Култура
Три македонски претстави на „Ex Ponto“
Интернационалниот театарски фестивал „Ex Ponto“ во Љубљана, Словенија, вчера беше отворен со проектот „Касандра“, копродукција меѓу фестивалите „Теута“ (Црна Гора), „ИНФАНТ“ (Србија), „Млад отворен театар“ (Македонија) и „Ex Ponto“ (Словенија)
„Касандра“ ќе го отвори и фестивалот „Млад отворен театар“ кој в сабота, 19 септември, започнува во Скопје. Текстот е на Љубомир Ѓурковиќ, режијата на Слободан Милатовиќ, а извршен продуцент е Дамир Домитровиќ – Кос, инаку и годинашен селектор на „МОТ“.Драматург на претставата е Загорка Поп-Антоска Андова, костимите се на Благој Мицевски, музиката на Шукрија Жути Серхатлиќ и видео Немања Петроније. Играат: Сенка Булиќ, Тихана Чулафиќ, Јована Стипиќ, Нико Горшиќ, Шукрија Жути Серхатлиќ, Љубомир Ѓурковиќ, Слободан Милатовиќ, Дамир домитровиќ – Кос.Касандра, античката пророчица се појавува во новата модерна верзија на Ѓурковиќ. Драмата е поврзана со пророштвото, а иницијативата за реализација на претставата е поврзана со еден момент на откровение кое им се случило на авторот, режисерот, продуцентот и еден од актерите на претставата во 2006 година.Покрај „Касандра“, на „Ex Ponto“ ќе се одиграат уште две македонски претстави – „Граница“ и „Валкани приказни“, двете во режија на Софија Ристевска, а во продукција на Мал драмски театар од Битола и Новиот градски од Охрид.Претставата „Валкани приказни“ од П. Гутиерес, Р. Полеш, Е. Енслер и Е. Олби на публиката и‘ нуди микс на современиот свет токму преку сексуалноста, страстите и разните девијации. Распадот што се случува во општеството доспева на сцената. Оваа едночинка е своевидна деконструкција на сексот и насилството. Трите лика се маргиналци (иако млади веќе се губат во џунглата на светот, а нивното барање на сопствениот идентитет е повеќе скитање), кои доспеваат на јавната сцена, нешто што само по себе им се препорачува на младите генерации театарски гледачи. Бруталноста и вулгарноста тука се во функција на естетски категории како еден вид хиперреализам. „Валканите приказни“ се чист и девствен театарски чин, кој може да се сублимира како приказ на суровата вистина.Играат: Никола Тодоровски, Стрезо Стаматовски и Адријана Билаловиќ.Камерниот проект „Граница“ од Венко Андоновски зборува за тоа колку политиката навлегува и располага со човечката индивидуа. Оваа претстава јасно покажува дека општеството, дури и кога е најагресивно, не смее да да го повреди просторот под покривката на креветот. Играат: Горан Стојаноски, Јасмина Билаловиќ, Никола Тодороски, Јоана Поповска и Борис Чоревски.Фестивалот „Ex Ponto“ завршува на 23 септември.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Реакција на Министерството за култура на соопштението од СКРМ за неисплатените плати на вработените во „Охридско лето“
Министерството за култура и туризам, почитувајќи ги кредибилитетот и реномето на НУ „Охридско лето“, а во врска со дописот на Синдикатот на културата на Република Македонија, информира дека Министерството за култура и туризам продолжува да дејствува во насока на почитување на правата од работен однос за вработените во НУ „Охридско лето“, но и да инсистира на законското постапување.
Институцијата е должна да постапи во врска со последното писмено известување добиено од Министерството за култура и туризам и да достави до Министерството коригирана пресметка на плата за месецот август 2024 г., во која нема да бидат содржани износи што се однесуваат на додаток на плата, без тој да биде претходно законски основан, велат од Министерството.
– Уште еднаш потенцираме дека Министерството за култура и туризам не спори да изврши исплата на основната плата на вработените во „Охридско лето“, се додава во соопштението.
Култура
„Јон Вардар против галаксијата” викендов беше премиерно прикажан во Шпанија
Првиот македонски долгометражен анимиран филм „Јон Вардар против галаксијата“ ја имаше својата светска премиера на 57. издание на „Ситџес фантастик филм фестивал“, еден од најголемите жанровски фестивали во светот.
Филмот во режија на Гоце Цветановски и во продукција на Алан Кастиљо од „Линкс студио“ беше прикажан во фамилијарната секција. Капацитетите на салата беа исполнети, главно со најмладата публика, која енергично ја дочека македонската анимација.
Режисерот Цветановски имаше кусо обраќање, при што на шпански јазик им кажа на децата дека се првите во светот што ќе го гледаат филмот, на што тие реагираа со воодушевување.
По настанот, Цветановски изјави дека фестивалскиот живот на „Јон Вардар против галаксијата“ почна возбудливо најавувајќи уште многу убави вести набргу.
„Премиерата ги оправда очекувањата. Ми беше драго што и децата и нивните родители уживаа во филмот и се смееја на глас. Во публиката запознав и Македонци од Барселона, кои допатуваа во Ситџес за да го проследат филмот. Ви благодарам многу што бевте дел од овој настан. Факт е дека со ‘Јон Вардар’ напишавме историја и верувам дека имаме производ со кој можеме да се гордееме. Одиме натаму, со нетрпение ја очекувам македонската премиера во ноември“, рече режисерот Цветановски.
Во рамките на фестивалот во Ситџес анимираниот филм ќе има уште една проекција следната сабота.
„Јон Вардар против галаксијата“ е хумористична приказна за еден натпросечно потпросечен човек, еден нарцисоиден робот и многу, многу, мнооооогу вонземјани, кои се на мисија да ја спасат галаксијата од самите себе.
Арт-директор е Михајло Димитриевски – Тхе Мичо, а директор на анимација е Димитар Ѓоргиев. Продуценти на филмот се Алан Кастиљо, Ева Конрад, браќата Калинови и Ладо Шкорин. Во главните улоги настапуваат Жарко Димоски, Дамјан Цветановски и Емилија Мицевска. Другите улоги ги толкуваат Филип Трајковиќ, Тони Денковски, Атанас Атанасовски, Слаѓана Вујошевиќ, Мартин Ѓоргоски, Елена Тарчуговска и Бојана Тосковска.
Анимираниот филм е изработен со поддршка од Агенцијата за филм, а има копродукции во Унгарија, Бугарија и во Хрватска.
Филмот од 1 ноември ќе се прикажува во киносалите во Македонија.
Култура
Театар Куманово настапи на фестивалот „MOST“ во Германија
Претставата на Кумановскиот театар „Прво лице еднина“ вчера вечер настапи на Интернационалниот камерен театарски фестивал во Германија, „MOST“ кој од први до шести октомври се одржува во Хановер.
На огромно задоволство на германската публика актерката Владанка Крстевски потполно ги освои нивните срца со емоцијата која ја прикажа преку монодрамата – Прво лице еднина, во која на маестрален начин прикажа дванаесет женски ликови со своите проблеми, лични ставови и карактери.
Режијата на претставата е на Драгана Гунин.
Актерката доби признание за исклучително моќно и емотивно прикажување на карактерите во претставата.
-Околу нас има многу жени кои секојдневно се борат и работат по 12 часа дневно. Тие жени жртвуваат се за своите семејства, за своите деца, за да обезбедат подобар живот, а никој не зборува за нив. Ова е претстава во која зборуваме токму за тие жени. Ние денеска сме ќерки, а утре ќе бидеме мајки и сакаме да имаме поддршка, бидејќи не знаеме кај ќе не однесе животот. Инспирацијата за мојот текст е од книгата „Добра ноќ за бунтовни девојчиња“, во која се зборува за жени кои направиле многу за сите нас, но останале на маргините на општеството, – раскажува младата актерка Владанка Крстевски, пренесува Кумановски театар.