Култура
Манаки – Ден четврти: Сепак се движи
Вчера од Битола си замина прославената шпанска артистка Викторија Абрил. Со својата весела природа и шарм ги освои и битолчани и гостите на фестивалот
Оваа харизматична актерка од голем калибар внесе свеж здив на јубилејното 30-то издание на фестивалот. Тоа што новинарите останаа без можност за поединечни интервјуа се должеше на нејзината желба (и на организаторот) да и овозможат за време на нејзиниот четиридневен престој темелно да ја запознае Македонија.Вчера, во документарната селекција беа прикажани два среднометражни филма од македонски автори: „Чедо“, на Аљоша Симјановски и ,,Оган и вода,, на Киро Урдин. Обата филмови се веќе наградувани на меѓународни фестивали а проекциите се одржаа во преполната мала сала на домот на културата и од присутните беа наградени со долготраен аплауз. Сепак, остана отворено прашањето зошто овие два филма не беа во натпреварувачката селекција!Вечерта од главната програма беа прикажани: Рускиот „Цар“ во режија на се поценетиот Павел Лунгин („Остров“) и непомалку значајниот кинематографер, американецот Том Стерн, човек кој е познат по соработката со Клинт Иствуд (,,Мистична река“, ,,Девојка од милион долари“, ,,Гран Торино“,). ,,Цар“, е филм за голготата на Рускиот народ под тиранијата на Иван Грозни (16 век). И покрај бројните масовни сцени ,,Цар“, според својата структура е крајно клаустрофобичен и камерен филм. Токму тоа им дало шанса на актерите (особено на главниот лик – Иван Грозни кој го толкува Пјотр Мамонов)да остварат блескави креации. Сценографијата, костимите и вкупната атмосфера на платното создаваат впечатлива ,,реалистичка илузија“. Оценка-8. Кандидат за награда.Вториот синоќешен филм „,Каталин Варга“ (Романија, Англија, Унгарија) може да се смета за успешно деби на англискиот режисер Питер Стрикланд. Визуелниот дел од филмот, дело на кинематограферот од Унгарија, Марк Гиур, е подобрата страна на ова остварување. Лично не би типувал за награда на овој филм Оценка-6.Денес не очекуваат мастеркласови со лауреатите Питер Сушицки и Били Вилијамс. Проекции на филмовите на кои тие се потпишани како сниматели, ќе има во петок („,Валентино“, 1977 г., Сушицки) и во сабота (,,На златното езеро“, 1981г., Вилијамс).Инаку, дилемата како е можно четиричленото фестивалско жири да донесува одлуки во парен состав, е решена така што претседателот на жирито во случај на спорни 2:2 има право на уште еден глас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.