Свет
Северна Кореја го призна неуспешното лансирање на ракетата
Севернокорејските власти признаа дека ракетата со долг дострел во петокот наутро не успеала да го постави сателитот во орбитата, додека американски и јужнокорејски функционери тврдат дека таа се урнала во морето само неколку минути по лансирањето.
Северна Кореја тврди дека ракетата со долг дострел триесетметарска од тимот Unha-3 (Galaxy-3) која наводно требаше во орбитата на Земјата да постави метеоролошки сателит, не успеала да стигне до орбитата, потврдувајќи ги тврдењата на соседните земји коишто претходно во петокот наутро објавија за неуспешното лансирање на севернокорејската ракета.
„Сателитот чијашто намена беше следење на одредени делови од површината на Земјата за цивилни цели, не успеа да влезе во орбитата. Научниците, техничарите и другите експерти сега се обидуваат да ги откријат причините за неуспехот за лансирањето“, соопшти севернокорејската државна телевизија, пренесува Reuters.
Неуспехот на лансирањето на ракетата се толкува како голем неуспех за севернокорејскиот комунистички режим, кој со лансирањето сакаше да ја одбележи стогодишнината од раѓањето на првиот лидер и втмелувачот на комунистичка Северна Кореја, Ким Ил-Сунг.
Аналитичарите оценуваат дека јавното признание за неуспешното лансирање е невообичаено за режимот во Пјонгјанг, кој за 23-те милиони жители исклучиво дозволува достап до информациите што ги пласираат државните медиуми, Слично неуспешно лансирање на ракета со долг дострел Северна Кореја според западни извори имаше и во 2009 година, но тогаш властите тоа го прикажаа како успешно.
Со лансирањето на ракетата Северна Кореја прекрши неколку точки од неодамнешниот договор за помош во храна постигнат на преговорите во кинеската престолнина Пекинг со претставници на САД, како и санкциите воведени за Пјонгјанг од страна на Обединетите нации. САД, Јапонија и Јужна Кореја го критикуваа овој потег на Северна Кореја, додавајќи дека ќе ја засилат меѓусебната соработка кога станува збор за нуклеарната програма на Северна Кореја и нејзините чести пробни лансирања на балистички проектили./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Данскиот министер: Изненадени сме од најавата на Трамп за царини
Данскиот министер за надворешни работи, Ларс Леке Расмусен, ја нарече изненадување најавата на Доналд Трамп за воведување царини и нагласи дека Данска е во тесна комуникација со Европската унија по ова прашање.
„Најавата на претседателот доаѓа како изненадување“, наведе Расмусен во писмена изјава. Тој во средата се сретнал со американскиот државен секретар, со кого, меѓу другото, разговарале и за несогласувањата меѓу Данска и САД во врска со Гренланд.
Трамп како оправдување за заканата со царини ја наведе испратената воена помош на неколку европски земји на Гренланд. Меѓутоа, Расмусен го отфрли тоа објаснување.
„Целта на зголеменото воено присуство на Гренланд, на кое се повикува претседателот, е токму зголемување на безбедноста на Арктикот. Во постојан контакт сме со Европската комисија и со нашите други партнери по тоа прашање“, се наведува во изјавата на данскиот министер.
Свет
Зеленски: Русија подготвува удари врз нашите нуклеарни постројки
Украинскиот претседател Володимир Зеленски изјави дека Русија се подготвува за понатамошни напади врз украинската енергетика и инфраструктура, вклучително и објекти што ги опслужуваат нуклеарните електроцентрали, пренесе „Би-Би-Си“.
„Извештај од началникот на Главната разузнавачка управа Олег Ивашченко. Пред сè, во врска со конкретните задачи за руската армија. Не сме регистрирале подготвеност од страна на агресорот да почитува какви било договори или да ја прекине војната. Но, има доволно информации за подготовка на понатамошни руски удари врз нашиот енергетски сектор и инфраструктура, вклучително и објекти и мрежи што ги опслужуваат нашите нуклеарни електроцентрали“, изјави украинскиот претседател по средбата со началникот на Главната разузнавачка управа Олег Ивашченко.
„Украина е исклучително конструктивна во дипломатијата, додека Русија е фокусирана единствено на напади и вознемирување на луѓето. Нашите партнери треба да ги извлечат соодветните заклучоци од тоа“, додаде Володимир Зеленски.
Свет
Дански генерал: Денес не гледаме закана од Русија или Кина
Највисокиот дански воен заповедник за Арктикот ги отфрли тврдењата дека Гренланд се соочува со непосредна безбедносна закана од Русија или Кина, со што го оспори наративот што повеќепати го изнесуваше американскиот претседател Доналд Трамп. Генерал-мајор Сорен Андерсен, командант на Данската здружена арктичка команда, ги опиша сојузничките вежби во регионот како превентивна мерка, пренесе Политико.
„Не. Денес не гледаме закана од Кина или Русија“, изјави Андерсен, кој е на чело на командата од 2023 година.
„Но ги истражуваме потенцијалните закани и се подготвуваме за нив.“ Тој нагласи дека засилените воени активности на Данска и нејзините сојузници околу Гренланд претставуваат подготовка за идни непредвидени ситуации.
Според неговите зборови, кога ќе заврши војната во Украина, Москва би можела да ги пренасочи своите воени ресурси кон други региони. „Всушност очекувам да видиме руски ресурси кои се префрлаат од боиштата околу Украина на други боишта“, рече тој, укажувајќи на Балтичкото Море и арктичкиот регион.
Во рамки на данската вежба „Операција Арктичка Издржливост“, која опфаќа воздушни, поморски и копнени компоненти, веќе се распоредени единици од неколку европски земји.
Изјавите на Андерсен се во спротивност со тврдењата на Доналд Трамп дека Гренланд е под активен притисок од Русија и Кина и дека островот е клучен за националната безбедност на САД. „Имате руски разурнувачи и подморници, како и кинески разурнувачи и подморници насекаде“, им рече Трамп на новинарите, коментирајќи ја својата намера Гренланд да стане дел од Соединетите Американски Држави. „Нема да дозволиме тоа да се случи.“
Трамп исто така изјави дека Вашингтон не може да ја исклучи употребата на сила за да ги обезбеди своите интереси, што предизвика загриженост кај данските и гренландските лидери.

