Македонија
Тодоров вети инвестиција од 900.000 евра за болницата вo Кавадарци
Кавадаречката општа болница ќе добие плус уште една операциона сала, ќе добие компјутерска томографија, ќе добие две интензивни неги и на тој начин ќе делува како центар во целиот овој регион, за сите пациенти коишто имаат сериозни здравствени проблеми коишто треба да бидат третирани во општата болница во Кавадарци, изјави за Телевизија Нова вицепремиерот и министер за здравство Никола Тодоров.
„Имајќи предвид дека во Кавадарци ќе набавиме нов апарат за компјутерска томографија, имајќи предвид дека се договоривме да се стават во функција две нови интензивни неги и тоа една интернистичка интензивна нега и една хируршка интензивна нега, имајќи предвид дека се договоривме да се направи нова операциона сала, затоа што во опремата што треба да се набави се предвидува и набавка на операционен стол со светло и да се изведе централен довод на медицински гасови, практично комплетно го подигаме нивото на кавадаречката болница“, рече Тодоров.
Актуелниот министер за здравство нагалси и дека инвестицијата во кавадаречката болница ќе чини околу 900.000 евра.
„Никогаш порано овде немало такво нешто. Со неговата набавка, Кавадарци ќе стане центар во овој дел на државата, каде ќе се изведува оваа дијагностичка процедура, која е од исклучително големо значење“, нагласи Тодоров.
Истакна дека со менаџментот на болницата, докторите и началниците на одделенијата, разговарале за функционирањето на јавната здравствена установа, за можната локација каде што ќе биде сместен компјутерскиот томограф, а било разгледано кои се активности треба да бидат преземени од страна на менаџментот на болницата, со цел да се остварат сите претпоставки за негова инсталација.
На еден начин, појасни, тоа ќе овозможи брза реакција на здравствените работници и брз пристап на пациентите до компјутерскиот томограф.
„Ова е особено важно, затоа што при сите итни случаи од сообраќајки или мозочни удари, има потреба од ваков тип на дијагностика. Практично ќе добиеме еден сериозен ургентен центар, бидејќи договоривме покрај компјутерскиот томограф, да се направат и интернистичка и хируршка интензивна нега, да се отпочне со проект за воведување на централни медицински гасови. Со тоа комплетно ќе се подигне нивото на целата болница и услугите кои ќе се даваат во неа“, рече министерот.
Тодоров потенцираше дека станува збор за сериозен износ на финансиски средства кои ќе бидат вложени. Според него, сето тоа ќе значи сериозно подигнување на квалитетот на установата, имајќи предвид дека ќе се набават апарати кои досега ги немало, а за кои има сериозна потреба.
„Ќе се набават автоклави за стерилизација, нешто што е многу значајно во здравствениот сектор, затоа што така се намалуваат интерхоспиталните инфекции, се олеснува целокупната работа на болницата. Ќе се набават колоноскоп, респиратор, нов операционен стол со светло. Бидејќи се набавува нов стол и нов анестезиолошки апарат, се договоривме да направиме уште една операциона сала. Сега има една сала за општа хирургија. Сакаме да направиме уште една, што ќе биде комплетно опремена со нова опрема“, рече Тодоров.
Потсети дека неодамна во болницата бил набавен и ставен е во функција нов мамограф.
„Тој претставува сериозно подигнување на нивото на болницата, тоа е во функција на сите пациентки, но и во функција на мамографскиот скриниг, имајќи предвид дека ракот на дојка е најчесто малигно заболување кај женската популација“, рече Тодоров.
На средбата било разговарано и за бројот на пациенти, за идни планови околу функционирањето на болницата, а сето тоа со цел унапредување на квалитетот на здравствените услуги кои се даваат во таа јавна здравствена установа./крај/мф
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Андреј Темов од Кисела Вода стана државен шампион во тенис до 12 години
Кисела Вода доби државен шампион во тенис! На Државно првенство на Македонија за јуниори до 12 години, кое се одигра денес, титулата најдобар ја понесе Андреј Темов, ученик од ООУ Круме Кепески.
Градоначалникот Ѓорѓиевски кој го бодреше, му ја честиташе победата и му посака понатамошни успеси. Му укажа дека и понатаму може да смета на поддршката која ја добива од Општина Кисела Вода и дека покрај финансиска поддршка, тој и сите други талентирани спортисти, можат да сметаат и на одлични услови за развивање на своите спортски потенцијали.
– Голема е мојата радост што денес нашата општина, Кисела Вода доби државен шампион во тенис до 12 години. Андреј Темов, кој честопати бил гостин во мојот кабинет, покажа како се креираат резултати кога некој е силно посветен на она што го сака. Овој извонреден успех е доказ за неговата посветеност, труд и талент, и ни покажува дека иднината на спортот во нашата општина е светла. Имав чест и привилегија лично да го бодрам Андреј на овој важен настан и од срце му ја честитам победата. Неговата истрајност и желба за успех се инспирација за сите нас. Како градоначалник на Општина Кисела Вода, сакам да му посакам понатамошни успеси и да го охрабрам да продолжи да го следи својот сон.
Општина Кисела Вода ќе продолжи да го поддржува Андреј и сите други талентирани спортисти. Како и досега, ќе обезбедуваме финансиска поддршка, но и одлични услови за развивање на спортските потенцијали. Силно верувам дека со правилна поддршка и инвестиции во изградба на спортската инфраструктура, нашите млади спортисти ќе можат да постигнуваат уште поголеми успеси и да ја претставуваат нашата општина и држава на највисоко ниво. Честитки уште еднаш на Андреј Темов! Нека оваа победа биде само една од големата низа на успеси, изјави градоначалникот Орце Ѓорѓиевски.
Македонија
Дарко Костадиновски нов претседател на Уставниот суд
Судот информира дека денеска судијата Дарко Костадиновски е избран за нов претседател на Уставниот суд на Република Северна Македонија.
Од таму додаваат дека повеќе информации ќе бидат соопштени во текот на денот.
Костадиновски ќе ја наследи својата колешка Добрила Кацарска, чиј мандат како претседателка на Уставниот истече на 2 јуни.
Македонија
„ЈК Травел“ и СОС Детско село потпишаа договор за продолжување на кампањата „Ти летуваш – ‘ЈК Травел’ донира на СОС Детско село“
ЈК Травел и СОС Детско село, потпишаа договор за продолжување на кампањата „Ти летуваш, ЈК Травел донира на СОС Детско Село“.
И оваа година, ЈК Травел, како општествено одговорна компанија, и лидер на пазарот во туризмот, се обврза да донира средства за СОС Детско Село, со секој уплатен аранжман, а воедно со тоа да даде и директна поддршка на сите деца и згрижувачки семејства од оваа институција.
„Благодарност до нашиот партнер ЈК Травел што втора година ја реализира оваа кампања. За нас од СОС Детско село ваков тип на кампањи помагаат во зголемување на свесноста за нашата кауза кај пошироката публика но и претставува важна потпора за обезбедување на квалитетна поддршка на над 75 згрижувачки семејства и над 120 деца и млади..”- велат од СОС Детско село.
ЈК Травел, оваа година го слави својот осумнаесети роденден, а кампањата одлучи да ја започне со потпишување на договор за донација на СОС Детско Село со секој уплатен туристички аранжман.
„На овој начин сите лојални клиенти кои низ изминативе осумнаесет годините летуваат со ЈК Травел се директни поддржувачи на оваа донација, за што сме искрено благодарни“ – изјавија од ЈК Травел.
Кампањата е предвидено да трае три месеци, со што се опфаќа и летната туристичка сезона кога има најголем број на туристички аранжмани, а донацијата ќе биде од помош за СОС Детско Село, институција која на многу пати покажала дека хуманоста и грижата за децата значи основа за унапредување на општеството и воспоставува стандарди кои се за восхит.
Воедно, ова е повик и до останатите компании од Македонија да се вклучат активно во поддршката на здруженијата кои имаат потреба од помош, бидејќи заедно можеме да изградиме подобар свет за нашите деца, да промовираме хумани вредности и грижа како темел на успехот на сите нас.
ПР