Вкупно 1750 имигранти од Албанија, Авганистан и од други земји од Блискиот и Среден Исток и Северна Африка ја минале државната граница на Македонија, а десетина од нив загинаа во железнички несреќи и не успеаја да стигнат до земјите не Европската Унија коишто се нивна цел. Дел од нив ги фати полицијата и завршија во Прифатниот центар во Скопје. Во овој центар лани биле сместени 838 илегални мигранти.

Според податоците на Министерството за внатрешни работи, изминатата 2014 година во областа на илегалната миграција откриени се 92 кривични дела „криумчарење мигранти“, што е за речиси двојно повеќе од претходната 2013 година, а кривично пријавени биле 166 лица.Полицијата детектирала четири криминални групи кои имале 28 членови и организирале криумчарење мигранти од Блискиот и Среден Исток и Северна Африка во западноевропските земји. По однос на кривичното дело “организирање на група и поттикнување на извршување на делата трговија со луѓе и криумчарење мигранти“ откриени се 17 вакви кривични дела во кои кривично се пријавени 43 сторители.Од Македонија, пак, азил побарале 32 лица и откриени се 19 случаи на злоупотреба на безвизниот режим со држави членки на ЕУ и Шенгенскиот договор.Во Владата во вторник се одржа дипломатски брифинг за активностите на Регионалната иницијатива за азил, бегалци и миграција – МАРРИ. Директорот на оваа иницијатива Трпе Стојановски вели дека најголем број од миграните се економски, односно бегаат од своите земји од безбедносни причини за да спасат жива глава. „Прашањето на нерегуларната миграција е, пред сé, прашање на земјите кои се соочуваат со овој проблем и треба да го менаџираат. Имајќи во предвид дека ова е појава и тенденција, феномен кој оди во нагорна линија, се интензивира и сите индикатори упатуваат на тоа дека ќе продолжи да се интензивираат, мерките на превенција и разјаснување на секој случај којшто ќе биде детектиран се во надлежност на националните институции. Она што го прави МАРРИ е да ги обедини земјите да разменат искуства и да се бараат решенија кои на регионално ниво може да превенираат’“, изјави Стојановски.Министерката за внатрешни работи, Гордана Јанкулоска, во своето обраќање на брифингот рече дека Хрватска ја напуштила иницијативата, но изрази надеж дека ќе се следи нејзиниот пример за зачленувањето во Европската унија.„Европската перспектива и зачленувањето во ЕУ е единствена опција за сите земји од регионот. Иако Македонија подолго време е земја кандидат сепак тоа не не обесхрабрува туку напротив ни дава дополнителна сила да покажеме дека ние сме подготвени за отпочнување на процесот на преговори, и тоа час поскоро. Со цел подготовка на земјата за преговори за членство во ЕУ, Владата успешно спроведе неколку процеси и тоа високиот дијалог за пристапување што целосно е исполнет, а воедно направи и длабинска анализа за усогласеност на македонското со европското законодавство. Стратешка определба на Владата на Македонија останува членството во ЕУ и НАТО“, рече Јанкулоска.Станува збор за регионална иницијатива којашто е формирана пред 12 години, седиштето и е во Скопје и секоја од земјите членки од регионот имаат свои претставници./крај/мф/ффс