектите кои имаат извршено исплати на физички лица во текот на 2012 година имаат обврска до 15 февруари да ги достават на физичките лица годишна пресметка за исплатените приходи и за данокот на персонален доход, односно олеснувањата и ослободувањата што ги имаат искористено“. Во исто време, правните субјекти, самостојните вршители на должност и другите субјекти кои имаат исплатено приходи, должни се да достават Извештај до УЈП во коишто ќе ги искажат сите приходи исплатени на физички лица во текот на 2012 година“, рече Мухедин Абдиќ, раководител на Сектор за услуги на даночни обврзници во УЈП.

Од УЈП констатираат дека во овој период мал број граѓани поднесуваат пријави, и се чека последниот ден иако УЈП има обезбедено повеќе начини на доставување,електронски, традиционално во хартиена форма до УЈП или по пошта.

По електронски пат 3.130 граѓани можат да поднесат пријава до УЈП, затоа што се регистрирани и го имаат потребниот УСБ токен.

УЈП има востановено и мобилни даночни шалтери кои со комбиња шетаат до сите населени места,а распоредот може да се погледне на нивната веб страница. Исто така, има отворено даночни шалтери во самите општини, а за Скопје ги има во Општина Илинден, Гази Баба и Чаир.

Обврска да поднесат даночна пријава имаат обврска да поднесат лицата кои дале објект под закуп, потпишале авторски договор, исплатена им е дивиденда, оствариле капитална добивка од продажба на имот или учество на берза, добивка од игри на среќа, примања од странство, дипломатски приход и друго.

Не се должни да поднесат пријава лицата кои имаат приходи само од плата, од пензија, земјоделство или самостојна дејност.

„Управата за јавни приходи очекува во текот на 2013 година да се поднесат годишни даночни пријави до 200.000 илјади“, рече Абдиќ.

Со последните измени на Законот за персонален данок од доход извршени се измени во однос на капиталните добивки и тргување со хартии од вредност, што ќе бидат изземени од оданочување, но тие промени се однесуваат на 2013 година, така што сите граѓани кои имаат остварено капитални добивки во 2012 година, оваа година мора да пријават.

До сега, поднесени се околу 1.000 пријави на данок на доход, а во 2012 година, биле поднесени 174.030 пријави.

Казната за неподнесување пријава изнесува од 500 до 1.000 евра, а лани тоа не го сториле 33.000 граѓани./крај/мф/бб