Рускиот министер за надворешни работи Сергеј Лавров и американскиот државен секретар Џон Кери уште еднаш телефонски разговарале за нормализација на ситуацијата во сирискиот северен град Алепо, соопшти во неделата руското министерство за надворешни работи, додека продолжува офанзивата на сириските владини сили и сојузничките милиции со поддршка на руската авијација и освојуваат нови стратешки позиции во истоимената покраина.

„Беа разгледувани можните заеднички чекори за нормализација на ситуацијата во Алепо, како и работата во Советот за безбедност на ОН во врска со севернокорејскиот проблем, како и одделни аспекти на билатералните односи“, се наведува во соопштението на руското министерство за одбрана кое го цитира агенцијата РИА во врска со разговорот од саботата ноќта.

Истовремено силите на сириската влада помогнати од локалните милиции и доброволци, како и од руските воздушни удари, продолжуваат со офанзивата чија цел е да се преземе целосно контролата врз Алепо, односно неколкуте квартови кои уште се под контрола на бунтовниците.

Овој втор по големина град во Сирија и нејзина финансиска престолнина од 2012 година е поделен на западните квартови кои ги контролираат владините сили провладините сунитски и христијански и алавитски милиции, и околу една третина од градот кој е под контрола на опозициските бунтовници кои се измешани со екстремните исламистички групи. Овој град со стратешка позиција, стана клучен фронт за натамошниот тек на сирискиот конфликт кој започна во март 2011 година и во кој според ОН досега загинале над 300.000 луѓе.

Сириската армија и борците на курдските Единици за заштита на народот (YPG) успешно во неделата извеле операција во северозападниот дел од покраината Алепо, заземајќи ја од бунтовниците индустриската зона во близина покраинската престолнина, пренесе службената новинска агенција SANA.

„Сириските сили и курдските единици успеаја да го скршат отпорот на терористите и ја ослободија индустриската зона Шкејф на северозападот од Алепо, и со тоа го истиснаа непријателот уште подалеку од северната рута за снабдување на Алепо“, изјавиле сириски воени извори.

Курдските сили ја потврдиле операцијата и соопштиле дека со владините војска извршиле напади истовремено од две насоки. Во моментов силите вршат чистење на објектите во заземената зона, се додава во соопштението.

Потиснувањето на бунтовничките сили од Шкејф следеше откако владините сили претходно ги ослободија болничкиот комплекс Кинди и палестинскиот бегалски камп Хандарта северозападно од Алепо, кои се во непосредна близина на северниот магистрален пат преку кој се снабдува градот.

Според ОН и Западот кој ја поддржува сириската сунитска вооружена опозиција, во офанзивата на сириската војска која започна на 22-ри септември во бомбардирањата загинале десетици цивили. ОН во неделата соопшти дека цивилите кои трпат од бомбардирањата на Алепо се соочени со „ниво на дивјаштво кое не треба да го доживее ниедно човечко суштество“, пренесува AFP.

Координаторот на ОН за итна помош Стивен О’Брајан повика на итна помош за да престанат бомбардирањата во Алепо. Тоа е „пекол на земјата“, рече.

Додаде дека во веќе катастрофалната ситуација со медицинската помош во бунтовничките квартови во Алепо, во кој можеби уште има 250.000 луѓе кои не успеале да се извлечат преку коридорите кои во август и септември ги отвори сириската армија, во саботата по вторпат седмицава била погодена најголемата болница во тие квартови,

„Здравствениот систем е сведен на нула“, рече О’Брајан, додавајќи дека болниците биле гаѓани една по друга. Ги повика завојуваните страни да овозможат евакуација на цивилите на кои итно им е потребна помош. И резервите од вода и храна се многу мали, додаде./крај/мф/сн

Извор: Макфакс