Култура
Во Старата скопска чаршија обновена фасада од крајот на XIX век
Старата скопска чаршија полека го враќа својот сјај и значењето кое го имала во минатото за скопјани, а во петокот беше преставена и завршената третата фасада на објектотот на улицата „Подграѓе“ бр. 57 кој поттекнува од крајот на XIX и почетокот на XX век.
При изведбата на работите се користени наоди од локацијата и фотодокументација, како и други сознанија од лица и институции со цел да се постигне автентичност на изгледот.
Станува збор за проект кој се изведува со поддршка на Министерството за култура со кој се обновуваат фасадите на објекти во старото градско јадро, со што се задржува автентичноста и карактеристичниот стил.
Мминистерката за култура Елизабета Канческа- Милевска истакна дека според акциониот план на Министерството на култура обновата на фасадите во Старата скопска чаршија ќе продолжат и натаму.
„Ова е веќе третата фасада која што е обновена. На четвртата веќе од следната седмица ќе почне да се работи, веќе е изберен изведувач, а во тек е процедура на добивање на изведувач на тендер за петтата фасада, шестата фасада е фасадата на Националниот конзерваторски центар“, истакна министерката
Канческа-Милевска притоа посочи дека обновата на старите фасади се реализира преку Националниот конзерваторски центар.
„Ме радува што старата скопска чаршија повторно го добива својот автентичен, карактеристичен стил на архитектура. Имаме фасада каде што архитектонскиот стил и сјај е повторно вратен, а потекнува од крајот на XIX и почетокот на XX век. Со носењето на Законот за Старата скопска чаршија како значајно споменично јадро целта ни беше да ги обновиме фасадите и да дадеме согласно програмата за ревитализација промовирање и на туристичкиот, културниот и архитектонскиот аспект, кој што го поседува Старата скопска чаршија“, рече Канческа-Милеска.
Посочи дека министерството поддржува и бројни културни настани кои се одржуваат токму во Старата скопска чаршија се со цел да се оживее ова место.
„Тука имаме вкрстување на најразлични цивилизации, на најразлични култури и тоа е богатството значајно за старата Скопска чаршија. Продолжуваме со сите оние проекти кои што се наоѓаат во насока на ревитализација на Старата скопска чаршија. Ме радува што има голема раздвиженост, голема посетеност и од туристи и од наши граѓани“, рече министерката Директорката на Конзерваторски центар Скопје Ема Петрова информира дека почнуваат активности за обнова на четвртата планирана фасада, на објектот Евлија Џелеблија или познатиот бојаџија во Старата скопска чаршија.
„Годинава ќе се реализира и уште еден објект на улицата Теодосиј Гологанов, а во тек се подготовки за јавната набавка за споменикот на култура црквата Свети Спас, каде е сместен Националниот конзерваторкси центар“, рече Петрова.
Следната година освен обновата на фасадата на црквата „Свети Спас“, Конзерваторскиот центар Скопје, според најавите, треба да изработи уште пет проекти за обнова на нови фасади во Старата скопска чаршија./крај/мф/сс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Лена и Владимир“ награден на Julien Dubuque International Film Festival
13. издание на Меѓународниот филмски фестивал Julien Dubuque (JDIFF) ги објави своите победници, a „Лена и Владимир“, во режија на Игор Алексов, ја однесе дома главната награда за најдобар долгометражен игран филм.
На фестивалот, кој се одржа од 24-28 април во Дубјук, Ајова, беа прикажани преку 150 филмови од целиот свет, вклучително и 31 долгометражен филм во конкуренција, а филмот „Лена и Владимир“ на фестивалот го промовираа актерот Тони Наумовски и режисерот Игор Алексов.
„Лена и Владимир“ е приказна за двајца бегалци од општеството кои доживеале огромна трагедија, а чии патишта случајно се вкрстуваат. Тие наоѓаат утеха и поврзаност, формирајќи врска што им носи исцелување. Филмот е финансиски поддржан од Агенцијата за филм на Македонија и Филмскиот центар на Србија (Терирем продукција).
Главните улоги ги толкуваат: Сара Климоска и Тони Наумовски, а во филмот се појавуваат и Дениз Абдула, Луран Ахмети, Петар Мирчевски, Петре Арсовски, Благоја Чоревски, Kирил Коруновски. Сценариото е на Александар Русјаков. Продуценти се Дејан Илиев (ДМФ Филм) и Илија Циривири (МИНД Продукција). Кинематографер е Душан Кардалевски, сценографијата е на Влатко Зафирковски, а монтажер е Мартин Иванов, Музиката е на Дарко Спасовски и Горан Керкез, костимограф е Раде Василев, дизајнер на маска е Горан Игњатовски, а кастинг директор е Катерина Грубач.
Култура
Отворање на прославата за 50-годишнината на Францускиот институт и затворање на 20. „Танц-фест“ со танчарската претстава „Мозаик“ на светски познатиот кореограф Мурад Мерзуки
Францускиот институт во Скопје и „Танц-фест“, по повод отворањето на прославата на 50 години постоење на Францускиот институт во Скопје и затворањето на јубилејното 20. издание на „Танц-фест“, го најавуваат ексклузивното гостување на француската театарска група „Кафиг“ со танцовиот перформанс „Мозаик“, в петок, 17 мај 2024, со почеток во 20 часот, во Македонскиот народен театар.
Кореограф на претставата е Мурад Мерзуки, еден од најзначајните кореографи со светско реноме денес, кому француската влада му ја довери кореографијата на официјалната церемонија на отворање на Олимписките игри 2024, со наслов „Танцот на игрите“.
Всушност, по огромниот успех на танцовиот перформанс „Пиксел“ во 2017 година во рамките на „Танц-фест“, Мурад Мерзуки и групата „Кафиг“/Käfig се враќаат во Скопје со најновиот танцов спектакл „Мозаик“.
На настанот збор ќе земат: Иго Бештел, директор на Францускиот институт во Скопје, и Рисима Рисимкин, директорка на „Танц-фест“.
Билетите за претставата се достапни на веб-страницата на Македонскиот народен театар.
Во фоајето на МНТ исто така ќе биде поставена ретроспективната изложба „50 години Француски институт во Скопје“, која го прикажува дејствувањето на Францускиот институт во текот на изминатите педесет години.
Култура
Награда за „Бизнисот на задоволството“ на фестивалот во САД што ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.