Жестоки борби се водат во неделата во југозападните предградија на северниот град Алепо, трет ден од почетокот на офанзивата на опозициските бунтовници кои ги поддржуваат САД и радикалните исламистички групации чија цел е да се прекине блокадата на градот од страна на владините сили, при што е употребено и хемиско оружје.

„Во ракетирањата загинале најмалку 38 цивили а ранети се 250 откако бунтовниците истрелаа стотици ракети и гранати од петокот врз западните квартови на Алепо“ кои од почетокот на војната во март 2011 година се под контролана владините сили, ја пренесува AFP изјавата на опозициската Сириска опсерваторија за човекови права (SOHR) чие седиште е во Лондон

Покрај тоа, повеќе од 64 бунтовници и најмалку 55 припадници на владините сили и сојузничките милиции загинале во судирите, според SOHR кој се потпира врз информациите од својата мрежа активисти во бунтовничките и медицинските кругови.

Владините сили, пак, тврдат дека во последните три дена во обидот на бунтовниците да ги деблокираат своите соборци во источните квартови на Алепо, биле убиени околу 500 милитанти, пренесува панарапската телевизија Al Mayadeen чие седиште е во либанската престолнина Бејрут.

Медиумите пренесуваат дека најжестоки борби се водат во Дахиџет ал-Асад, југозападно од Алепо, каде што во петокот бунтовниците напредуваа, но подоцна беа потисната од владините сили.

Службената новинска агенција SANA пренесува дека терористите, како што се нарекуваат сите бунтовнички групи кои се борат против владата на претседателот Башар ал-Асад, „квартот Хамданија го гаѓале со проектили во кои имало отровни гасови, при што едно лице е умрено а пријавени се 35 случаи на труење, односно грчење на мускулите и ширење на зениците“,

Директорот на Универзитетската болница во Алепо,Ибрахим Хадид, во изјава за сириската државна телевизија ги обвини бунтовниците дека употребиле хлор.

Провлдадин воен извор за AFP рекол дека бунтовничката офанзива е „сеопфатна и добро координирана“, но дека бунтовничките борци не напредувале, освен незначително во квартот Дахиет ал-Асад. „Користат ракети ГРАД и самоубиствени автомобили бомби, а учествуваат и странски борци“, додал.

Специјалниот претставник за Сирија на Обединетите нации, Стефан де Мистура, изјави во неделата дека е „ужаснат и згрозен“ од количеството гранати и ракети коишто вооружените опозициски групи неселективно ги истрелувале врз цивилните населби во западно Алепо во последните 48 часа.

Во соопштението објавено во Женева, де Мистура додава дека веродостојните информации говорат за „голем број загинати цивили, меѓу кои повеќето се деца, и за стотици ранети“.

„Оние коишто мислат дека вака ќе ја пробијат опсадата на источно Алепо, мора да знаат дека ништо не го оправдува прекумерното и неселективно користење на оружјето, па и тешкото, во секторите во коишто живеат цивили, што би можело да се смета за воено злосторство“, додава специјалниот пратеник на ОН.

Покрај тоа ја повтори осудата на ОН поради неодамнешните напади врз училишта во двата дела на Алепо. „Цивилите во двата делови од градот доволно пателе поради стерилните, но смртоносни обиди да се заземе Алепо“, заклучи./крај/мф/сн

Извор: Макфакс