Македонија
Сексуалните и здравствените права на лицата заразени со ХИВ/СИДА во Република Македонија
Во хотелот „Холидеј Ин“ денеска со почеток во 11 часот, се одржа панел дискусија на тема „Сексуалните и здравствените права на лицата заразени со ХИВ/СИДА во Република Македонија“ каде беше изнесена состојбата на овие лица и третманот на институциите на државата кон нив
Дискусијата беше во организација на „Коалицијата за заштита и промоција на сексуалните и здравствените права на маргинализираните заедници“ и „ Х.Е.Р.А. Асоцијација за здравствена едукација и истражување“. Дел од учесниците во дискусијата беа Славчо Димитров, претставник на „Коалицијата за заштита и промоција на сексуалните и здравствените права на маргинализираните заедници“, Жарко Трајановски, истражувач и колумнист, Стефан Стојановиќ и др. Дискусијата настана како резултат на „Годишниот извештај за здравствените права на маргинализираните заедници„ и потребата од борбата со стигматизацијата и дискриминацијата на лицата заразени со ХИВ/ СИДА. Се разговараше за огромниот број на повреди на правата кај лицата со ХИВ, особено правото на пристап до здравствени услуги, правото на приватност и доверливост на податоците кои најчесто се идентификувани во рамки на здравствените институции. Делумно ова се должи на фактот што најголем број од овие лица го обелоденуваат својот статус само пред здравствените работници. Авто стигмата и чувството на изолираност и отфрленост е во голема мера изразена кај лицата кои живеат со ХИВ/СИДА и се манифестира преку губење на желба да се живее нормален живот, од избегнување на секојдневните социјални активности до откажување од сексуалниот живот и планирање на родителството.Постои огромен недостаток на легални процедури за спречување на дискриминацијата и кршењето на човековите права на маргинализираните заедници. Во Македонија исто така нема социјални бенефиции за лицата со намалена работоспособност меѓу кои спаѓаат и лицата заразени со ХИВ. „Законите немаат само функција да не казнуваат туку и да не заштитат и да бидат ставени во функција на одредени проблеми“ изјави Жарко Трајановски. Во законот за анти-дискриминација чија потреба од што поскоро донесување е очигледна, мора да бидат експлицитно споменати лицата со ХИВ/СИДА и другите маргинализирани заедници како сексуалните работници, хомосексуалците, зависниците од дрога итн. „Приоритетот во однос на правата е правото на живот и правото на лекување“, подвлече Стефан Стојановиќ. Заедницата на лицата кои живеат со ХИВ има потреба да се организира, да ги гради своите капацитети и да започне да делува и во делот на планирање и во делот на имплементирање на програмите за ХИВ/СИДА во Македонија. Концептите дека „ова не може да ми се случи на мене“ се глупави. Хомосексуалци отсекогаш имало и ќе има, ХИВ СИДА имало и ќе има, зависности постоеле и ќе постојат, сега останува на сите нас да се погрижиме како за себе, така и за следните генерации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На граничните премини од македонска страна нема подолги задржувања
АМСМ информира дека на граничните премини од македонска страна, нема подолги задржувања за влез и излез од државата.
Како што стои во соопштението, сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Купови со отпад на паркингот кај гробиштата во Бутел
Повторно купови со отпад на паркингот кај гробиштата во Бутел.
Поранешниот директор на АД „Пошта“, Јани Макрадули на својот Фејсбук профил објави фотографија од состојбата на гробиштата. Како што вели, ова е тажна слика за еден град кој системски се уништува.
Македонија
Земјава нема развиен концепт за менаџирање со дијабетесот, вели Велев
Во организација на Сојузот на здруженија на дијабетичари и Здружението на лица со дијабетес „Алегрија“, денеска во Градскиот парк во Скопје под мотото „Сѐ за нас – за нас“, се одржа едукативен настан за подигнување на свесноста за тоа како живеат лицата со дијабет.
Претседателот на Здружението на лица со дијабетес „Алегрија“, Диме Велев, рече дека со реализацијата на проектот се укажува дека лицата со дијабетес се нормални луѓе кои што се дел од заедницата и се придонесува кон уривање на стереотипите кои постојат за лицата со дијабетес.
„Почнавме реализација на проект за подигнување на свеста за користење на новите во технологии во менаџирање со дијабетесот, пред сѐ „CGM“ системите или системи за континуирано мерење на гликоза, за новите технологии во делот на апарати со дигитална размена на податоци, како и за рушење на стереотипите за тоа дека лицата со дијабетес се нешто посебни, тие се многу нормални луѓе кои што се во заедницата“, рече Велев.
Посочи дека целта на целиот проект е да се убедат властите дека луѓето кои што користат „CGM“ системи се работноспособни и присутни во заедницата, како и да се освестат за потребите на луѓето дека имаат многу кратко време за навремена реакција. Вели земјава нема примена на доволно развиен концепт на менаџирање со дијабетес.
„Сѐ уште имаме пречки, затоа што ние немаме доволно луѓе кои што се поставени на „CGM“ системи, во Македонија немаме примена на доволно развиен концепт на менаџирање со дијабетес. Кога сето тоа ќе се воведе, ќе се изгради сета таа нова дијабетес култура, дека е многу нормално да се користи, дека е многу поквалитетно да се користи, тогаш нема да има потреба од нови правила за некое право на човек со дијабетес после пет минути да отиде настрана да касне нешто или да се освежи и да се врати на работа или на училиште“, рече Велев.
Преку интерактивен собир, денеска лицата со дијабетес ТИП 1, особено младата популација до 25 години, имаше можност да се потсети на основните постулати при секојдневното живеење со дијабетес.
На настанот беа поставени штандови со глукомери и ленти за мерење на нивото на шеќер во крвта, како и штандови со корпи и обучени лица на кои граѓаните имаа можност да видат колку јаглехидрати содржи секое овошје или зеленчук.