Култура
Извонреден концерт на мастер поетот Боб Дилан
Без доцнење и точно во 20.30, без многу спектакуларности, живата легенда, култниот американски кантавтор, хуманист и поет Боб Дилан како најава за 50-тото издание на фестивалот Охридско лето, го започна својот концерт на Скопскиот Саем во Скопје.
Со својот бенд кој не го променил во изминатите пет години, гитаристите Сту Кимбал и Чарли Секстон, басистот Тони Гарнер, Џорџ Ресели (тапанарот) и Дони Херон кои беа облечени во стандардните костими, Дилан се појави со својата препознатлива каубој капа и започна извонредно да свири кантри, блуз и рок ен рол за македонската публика.„Метрополис арената“ беше специјално приспособена за концертот, со простор за седење и за стоење, во зависност од тоа кој колку платил за својата карта.Дилан пееше, свиреше електрична гитара, органа и хармоника, и иако понуди навидум камерна атмосфера, не треба да го заборавиме фактот дека 69-годишниот музичар е на турнеја без престан, односно на неверендинг-турнеја, од 1988 година. Публиката, која воглавно се состоеше од повозрасните обожаватели на легендата, уживаше во духот на „гуд ол американ мјузик“ што тој им го пренесе.Повторно, во Скопје, по илјадити пат, го оправда поетскиот лауреат Ендру Моушн (Andrew Motion), кога рече дека текстовите на Боб Дилан треба да се предаваат и учат во училиштата.На легендарниот музичар вчера на затворена церемонија му беше врачена и Специјална награда за придонес во поетското творештво, која ја доделуваат Струшките вечери на поезијата.Боб Дилан во просек одржува по 100 концерти годишно, а постојано работи и на нова музика. Роден е на 24 мај 1941 година, како Роберт Ален Зимерман. Во својата петдецениска кариера има објавено 34 студиски албуми, 10 со снимки од настапи и 12 компилации. Има добиено „Оскар“, „Златен глобус“ и „Греми“. Поротата на „Пулицеровата награда“ во 2008 година го награди со „специјален цитат“ заради неговото “длабоко и огромно влијание на популарната музика и врз американската култура со неговите лирични композиции и извонредна поетична моќ.“Денот по настапот во Скопје, Дилан со својата екипа ќе продолжи во Белград, каде на 6 јуни ќе настапи со свој концерт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Во МНТ репризно ќе се одигра балетот Чиполино
Во среда, 5 јуни, со почеток во 19:00, на големата сцена во Македонскиот Народен Театар, репризно ќе се изведе Балетот Чиполино, во продукција на Bullfrogs Ballet. Премиерата на Чиполино се изведе во јуни минатата година, во полниот салон на МНТ.
„Чиполино“, или „Момчето кромид“ е балет создаден по мотивите на бајките на Џани Родари, кој ја раскажува приказната за граѓаните зеленчуци и моќните владетели овошки во кралството Градина. Главната тема која се обработува се неправдите кон помалку моќните и важноста на пријателството во тешки периоди. Приказната е вистински приказ за важните вредности во животот – тимски дух, пријателство, меѓусебно помагање, верба и борба за правда. Иако балетот е најпрво создаден за млади, сепак изобилува со сериозна кореографија од класичниот балет.
Музиката е на Карен Качатуријан, кореографијата на Александра Никифоровски, според оригиналната кореографија на Хајнрик Мајоров. Подготовката на балетот е под палката на Никифоровски и Елена Митевска, заедно со Ангелина Беличевска како асистент на кореографија, додека актерската игра е под водство на Бојан Лазаров.
Главните улоги ќе ги одиграат Елена Василевска (Чиполино), Viola Imeri (Ротквица), Илин Јовановски (Господин Домат), Александра Никифоровски (Принц Лимон), Тодор Стојковски (Гроф Цреша), Јана Трпковска и Бистра Младеновска (Грофици Цреши). Ансамблот го сочинуваат младите балерини од Bullfrogs Ballet School, а во дел од улогите се појавуваат и актери од независната актерска сцена во Македонија.
Булфрогс Балет Продукција е основана од Александра Никифоровски во 2009 година, и веќе 15 години континуирано и успешно спроведува балетски програми за деца и млади, како и продукции од областа на изведбените уметности. Училиштето Булфрогс Балет, e првото интернационално приватно балетско училиште и спроведува високо квалитетна балетска настава за деца и млади по методот „Ваганова”, поделена на предбалетско, основно и средно образование. До сега во училиштето се едуцирани преку 1000 ученици.
Никифоровски има долгогодишно искуство како балетски педагог и кореограф. Нејзиното кореографско портфолио ги вклучува неокласичните балети „И жената знае да вози“, „Аметист“ и „Тесеракт“, мјузиклите „Моите песни, моите соништа“, и „Ени“ како и балетите „Тарантела“, „Лебедово езеро“, „Сон на летната ноќ“, „Танц на кадетите“. Александра е сертифициран предавач за техниката за балетски развој (ПБТ) и е магистрант на Факултетот за музичка уметност – отсек балетска педагогија.
Култура
Гала балетски концерт со најубавите балетски дела на 26 јуни на сцената на Националната опера и балет
На 26 јуни со почеток во 20.00 часот на сцената на Националната опера и балет ќе се оджи Гала балетски концерт, во рамките на фестивалот „Скопско лето“ 2024.
На концертот ќе настапат првенците, солистите, балетскиот ансамбл и оркестарот на Националната опера и балет, под диригентската палка на Бисера Чадловска, во режија на Олга Панго и Дејан Прошев, концерт мајстор е Климент Тодороски, а репетитори: Горан Божинов, Александра Мијалкова, Саша Евтимова, Дафина Данилоска Кочевска, Васил Чичиашвили и Наташа Јосифовска.
Гала балетскиот концерт ќе ги опфати најубавите балетски дела како „Лебедово езеро“ од П. И. Чајковски, „Дон Кихот“ од Л. Минкус, „Заспаната убавица“ од П. И. Чајковски, „Оревокршачка“ од П. И. Чајковски, „Рајмонда“ од А. Глазунов и многу други.
Култура
„Младите доаѓаат“ – концерт на новите музички таленти
Овој четврток (6 јуни) со почеток во 20 часот, Македонската филхармонија ќе го одржи традиционалниот концерт насловен „Младите доаѓаат“, посветен на новите музички таленти од земјава. Под диригентство на маестро Ангел Спироски, на концертот ќе настапат ученици од музичките училишта од Скопје, Струга, Охрид и Битола.
На програмата се инспиративни и комплексни дела од Ј. С. Бах (Двоен виолински концерт во d-moll), К. Дитерсдорф (Концерт за контрабас и оркестар бр. 2), С. Меркаданте (Концерт за флејта и оркестар бр. 2), К. Сен-Санс (Концерт за виолончело и оркестар бр.1), Д. Кабалевски (Концерт за виолина и оркестар во C-dur), К. М фон Вебер (Кончертино за кларинет и оркестар во Es-dur), Ф. Шуберт (Erlkönig), В.А. Моцарт (Концерт за пијано и оркестар во d-moll), Џ. Верди („Saper Vorreste“ – aрија на Оскар од операта „Бал под маски“) и Д. Шостакович (Концерт за пијано и оркестар бр. 2).
Ќе настапат учениците: Марија Џуклеска и Андреј Наумоски, виолини (проф. Милена Крстевска), Летиција Кондратенко, контрабас (проф. м-р Благој Маротов), Ана Матеска, флејта (проф. Александар Стефановски), Ева Малиновска, виолончело (проф. Маре Видевска), Виктор Србиноски, виолина (проф. Елица Рашкова), Александар Ристовски, кларинет (проф. Благојче Трајковски), Матеа Стојаноска, соло пеење (проф. Маја Митровска), Анастасија Петреска, пијано (проф. Татјана Божиновска), Анастасија Милеусниќ, соло пеење (проф. Александра Коцевска) и Џеврие Туле, пијано (проф. Весна Ангелова Христов).
Овие концерти се мошне интересни и секогаш оставаат силен впечаток, затоа што носат нова енергија, елан, ентузијазам, младешки дух, и ја најавуваат новата генерација македонски музички уметници.