Македонија
Задолжително ќе се контролираат издувите на возилата на технички преглед
Подобрување на функционирањето на станиците за технички преглед, техничките служби и органот за одобрување, предвидуваат измените и дополнувањата на Законот за возила, усвоени на владината седница од 03 јуни.
Министерот за економија Беким Незири во петок одржа прес конференција на која ги претстави измените и дополнувањата на Законот за возила.
Истовремено, со измените се овозможува поефикасен надзор врз спроведувањето на Законот за возила и подзаконските акти кои произлегуваат од страна на Министерството за економија и Министерството за внатрешни работи.
Министерот Незири истакна дека во овој Предлог закон, изработен во соработка со сите технички служби и инволвираните страни, се земени предвид сите недостатоци воочени во претходниот период, во насока на зголемување на ефикасноста во работењето на службите, скратување на роковите, намалување на трошоците за сопствениците на трактори, зголемување на безбедноста на возилата и на заштита на животната средина.
„Со законот се пропишани одредби кои покрај другото предвидуваат скратување на рокот за издавање на одобрение за единечно возило од 15 на 7 работни дена, со што ќе се зголеми ефикасноста во работењето на органот за одобрување, а истовремено се воведуваат заштитени обрасци на кои ќе се печати Потврдата за сообразност и Согласноста за регистрација, со што ќе се спречи можноста за нивна злоупотреба“, рече министерот Незири.
Министерот за економија објасни дека со измените се овозможуваат и значителни финансиски олеснувања за земјоделците и сточарите, бидејќи наместо досегашната нивна обврска за регистрирација и технички преглед на тракторите секоја година, сега тие имаат обврска регистрацијата да ја извршат на секои шест години, а прегледот за техничка исправност на тракторот на секои две години.
„Со измените на законот, во насока на заштита на животната средина, воведовме облигаторно мерење и контрола на издувните гасови на возилата од страна на станиците за технички преглед, при постапката за проверка на техничката исправност на возилата, пред да се изврши регистрација на возилата. Досега, пак, контролата се вршеше инцидентно, само во случај на сомнеж, а измерените податоци не се внесуваа во Регистарот на возила. Сега записите од измерените вредности на мерењето на издувните гасови, се воведуваат како задолжителни документи при регистрација на возилото“, објасни Незири.
Министерот за економија информираше и за одредбите кои ќе придонесат за зголемување на безбедноста на возилата во кои е вграден уред за погон на течен нафтен гас, при што надлежноста за давање на овластување на правните лица кои вршат вградување на ваков уред сега ќе ја има Министерството за економија, наместо Министерството за внатрешни работи. Со оваа измена, од страна на Техничката инспекција ќе се врши евидентирање и контрола на правните лица кои вградуваат вакви уреди, ќе се процени нивната стручност и материјално технички услови, што досега не било случај.
„Покрај ова, многу често во пракса бевме сведоци на колони од по 100-150 возила за технички преглед во техничките служби, во еден ден, што претставува навистина нереална бројка за да се добие реална слика за техничката исправност на возилата. Затоа, со законот утврдивме техничкиот преглед на возилата да трае најмалку 10 минути за патничките автомобили и 20 минути за автобуси и товарни возила, притоа пропишувајќи висока глоба за правното и одговорното лице доколку истото не врши технички преглед согласно временската рамка. Сметам дека ова ќе овозможи техничкиот преглед да биде извршен во целост и не дава можност возила кои се технички неисправни да бидат регистрирани“, потенцираше министерот за економија. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Ковачевски: Поддршката за домашните компании продолжува, СДСМ нема да се откаже од подобра и европска иднина за државата
Претседателот на Социјалдемократскиот сојуз на Македонија, Димитар Ковачевски, денеска оствари средба со претседателот на Стопанската комора на Северозападна Македонија, Менди Ќура, и со членовите на комората, на која што се разговараше за ефектите од досегашните економски мерки, за идните мерки на СДСМ, како и за нивните предлози, за тоа што е потребно да се направи во следниот период за развој на приватниот сектор и економијата.
Ковачевски по средбата, во изјава за медиуми, речедека со сите стопански комори досега имало успешна соработка, потенцирајќи дека и во време на најтешки кризи се Владата предводена од СДСМ, носеше правилни мерки за заштита на економијата, ликвидноста на компаниите и стандардот на граѓаните.
„Во тоа време направивме девет пакети антикризни мерки, во кои што учествуваа секогаш и претставниците на Стопанските комори, вклучително и Стопанската комората на Северозападна Мкаедонија. На тој начин успеавме да спасиме 80.000 работни места во 20.000 компании. Подоцна продолживме со зголемување на минималната плата, за која што секогаш имаше поддршка од оваа комора меѓутоа и од другите, и до зголемување дојде и на просечната плата“, рече Ковачевски.
Во однос на поддршката за домашните компании, Ковачевски посочи дека тоа е еден од приоритети на СДСМ и дека преку Законот за финансиска поддршка на инвестиции, домашните компании за прв пат добија поддршка од држвата, која со новата четиригодишна програма на СДСМ и Коалицијата за европска иднина, ќе се зголеми.
„Во текот на изминатите години, како Влада имаме обезбедено 100 милиони евра финансиска поддршка за домашните компании. За наредниот четиригодишен мандат, планираме над 180 милиони евра, што ќе отвори нов циклус на инвестиции кај домашните компании“, рече Ковачевски.
На средбата, како што кажа Ковачевски, се разговарало и за клучните реформи во државата кои што се поврзани со евроатлантските интеграции на Северна Македонија, при што Ковачевски потенцираше дека СДСМ како партија не се откажува од интегрирањето на државата во ЕУ, согласно со преговарачката рамка која што е усвоена.
„Веќе оваа недела ќе биде усвоена реформската агенда која што е дел од Планот за раст на Западен Балкан, во кој што точно ќе бидат наведени реформите кои што ќе треба да се прават со цел да се повлекуваат траншите за Македонија. Тоа ќе бидат реформи во сите области од економијата, јавната администрација до правосудството и добрососедските односи“, истакна Ковачевски.
При тоа, Ковачевски потенцираше дека најголем дел од предлозите на Стопанската комора на Северо-западна Македонија, кои што беа дадени уште пред изборите, се веќе имплементирани во четиригодишната програма на СДСМ и Коалицијата за европска иднина.
„Значи тоа зголемување понатамошно на минималната плата, зголемување на просечната плата и секако поддршка нова на индустријата, особено на компании кои што се извозно ориентирани и определување на доволна сума на финансиски средства за капитални инвестиции во државата. Ние имаме предвидено 3,5 милијарди од кои што 2,7 милијарди се за инфраструктурни проекти во државата во наредниот четиригодишен период.Тука би го додал и земјоделството, предвидуваме поддршка во земјоделството во четиригодишниот период од 1,3 милијарди евра, што секако ќе значи зголемено производство на храна, зголемен извоз на храна и зголемен извоз на земјоделски производи“, исткана претседателот на СДСМ, Димитар Ковачевски.
Економија
АСО: Владата преку измени на тарифникот да ги намали цените на полисите за задолжително осигурување од автомобилска одговорност
Агенцијата за супервизија на осигурување (АСО) ја охрабрува Владата, согласно своите законски надлежности, да ги заштити правата на осигурениците и преку измени во Тарифникот да ги намали цените на полисите за задолжително осигурување од автомобилска одговорност.
АСО како регулатор на пазарот на осигурување уште еднаш јавно информира дека е целосно неоправдан и без основа потегот со кој осигурителните компании ги зголемија цените на осигурувањето од задолжителна автомобилска одговорност.
Клучните аргументи против зголемување на цената се наведени во анализата што е доставена до надлежната комисија при Министерството за финансии.
Зголемувањето на цената на осигурувањето не е во функција на јакнење на заштитата на осигурениците. Напротив, како што се додава, ова зголемување на цените е само и исклучиво во функција на покривање на трошоците за оперативно работење на компаниите за осигурување.
Економија
Финансии побара до крајот на денов да се стави во мирување поскапувањето на осигурувањето на автомобилите при регистрација
Комисијата за осигурување од автомобилска одговорност на денешната седница го разгледа доставениот извештај од Националното биро за осигурување поврзано со зголемените цени по основ на премија за вршење на дејноста на осигурување.
На состанокот Комисијата му укажа на Националното биро за осигурување и на регулаторот Агенцијата за супервизија на осигурувањето во текот на денешниот ден да им предложи на друштвата за осигурување до крајот на денешниот ден да ги стават во мирување одлуките за зголемување на трошоците и да ги вратат на ниво од пред 25 април 2024 година и да ја известат Комисијата во текот на денешниот ден. Ваквото укажување е со цел обезбедување транспарентност и предвидливост на процесите, имајќи предвид дека компаниите ниту поединечно, ниту преку Националното биро за осигурување го немаат известено регулаторот, односно Агенцијата за супервизија на осигурувањето ниту Комисијата дека планираат да ги зголемат трошоците по основ на премијата за вршење на дејноста на осигурување, и на тој начин не е обезбеден инклузивен пристап и кооперативност со сите засегнатите страни при донесување на одлуките.
Комисијата за осигурување од автомобилска одговорност на денешната седница побара од регулаторот, односно Агенцијата за супервизија на осигурувањето, да изготви анализа за оправданоста и исправноста на донесените одлуки од страна на друштвата за осигурување, во насока на заштита на крајните корисници, а со цел обезбедување сеопфатна информација за донесување објективна и транспарентна одлука. Во правец на ова е укажувањето кон регулаторот за ставање во мирување на одлуката за зголемување на цената на трошоците од страна на друштвата за осигурување. Истовремено, побара од друштвата за осигурување преку Националното биро да дадат свој придонес во изготвување на анализата и предлог-заклучоци за промена на Тарифата на премии за осигурување на сопствениците на моторни возила од одговорност за штети предизвикани на трети лица.
На состанокот, Комисијата одлучи во најскоро време по доставување на анализата од регулаторот, односно Агенцијата за супервизија на осигурувањето, да свика седница и да ја разгледа доставената Информација и да донесе соодветни заклучоци.