Култура
Нов закон за авторски права
Предлог законот за авторски права генерално е позитивен и претставува пријатен новитет, но сепак има простор за мали подобрувања
Ова е еден од заклучоците на денешната расправа на собраниската комисија за култура, на чиј дневен ред се најде предлог законот за авторски и сродни права.Една од забелешките е и доработка на членот кој се однесува на авторски права за пренесување и дистрибуција на онлајн вести.„Во предлог законот се уште не постои јасна слика за некакви промени во заштита на информации кои се пренесуваат преку Интернет порталите. На овој начин ситуацијата не би се променила, што само по себе би довело до ист тек на функционирање, индивидуалци би ги злоупотребувале вестите за промоција на сопствените онлајн изданија, без наведување на оригиналниот извор и автор на веста“ вели Бојан Неделковски, претставник на иницијативата за воведување на заеднички принципи на работа на медиумите што имаат веб страници.Тој предлага и вестите кои се објавуваат на порталите да се сметаат за авторски дела.„Во еден член се наведува дека за авторско дело не се сметаат дневни вести од суров карактер. Тие кои што сме потписници на иницијативата, предлагаме и секојдневните вести кои што се објавуваат на онлајн порталите да се сметаат за авторски дела и да подлежат на одредени законски рамки, бидејќи сепак таа вест е подготвена од новинар. Целта на оваа расправа беше да бидеме конструктивни, и затоа и беа изнесени секојдневните и идните проблеми со кои би се соочиле во Интернет окружувањето“ вели Неделковски.На денeшната расправа учествуваа преставници на сите професионални здруженија на автори, авторски агенции и граѓански здруженија кои се занимаваат со проблематиката на авторските права, како и претставници на печатените и електронските медиуми.Потписници на иницијативата за воведување на заеднички принципи на работата на медиумите што имаат веб страници во однос на заштитата на нивните авторски права се „Форум“ и „Макфакс“, телевизиите А1 и А2, Алфа, Алсат, Канал 5 и Телма, дневните весници „Вест“, „Време“ , „Дневник“, „Утрински весник“, „Нова Македонија“, „Шпиц“, радиото Канал 77, порталите Иди Види , Инпрес и Нетпрес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.