Македонија
СДСМ: Груевски да каже кој точно од опозицијата ги прави меѓуетничките инциденти
Опозициската партија СДСМ го повика премиерот Никола Груевски точно и прецизно јавно да соопшти кој од опозицијата ги прави меѓуетничките инциденти.
Опозициската партија СДСМ го повика премиерот Никола Груевски точно и прецизно јавно да соопшти кој од опозицијата ги прави меѓуетничките инциденти.
„Е па премиере Груевски, претеравте! Ова нема да дозволиме да Ви помине тукутака! Има точно и прецизно јавно да соопштите на кого мислевте вчера, на поединци во СДСМ, во ДПА, ВМРО-НП, ОМ, ЛДП, НСДП, НДП или некој друг во опозицијата?“, изјави потпретседателот на СДСМ, Гордан Георгиев.
Тој наведе три примера за меѓуетнички тензии каде, според СДСМ, ВМРО-ДПМНЕ и ДУИ се главни актери и иницијатори.
„Пред точно една година се случи инцидентот на скопското Кале каде заменик министерот на МВР вадеше лисици и ги ослободуваше уапсените. Тогаш ДПМНЕ преку ден градеше, а ДУИ навечер рушеше. Пред пет месеци пропадна пописот со сериозни обвинувања од Никола Груевски дека се случил фалсификат. Се случија инцидентите во Струга каде на двете спротивставени страни стојат градоначалниците Рамиз Мерко од ДУИ и Перо Илиевски од ВМРО-ДПМНЕ“, рече Гоерогиев.
Според него, и по 12 месеци нема одговорни за инцидентот за Калето, по пет месеци ги нема фалсификаторите на пописот и по две седмици ги нема вандалите од Струшко.
Георгиев тврди дека СДСМ не е вмешана во инцидентите и вели дека сиве овие тврдења се лаги.
„Што се однесува до извесниот Артан Груби, вмровец на привремена работа во ДУИ, сакам да го соопштам следново: Господинот Груби треба да знае дека за груби игри се потребни двајца. Затоа, нека престане кукавички да се крие во кабинетот на Али Ахмети, да излезе и да каже со кого тоа ги правел инцидентите на скопското Кале, и како после тоа заслужи да стане шеф на кабинетот на Али Ахмети и иден пратеник? Во спротивно, најмалку што очекуваме од Али Ахмети е да покаже свест за важноста на меѓуетничките односи, веднаш да го разреши овој човек и да се огради од неговите потпалувачки ставови“, вели Георгиев.
По меѓуетничките тенизии во Струшко, непристојните пароли на црквите и џамиите, во неделата премерот Груевски изјави дека ваквите настани се плод на опозицијата која на ваков начин сака да ја придобие поддршката на граѓаните.
„Она што јас можам да го проценам е дека ова е плод на партиски мотивирани лица од опозицијата коишто не гледаат како на друг начин да ги освојат симпатиите на граѓаните, туку одат на картата дека ако го компромитираат работењето на сегашните владејачки партии, преку создавање на конфликти во општеството, дека на тој начин ќе ги привлечат симпатиите на граѓаните и дека граѓаните ќе се разочараат од владејачките партии и ќе се свртат кон одредени опозициски партии“, изјави вчера Груевски./крај/со/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Да излеземе да гласаме, за да не можат да не’ уценуваат никогаш повеќе
Претседателот на ВМРО-ДПМНЕ, Христијан Мицкоски вечерва порача дека изборите се финална одлука за тоа дали Македонија ќе биде вратена назад на народот или ќе остане киданапирана во рацете на стотина луѓе.
„Да ја отфрлиме апатијата и цинизмот и наместо тоа да ја прифатиме моќта на нашиот колективен глас да донесе значајни промени. Заедно надминавме безброј предизвици, преживеавме бури и напредувавме со непоколеблива решителност. И сега, додека стоиме на прагот на новото поглавје во приказната на нашата нација, да го искористиме овој момент со храброст и со одлучност. Пријатели, браќа и сестри, Нашата победа е на дофат. Но, не е доволно само да веруваме во подобро утре. Мора да дејствуваме. Мора да се мобилизираме. Мора да гласаме. За да немаат можност да нѐ уценуваат никогаш повеќе! Ве повикувам да излезете на избори со гордост и со одлучност“, порача Мицкоски.
Како што додаде, сите сме свесни во каква состојба е државата и што се случува околу нас. Оправдано, вели Мицкоски, многумина од вас велат ја изгубивме државата, затоа што гледаат дека институциите не функционираат, ја препознаваат корупцијата која е широко распространета, знаат дека политичарите не мислат на нив, туку само на себе.
„Тоа мора да престане. Мора да престанат разочарувањата и поделбите.Затоа што, има само една Македонија. Нема социјал-демократски планини, и вмро-вски реки, нема градови и села на дуи, или на алијанса и беса, или алтернатива, нема езера на левица или на Знам, тоа е една единствена Македонија. Нема социал-демократска или вмровска Македонија. Има само една Македонија. И ова е говорено многупати претходно но никој ништо не превзел. И се додека тоа не го сфатиме сите, и одговорно се однесуваме кон тоа, затоа што е крајно време, и ова е ми се чини и нашата последна шанса, се до тогаш, не е можен просперитет. Мора да сфатиме дека има само една Македонија и сите сме нејзин составен дел и дека таа не е ништо без нас и ние без нејзе, и дека од тоа каква е и каква ќе биде, зависат нашите животи и животите на идните генерации“, порача Мицкоски.
Македонија
Сиљановска-Давкова до младите: Не бегајте од Македонија, на 9 мај ќе почне нова демократска македонска историја
На 8 мај мора да ја повторите лекцијата од 24 април. Да научат како се однесува народот. Мора да им одржиме лекција дека народот легитимира, народот делегитимира. На овие избори се случува чудо, не доаѓаат само реки од народ од Македонија, туку и нашите Македонци од странство. На младите им порачувам, не бегајте од Македонија, не одете си! На 9 мај ќе почне нова демократска македонска историја. Ќе имаме нова одговорна власт, порача на митингот во Прилеп, кандидатката за претседателка поддржана од ВМРО-ДПМНЕ, Гордана Сиљановска-Давкова.
„Немојте да дозволите оние кои повикуваат на бојкот да ви го суспендираат избирачкото право. Тоа е ваше! Излезете и гласајте! Така ставате камче во новиот темел на демократска Македонија! Надежта ја гледам секој ден на лицата на младите, кај возрасните! Знаат дека се ближи ново време, ново македонско доба во која улога ќе имаат сите без оглед на припадноста. Времето на знаење, ум, креација доаѓа! Вие го направивте правиот избор на 24 април. Не се сомневам дека нема да го бојкотирате она што е ваше, избирачкото право. Сигурна сум дека ќе го направите вистинскиот избор на 8 мај. А потоа, заедно ќе го славиме Денот на победата над фашизмот. Тој ден ги обедини сите и повторно сите ќе не обедини. Ама сега за повисоки цели. За право и правда! За држава каква што заслужувате! Ве молам размислете, ние немаме друг избор. Македонија! Македонија вечна! Македонија сме ја наследиле, ќе ја оставиме на идните поколенија! Македонија горда! Како што се гордеам јас на Ченто, да се гордеете вие на вистинските чекори што сте ги направиле на 24 април и на 8 мај“, порача Давкова.
Македонија
Таравари: Ветувам дека кога ќе ја формираме Владата ќе трчаме уште посилно отколку во кампањата
„Со верба ветувам дека јас и сите челници на ВЛЕН кога ќе ја формираме Владата ќе трчаме уште посилно отколку во кампањата“, ова беше првото јавно ветување што Арбен Таравари го даде на големиот митинг во Тетово, додавајќи дека по 8ми мај нема да им биде удобно во кожните фотелји, туку ќе работат уште повеќе за сите.
Таравари нагласи дека иако имал многу понуди од Али Ахмети, тој избрал да биде со народот.
„Не сакам да се задржам многу. Оваа кампања беше незаборавно искуство за мене! Најдов пријатели и тим како ВЛЕН, видов и предавство од некои, кај кои како и кај секој предавник останува само сенка, но во повеќето најдов многу верба и храброст! Имав многу понуди од Али Ахмети, понуди на кои некои мои сопартијци не можеа да одолеат… но јас избрав да бидам ти. Горд сум што го направив овој избор и нека ни е Среќна Победата!“ – истакна Таравари.
Убеден во победата, Таравари рече дека Историската промена ќе остане запаметена како Револуција на светлата.
„Сега сè започна со некои светла од мобилни телефони, кои се палеа дури и кога режимот викаше дека ги гаси светилките на народот… овие светилки се спротивставија… се зголемија и денес тие се светлината на слободата што ја дигнаа земјата на нозе! Сега ги поканувам моите колеги од ВЛЕН на сцената и сакам сите да се фотографираат со вашите светла и да знаат сите дека оваа Историска промена ќе биде запаметена како Револуција на светлата. Господ да ве благослови!” рече Таравари во своите завршни зборови пред илјадници граѓани во Тетово.