Владата треба да ја преиспита и поништи донесената одлука за интегрирање на Универзитетска клиника за ортопедски болести во новата Клиника и да продолжи според предвидената програма за реформи во здравството.

Владата треба  да ја преиспита и поништи донесената одлука за интегрирање на Универзитетска клиника за ортопедски болести во новата  Клиника и да продолжи според предвидената програма за реформи во здравството.

Ова во понеделникот преку отвореното писмо го побара  Стручниот колегиум и вработените на Универзитетска клиника за ортопедски болести-Скопје.

Создавањето на нова Универзитетска клиника за трауматологија, во чиј состав влегуваат Универзитетска клиника за трауматологија, Универзитетска клиника за ортопедски болести , ЈЗУ КАРИЛ – Скопје и ургентен центар – Скопје во никој случај не претставува спој на установи кои се бават со сродна дејност, се вели во соопштението.

Вработените на Универзитетска клиника за ортопедски болести сметаат дека  новоформираната установа нема да доведе ниту до поефикасна работа на овие клиники ниту до намалување на трошоците за работа.

„Напоменуваме дека клиниката за ортопедски болести нема никакви побарувања ниту долгови кон другите три установи. Искористеноста на операционите сали и другите капацитети на клиниката за ортопедски болести е  од 80-90 % и е во светските рамки по глава на жител и покрај константно намалување на буџетот“, стои во соопштението.

Во реакцијата се укажува дека интеграцијата со другите три клиники „ќе претставува огромен проблем за набавка на специфичните медицински материјали потребни за обавување на дејноста на клиниката за ортопедски болести, што ќе довело до пад на квалитетот на услугите на пациентите, како и до зголемување на листите на чекање“.

Наспроти овие тврдења, министерот за здравство Бујар Османи вели дека новата Клиника нема да предизвика укинување на ниедна сегашна дејност на посебните Клиники што ја сочинуваат новата здравствена установа, ниту укинување на соодветните катедри на Медицинскиот факултет.

Османи во петокот попладне оствари телефонски разговор со Претседателот на Асоцијацијата која ги обединува ортопедите и трауматолозите,  Златко Темелковски, при што било заклучено дека стравувањата од дисконтинуитет во дејноста  се неосновани.

Министерот Османи нагласил дека единствено нешто што со одлуката за формирање на нова Клиника ќе се смени е начинот на администрирање и управување со Клиниката што би требало да придонесе кон поедноставување на процедурите при организација на работата на инаку сродните медицински дејности, што може да се види и од начинот на кој тие се организирани во единствена Асоцијација на ортопеди и трауматолози.

Претставници на министерството за здравство се очекува деновиве да остварат средба со претставници на четирите Клиники на која ќе бидат појаснети сите аспекти поврзани со формирањето на новата Клиника. /крај/со/ап/