Свет
Тешко загадување ги затвори училиштата во Техеран
Тешкото загадување на воздухот во иранската престолнина Техеран ги присили властите да ги затворат државните институции и, училиштата, вторпат овој месец и да прогласат неработни денови поради големите штети по здравјето на луѓето кое ги предизвикува загадувањето, јавува Асошиејтед прес. Владината комисија денеска одлучила дека степенот на загаденост го оправдува затворањето на сите институции и на целата индустрија во главниот град. Воздухот во Техеран е меѓу најзагадените на светот и здравствените експерти тврдат дека голем број Техеранци и имаат сериозни здравствени проблеми како резултат на загадувањето. Техеран, исто така, има слична географска позиција како и Лос Анџелес и Мексико Сити, кои исто така се соочуваат со силно загадување на воздухот. Планините кои го затвораат Техеран од три страни и топлиот воздух кој доаѓа од четвртата помагаат загадувањето да остане заробено, а ветриштата се премногу слаби за да го расчистат. Големиот број на сончеви денови и варијации на температурите исто така придонесуваат полутантите да се трансформираат во озон и во други отровни гасови. Меѓу мерките кои ги презема за да го намали загадувањето, Иран ги префрла системите за греење во населените и во трговските области да работат на природен гас. Властите го прошируваат и јавниот транспорт воведуваат построги контроли на емисиите на гасови кои ги испуштаат возилата. /крај/ап/сс/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Се урна конструкција на рингишпил, повредени 13 деца од кои едно е во животна опасност во Куршумлија
Во Куршумлија денеска се случила несреќа кога на локалниот саем се урнала конструкцијата на рингишпилот, пренесуваат српските медиуми.
Според написите, повредени се 13 деца, од кои едно потешко.
Станува збор за девојче чиј живот е во опасност и има сериозни повреди на главата и кичмата.
Таа била итно префрлена во КЦ Ниш на Одделот за неврохирургија.
Седум деца се во друга болница каде е во тек понатамошна дијагностика, додека другите деца се полесно повредени, пишуваат тамошните медиуми.
Свет
Кремљ: Мешањето на силите на НАТО во украинскиот конфликт – огромна опасност
Режимот во Киев е прилично непредвидлив, интервенцијата на воените сили на НАТО во украинскиот конфликт на теренот претставува огромна опасност, изјави за новинарите портпаролот на Кремљ, Дмитриј Песков.
Според него, Москва ја смета за крајно провокативна петицијата објавена на веб-страницата на украинскиот лидер Володимир Зеленски, во која се апелира да се поканат странски војници во Украина.
„Сметаме дека ова во најмала рака е крајно провокативно и го следиме многу внимателно“, рече Песков.
Францускиот претседател Емануел Макрон неодамна во интервју за „Економист“ изјави дека не ја исклучува можноста за испраќање војници во Украина на барање на Киев доколку Русија ја пробие линијата на фронтот. Според него, многу земји од ЕУ се согласиле со мислењето на Париз за ова прашање.
Медиумите претходно објавија и дека Франција испратила војници од својата Легија на странци во Украина, пренесува „Танјуг“.
Регион
Шји Џјинпинг: Србија е првата земја од Европа со која ќе изградиме заедница со заедничка иднина
Претседателот на Народна Република Кина, Шји Џјинпинг, изјави дека во денешните разговори со претседателот Вучиќ е постигнат значаен консензус и дека Србија ќе биде првата земја од Европа со која ќе изгради заедница со заедничка иднина.
„Заеднички објавивме дека ќе изградиме заедница меѓу Кина и Србија со заедничка иднина во новата ера, што ќе отвори ново поглавје во историјата на кинеско-српските односи. Пред осум години Србија стана првиот сеопфатен стратешки партнер на Кина во Централна и Источна Европа, а денеска станува првата европска земја во која ќе изградиме заедница со заедничка иднина“, рече Шји во говорот по размената на потпишаните меѓудржавни договори меѓу Србија и Кина во Палатата „Србија“.
Тој посочи дека како вистински пријатели и добри партнери Кина и Србија уживаат политичка доверба, која е силна како карпа.