Економија
НБМ ја спушти прогнозата за раст, ја качи за инфлацијата
Народната банка на Македонија (НБМ) во четвртокот изврши надолна ревизија на проекцијата за раст на економијата, а од друга страна направи нагорна корекција за стапката на инфлацијата за оваа и наредната година.
Според најновата проценка на НБМ, Македонија во 2012 година ќе оствари нулта стапка на економски раст, односно ќе стагнира, додека во за наредните две година се очекува економијата да заживее и да биде остварен раст од 2,6 отсто во наредната година и 3,4 отсто во 2013 година.Во претходната проекција, НБМ прогнозираше дека македонската економија годинава ќе оствари раст од еден отсто, а за наредната година се очекуваше раст од три отсто.Гувернерот Димитар Богов појасни дека надолната ревизија се должи на негативните ефекти од странство.„Остварени се дел од ризиците за влошување на глобалниот економски амбиент, поради што се влошени перспективите за домашната економска активност и затоа е направена надолна ревизија на проекцијата за БДП“, изјави Богов.Тој наведе дека во 2013 и 2014 година се очекува постепено закрепнување, при што се очекува заживување на домашната побарувачка, пред се кај инвестициите, а се очекуваат и позитивни ефекти од структурните промени.Гувернерот сепак, укажа дека економијата ќе биде под потенцијалот и во текот на наредната година, главно под влијание на странската побарувачка.НБМ изврши нагорна ревизија на инфлацијата за 2012 и 2013 година од 2,2 отсто на 3,5 отсто, како краткотраен ефект, со очекување за стабилизација во 2014 година.Поголеми промени во дефицитот на тековната сметка не се очекуваат, иако е извршена надолна ревизија на капиталните текови за 2012 година и се очекува влошување на тековната сметка за 2013 година.Салдото на тековна сметка годинава се очекува да биде во минис 2,8 отсто од БДП, од што трговскиот биланс ќе биде во минус 22,5 отсто, а нето тековните трансфери во плус 20,2 отсто.За наредната година се очекува дефицитот во тековната сметка да биде минус 3,8 отсто, пред се поради очекувањата за намалување на капиталните приливи.Кредитниот раст во 2012 година се проценува на околу седум отсто, а во наредните две години се очекува умерено забрзување, при натамошен раст на депозитите и расположивите средства, истакна Богов.Гувернерот информираше дека нефункционалните кредити се зголемиле на 10,6 отсто, но изрази уверување дека не треба да се очекува натамошен раст на лошите пласмани.Запрашан да даде коментар за промашувањето во проценките за економскиот раст, со оглед на тоа што НБМ на почетокот на годината предвидуваше раст од три отсто за 2012 година, а владата дури 4,5 отсто, Богов рече дека погрешиле и сите странски релевантни институции, што се должи на големата неизвесност и несигурност во глобални рамки.„Проекциите ги промашија и ММФ, Светската банка, Европската централна банка, најголемите централни банки во светот, како и аналитички куќи чии проекции ги користиме за растот на економиите во нашите најголеми трговски партнери. Така е кога неизвесноста е голема, кога се менуваат околностите од ден за ден, на финансиските пазари владее исклучително голема несигирност, а инвестиорите не знаат каде да ги вложат парите. Тоа е нормална пракса“, изјави Богов. /крај/со/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Нови цени на бензинот и дизелот од полноќ
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 0,29 % во однос на одлуката од 27.5.2024 година.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,467%, кај дизелот за 0,878%, кај екстра лесното масло за 1,614% и кај мазутот зголемувањето е за 2,412%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,056%
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на ЕУРОДИЗЕЛ (Д-Е V) се намалуваат за 0,50 ден/лит.
Малопродажната цена на Екстра лесното масло за домаќинство на (ЕЛ-1) се намалува за 1,00 ден/лит.
Малопродажната цена на Мазутот М-1 НС се зголемува за 0,756 ден/кг.
„Напоменуваме дека ова се максималните цени на нафтените деривати од 00:01 часот на 4.6.2024 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Новиот газда на „Еуроникел“ на вработените им нуди минимални плати: Ако не потпишете ќе увеземе работници од Косово
Новите газди на кавадаречки „Еуроникел индустри“ на досегашните вработени кои останаа без работа им понудиле договори за вработување со минимални плати. Вработените се жалат дека никој од околу 600 луѓе засега не потпишал нов договор оти сите плати се многу пониски од ланските.
„Засега никој не е согласен со понуденото. Платите се движат од 22.000 до 26.000 денари. Луѓе што се претставуваат како менаџери на фабриката отворено ни кажуваат -ако не потпишете ќе увеземе работници од Косовио, тие ќе бидат задоволни. Само за споредба, платите во фабриката лани почнуваа од 29.000-30.000 илјади па нагоре“, се пожали вработен во „Еуроникел“.
Игор Ѓерасов, претседател на Синдикатот на индустријата, енергетиката и рударството на Македонија (СИЕР) потврди дека понудените плати се ниски, и дека на вработените им се врши притисок да ги потпишат.
„ Точно е дека има луѓе кои притискаат вработените да ги потпишат договорите оти во спротивно ќе донесат работници од ‘Фероникели’ од Косово, која исто така не работи. Никој досега не потпиша таков договор. Ние како Синдикат ќе бараме повисоки плати за сите вработени. Нашето барање е платите да бидат околу 40.000 илјади денари, колку што бил просекот во фабриката минатата година додека се работеше“, вели претседателот на Синдикатот, Ѓерасов за „Макфакс“.
Синдикални претставници и некои од вработените денес очекуваат средба со новите сопственици на фабриката на која ќе разговараат за платите.
Поради ненаплатени побарувања, Комерцијална банка ја презема фабриката „Еуроникел“ и на крајот на март, годинава, ја продаде на друштва основани до холандската холдинг-компанија „Полиникел холдинг БВ“, која е дел од групацијата „Јилдирим“.
Новите сопственици, веднаш откога ја купија фабриката, на Синдикатот му најавија дека на сите вработени ќе им дадат можност да се вратат на работа во рок од 90 дена и дека со производство планираат да почнат во јуни.
Претседателот на Синдикатот, Ѓерасов, сега вели дека тие рокови не е возможно да се испочитуваат оти се уште не се потпишани договорите, а производството, доколку успеат да ги склучат договорите, најрано би почнало во септември.
Фарук Беќири, кого вработените во „Еуроникел“ го посочуваат како нов директор на фабриката, не одговори на прашањата од „Макфакс“ за притисоците врз вработените и понудените минимални плати.
Од околу 600 вработени, во фабриката останаа да работат 120 работници потребни за одржување на печката, но и тие велат дека не би потпишале да работат за понудената плата.
На почетокот на февруари годинава беше отворена стечајна постапка за „Еуроникел“ во која вработените имаат побарувања од 2,1 милион евра за неисплатени плати.
Градоначалникот на Кавадарци, Митко Јанчев, кој беше вклучен во преговорите за последната продажба на фабриката, најави дека по завршување на стечајната постапка ќе поднесе кривични пријави против раководството на „Еуроникел индустри“ кое минатата година ја доведе фабриката до стечај.
Економија
Семеен ден на Макстил со децата поддржани од СОС Детско село
На традиционалниот семеен ден на Макстил годинава се приклучија 20 згрижувачки семејства со 60тина деца од СОС Детското село. Од оваа година Макстил стана нов стратешки партнер на СОС Детско село и зеде под закрила една од згрижувачките куќи, обезбедувајќи целосно покривање на трошоците за пет деца и нивното згрижување во текот на цела година.
„Макстил и СОС Детско село, сега се еден вид семејство и соодветно беше нашиот семеен ден да го поминеме со новите членови на семејството. Оваа година одржувањето на традиционалното дружење на вработените на Макстил со семејствата се совпадна токму со Меѓународниот ден за згрижувачки семејства, што го направи за нас овој ден посебен. Да се градат семејни вредности, да се поддржуваат ваков тип проекти за нас е многу повеќе од зборови, и повеќе од финансиски средства. За нас оваа соработка претставува поддршка на згрижувачките семејства, децата и младите и воедно градење на основи за здраво и праведно општество за идните генерации. Со ова наше стратешко партнерство сакаме да покажаме дека со поинаков пристап може навистина да се направи голема промена“, изјави Марија Дуковска – Павловска, генерален директор на Макстил.
Повеќе од 600 вработени и нивните семејства, заедно со децата поддржани од СОС Детско село го поминаа саботното попладне пред Управната зграда на Макстил, при што беа спроведени семејни и спортски активности и различни тематски работилници, а можеа да проследат и интерактивна музичко-драмска претстава, групно танцување и да уживаат во настапот на музичкиот бенд.
„Големо беше изненадувањето и радоста по добивање на поканата од нашиот партнер Макстил за приклучување на нивниот семеен ден за нивните вработени и тоа токму на денот на згрижувачите. Со радост ја прифативме оваа можност дел од семејствата поддржани од СОС Детско село да бидат присутни на овој преубав и забавен настан. За едно дете да расте среќно, задоволно, исполнето и за да напредува натаму во животот, неопходна му е поддршката која што ја добива во семејството. Многу деца во светот не се во можност да живет со своето семејство и имаат потреба од алтернативна грижа што значи сместување на оваа ранлива група на деца во други семејства. Овој ден ги слави хероите кои одлучиле да ги отворат своите срца и домови и живеат една хумана мисија и се грижат за овие деца со многу љубов, толеранција и поддршка. Благодариме на Макстил се надеваме дека овој пример ќе го следат и други компании“, изјавија од СОС Детско село.
1 јуни е Ден на згрижувачките семејства. Од самото основање до денес, СОС Детското село посветено работи на обезбедување квалитетна алтернативна грижа за деца без родители и родителска грижа и своето успешно 23 годишно искуство го заокружува со развој на иновативна програма за поддршка на згрижувачките семејства. Новата унапредена услуга за стручна помош и поддршка на 74 згрижувачки семејства и сигурно опкружување за вкупно 140 деца и млади се обезбедува преку Центарот за поддршка на згрижувачки семејства.
(ПР)