Свет
Oпозицијата му префрла на Шврговски за пријателството со Мијалкови
Најголем хендикеп за Љупчо Шврговски е пријателството со браќата Мијалкови и неговата инволвираност во случајот „Национална платежна картичка“, потенцираат високи функционери на СДСМ откако Владата го номинира за функцијата државен јавен обвинител и ја проследи на верификација во Собранието.
КАТИЦА ЧАНГОВА
Најголем хендикеп за Љупчо Шврговски е пријателството со браќата Мијалкови и неговата инволвираност во случајот „Национална платежна картичка“, потенцираат високи функционери на СДСМ откако Владата го номинира за функцијата државен јавен обвинител и ја проследи на верификација во Собранието. „Шврговски нема етички капацитет да биде државен обвинител кој ќе одолее на политички притисоци. Не смеел да прифати работа на предмет што директно се однесува на негови пријатели. Без оглед на одлуката тој не можел да биде објективен“, коментираат во најголемата опозициска партија чии пратеници во дебатата за изборот се подготвуваат да пукаат токму на овие пунктови.
Актуелниот заменик-јавен обвинител од скопското јавно обвинителство вчера не сакаше да излегува со никакви коментари во јавноста, се’ до завршување на процедурата во парламентот. Сепак, веднаш по објавувањето на кандидатурата од Владата, Шврговски изјави дека дваесетгодишното познанство и дружењето со браќата Мијалкови, во гимназија и на факултет, не можело да му биде хипотека во работата. Како заменик-јавен обвинител пред неколку години ја одбил иницијативата на Државната комисија за спречување на корупцијата за испитување неправилности во работењето на Национална платежна картичка, додека директор бил неговиот пријател Владо Мијалков. Шврговски тврди дека станувало збор за неправилно спроведен јавен тендер во кој утврдил дека немало криминал. За високи функционери во СДСМ е несфатливо зошто Шврговски не оформил обвинителен акт за политички атрактивниот и контроверзен предмет „Национална платежна картичка“. Токму ваквото постапување на Шврговски, сметаат во опозициската партија, било решавачко Владата да му се реваншира со кандидатура за врховен обвинител. Опозицијата се противи на изборот на обвинител по стар закон што „го обојува оној што ќе седне на таа фотелја“. Оттаму потенцираат дека имало доволно време да се донесе закон за јавно обвинителство што произлегува и од уставните измени во сферата на судството.
Убеден во својата способност, стручност и компетентност, кандидатот за јавен обвинител во изјава за дневен весник тврди дека на престижната, но одговорна и тешка функција, подложна на политичка и јавна критика „ќе стапел без никаков партиски и политички багаж“. Тој ги демантира тврдењата дека бил близок до високи партиски структури од ВМРО-ДПМНЕ. Предлогот за избор на државен обвинител, по барање на Владата е предвиден како дополнителна точка за собраниската седница закажана за 24 јануари-среда. Дали е некаква коинциденција, но и за изборот на Прчевски, претходникот на Шврговски, законодавниот дом дискутираше на 25 јануари, среда, но во 2003 година. „Човек со големо искуство во Обвинителството и директен предлог од министерот за правда“, беше кусиот коментар на премиерот Никола Груевски непосредно откако Владата го обелодени предлогот за Шврговски. Кандидатот за кого коалициските партнери во власта немале никакви забелешки неодамна изјави дека со премиерот речиси и не се познавал, во животот се сретнале само еднаш и дека не му бил должник.
Во образложението на Владата зошто се одлучила за кандидатот се вели дека Шврговски е дипломиран правник со положен правосуден испит и повеќе од 17 години работа во судството и јавното обвинителство. „Тој веќе 10 години со успех ја извршува функцијата заменик -јавен обвинител на Основното јавно обвинителство – Скопје и во својата работа се стекнал со углед и знаење што е гаранција за успешно вршење на функцијата“. Во биографските податоци за Шврговски стои дека е роден во Велес во 1960, на Правниот факултет во Скопје дипломирал во 1986 и до 1997 година работел како приправник и стручен соработник во Општински суд Скопје 1. Од 1997 е заменик-јавен обвинител.
За јавноста е познат по тоа што беше застапник на обвинението за судскиот процес Арачиново, ги гонеше четворицата обвинети за „Раштански Лозја“ и поднесе обвинение против Ламбе Арнаудов, Љупчо Мешков и Војо Михајловски. „Навистина во државава селективно се применува законот и мене многу ме боли тоа“. Ова признание на актуелниот кандидат за државен јавен обвинител, дадено во декември 2004 пред Судскиот совет на Основниот суд Скопје 2, на рочиште за „Раштански Лозја“ предизвика громогласен аплауз и емотивни реакции на роднините и пријателите на четворицата обвинети во овој случај. Шврговски, всушност, реагираше на прашање од второобвинетиот, поранешниот командант на „лавовите“, Горан Стојков, кој побара од обвинителот и судот јавно да кажат зошто законот се применува селективно, и зошто е важечки за „нив“, а не се применува „за оние во Кондово“. „Не е случаен фактот што ги водев најсложените случаи, тоа зборува за мојата стручност. Арачиново беше тешко за докажување, бевме свесни дека може да паднеме, но ете повторно се вративме во игра. Случајот „Раштански Лозја“ првично не го водел, не бил вклучен во истрагата, потоа се повлекол, па затоа не можело да се каже дека го загубил. Третиот случај со Арнаудов, Мешков и Михајловски е одложен на неопределено време.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Потона брод во близина на брегот на Црното Море, се трага по исчезнатите членови на екипажот
Романските спасувачки тимови денеска трагаа по тројца исчезнати членови на екипажот на товарен брод што потона во близина на брегот на Црното Море, соопштија поморските власти.
Информациите кои ги добиле се дека рано утрината дека бродот „Мохамад З“ под знаме на Танзанија потонал на 26 наутички милји од дунавското село Сфанту Џорџ.
Во потрагата и спасувањето биле вклучени Морнаричкиот центар за координација на спасување (МРЦЦ), граничната полиција и два блиски комерцијални брода.
Засега не се познати причините поради кои бродот потонал.
Европа
Шолц ја откажа изборната кампања и ги посети поплавените региони во Германија
Германскиот канцелар Олаф Шолц денеска ги посети поплавените региони во западната германска сојузна покраина Сарланд, каде обилните дождови предизвикаа поплави и лизгање на земјиштето, а неколку згради беа евакуирани.
Шолц ја откажа својата изборна кампања во Сар, на границата со Франција, и наместо тоа, го обиколи делумно поплавениот пат во селото Клајнблитерсдорф заедно со регионалниот гувернер Анке Релингер.
Тој ја потврди солидарноста на сојузната влада со Сарланд.
„За жал, не е првпат да треба да се справиме со голема природна катастрофа, па ќе разгледаме што треба да се направи овде и што е неопходно“, им рече Шолц на новинарите.
Службите за итни случаи одговорија на илјадници повици за помош во главниот град на покраината, Сарбрикен.
Регион
Во Будва уловена сина ајкула тешка 200 килограми
Сина ајкула долга повеќе од три метри и тешка 200 килограми е уловена во Будва.
Уловите на сина ајкула од минатите години покажуваат дека овој вид ајкула најчесто се среќава во Јадранското Море на пролет.
Рајко Бојановиќ, член на спортскиот риболов клуб „Ширун“, улови ајкула и рече дека ќе биде препарирана во Природонаучниот музеј на Црна Гора, а изложбата е планирана за септември.