Според Георгиевски, двете клучни прашања за расветлување на атентатот се осамостојувањето на Македонија односно кому му пречел Глигоров и кој најмногу добил од криминалниот бизнис за време на грчкото ембарго, односно би изгубил од неговото укинување

„Сто процентно сум сигурен дека извршителите на атентатот врз поранешниот претседател на Македонија, Киро Глигоров, се внатре во земјата и претпоставувам дека се уште живи. Но загрижувачки е што слободата за таков атентат може да си ја дозволи само некој кој навистина се чувствува комотен и слободен во земјава“, рече поранешниот премиер и претседател на ВМРО-ДПМНЕ Љубчо Георгиевски на денешната дебата ,“15 години од атентатот врз претседателот Глигоров – мистерија или настан ад акта”, во органзиација на Ветераните на АРМ. Според Георгиевски, двете клучни прашања за расветлување на атентатот се осамостојувањето на Македонија односно кому му пречел Глигоров, кој во тој период кога државата конечно ја потврди својата самостојност, ја имал целата власт, а Владата била минорна. Второто прашање е и кој најмногу добил од криминалниот бизнис за време на грчкото ембарго, односно би изгубил од неговото укинување.„До денес не сакам да прифатам дека некој политичар од Македонија стои зад атентатот заради некакви бенефиции. Сметам дека се работи за структури кои командата ја примиле од страна, но загрижувачки е што тие структури се уште постојат и тоа е проблем на македонската политика. Дали ќе дозволиме со нерасчистувањето на овој случај  тие недефинирани структури да ги контролираат и насочуваат процесите во државата., рече Георгиевски. Пратеникот Стојан Андов рече дека за атентатот на Глигоров македонската држава и општество покажале тотална неефикасност.„Не можеа да го заштитат, иако неколкупати алармирал дека добива отворени закани, а по атентатот немало сериозна истрага“, рече Андов кој во време на атентатот беше претседател на Собранието.Тој смета дека за целосно расветлување на случајот треба да се разгледа тогашното однесување на институциите во државата, како Владата, Парламентот, министерствата за внатрешни работи, за правда и за одбрана, како и Обвинителството и судовите, но и политичките партии.„Мора да имаме прецизна оцена како овие надлежни органи си ја вршеа својата работата и како се држеле партиите. Мора да бидат отворени и разгледани и партиските архиви, но и однесувањето на интелектуалците“, рече Андов.Според заменик министерот за надворешни работи Зоран Петров, кој на дебатата се обрати во својство на новинар, упати на неговата книга „Атентати“ издадена една година по атентатот со која дава преглед на цела достапна фактографија за настанот.Тој рече дека кога ја читал книгата од денешен аспект, мисли дека знае кој стои зад атентатот, но посочи дека нема докази и не смее да каже.Според него атентатот врз Глигоров бил апсолутно успешен, ја завршил својата работа, бидејќи неговите политички капацитети и неговото влијание биле апсолутно намалени.Според Илија Николовски, генерал во пензија од Здружението на ветерани, постои дефицит на информации и треба да се охрабрат надлежните органи да преземат мерки и активности за да се расчисти овој како што го рече, најмистериозен и контроверзен настан во поновата македонска историја, бидејќи за тоа постои научна и општествена оправданост.Aктуализирање на проблемот со атентатот врз поранешниот претседател Киро Глигоров и подигање на свеста кај граѓаните и особено државните безбедносни органи за негово расветлување, е целта на научно-стручната дебата што ја организираше Форумот за безбедност и Здружението на ветерани од одбраната и безбедноста, на која присуствуваа поранешни и сегашни политичари, универзитетски професори, научници, аналитичари, експерти од областа на безбедноста, претставници на невладини организации и новинари.Неуспешниот атентат врз првиот претседател на Република Македонија Киро Глигоров беше извршен со автомобил бомба на 3 октомври 1995 година во 9:50 часот на улицата пред хотелот „Бристол“ во Скопје кога  тој со службено возило се движеше од неговата резиденција на работното место во Собранието на Република Македонија.Глигоров го преживеа атентатот со тешки повреди во пределот на главата. На местото на атентатот загина неговиот возач Александар Спировски, а беше повреден телохранителот на Глигоров, Илчо Теовски. Како последица од повредите почина и случајниот минувач Христо Христоманов, а беа повредени и Климе Коробар и Јован Атанасовски.Се уште е непознато кој стоел зад атентатот. Истражната постапка која се води против непознат сторител се уште е отворена.