Обвинувањата на опозицијата и манипулациите за безбедносната состојба во земјава се само евтина политичка реторика која се користи за затскривање на безидејноста на оваа политичка група.

Ова во интервју за Прес24 го истакнува министерката за внатрешни работи, Гордана Јанкулоска, која оценува дека СДСМ манипулира со неколку случаи на убиства кои полицијата експресно ги расчистила. Според Јанкулоска, мафијашките пресметки од времето на СДСМ се далечно минато за Македонија.

„Ниту еден од овие случаи не ја тангира општата безбедност, иако јавноста со право е вознемирена по секоја ваква сторија. Сепак, времето на мафијашки пресметки и масовна изнуда и рекет, за време на владеењето на СДСМ е далеку зад нас. Впрочем, тоа го говорат и бројките. Точно дека за првите осум месеци имавме 19 убиства, што е зголемување во однос на минатата година, но јавноста треба да знае дека лани имавме рекордно мал број убиства, односно само 20. Оваа бројка убиства ја немало уште од 1980-те години, односно од поранешна СФРЈ. За волја на вистината, од 2006 година кога ја презедов функцијата, бројот на убиства континуирано се намалува од 42 на најниските 20 во текот на 2013-та. Доволно е само да се направи споредба со показателите од времето на СДСМ. Имено, во 2002 година се регистрирани 65 убиства, во 2003 неславен рекорд од 75 убиства, во 2004 имало 56 убиства, а во 2005 – 53 убиства. Кога на тоа ќе се додаде  пониската ефикасност во периодот до 2006 година, станува јасно колку СДСМ и нивните експерти се компетентни да зборуваат за безбедносната состојба“, истакнува министерката Јанкуловска.

Во моментов можноста од ширење на фундаментализмот не претставува голема опсаност, смета Јанкулоска и додава дека полицијата има редовни контакти со сите служби во регионот и пошироко, и на дневно ниво разменуваат информации кои би можеле да бидат од значење за земјите од регионот.

„Доколку има потреба, подготвени сме да реагираме на соодветен начин, бидејќи поседуваме и знаење и човечки потенцијал“, тврди Јанкулоска и додава дека министерството, резултати по однос на ова прашање, очекува од засилените санкциите кои се спроведуваат за учесниците во паравоени формации надвор од земјава.

„Ги следам размислувањата на експертите, но ценам дека наместо бавење со црни сценарија и ширење дефетизам или лоши предвидувања, би било многу пожелно кога истите би се ангажирале на продлабочивање и на меѓуетничките и на меѓурелигиозните врски. Впрочем нашата иднина зависи од нас. Кај нас постои една лоша навика доколку се случи каков и да е инцидент меѓу лица со различна етничка припадност, истиот веднаш да се припишува на припадноста на различните етнички или религиозни групи. Како да не може да постои некој друг мотив или причина. Како да не се случуваат исти такви инциденти и меѓу лица од иста етничка заедница“, одговара министерката на прашањето за предупредувата на експертите дека во Македонија се продлабочуваат етничките разлики по неколкуте меѓуетнички инциденти кај младите.

Јанкулоска смета дека е добро што поглаварот на Исламската верска заедница (ИВЗ) почнал отворено да зборува за она за што во минатото го негирал и дека соработка со ИВЗ постои, но дека полицијата може да реагира во рамки на нејзините ингеренции.

Министерката во интервјуто изразува охрабрување до поглаварот на ИВЗ и натаму да продолжи низ процедурите да ги посочува настанатите проблеми./крај/мф/ап