Претставување на кириличниот домен (.мкд) се одржа во четвртокот во Институтот за македонски јазик „Крсте Мисирков“ во Скопје. Со ова, Македонија стана петта земја во светот со национален криличен домен.

„Со националниот домен (.мкд) ќе можат да се регистрираат веб страници на кирилично писмо коишто досега не можевме, односно ќе бидат опфатени карактеристични букви од нашата азбука како што се Љ, Њ, Ѓ, Ж, Ч, Ш, Џ. Такви примери се Ченто.мкд, Чаир.мкд, ЃорчеПетров.мкд, Љубаништа.мкд, Маџармаало.мкд, Коњаник.мкд, Живојно.мкд, Жабени.мкд и голем број други пример”, рече министерот за информатичко општество и администрација, Иво Ивановски.

Додаде дека ќе се креираат повеќе македонски содржини на кирилично писмо, фактор којшто го следат многу глобални институции за развојот на информатичкото општество.

„Ова претставува и голем чекор напред во битката на Македонија и на македонскиот народ да се избориме со наметнатите неправди од страна на дел од нашите соседи кои континуирано го игнорираат, омаловажуваат и непризнаваат постоењето на македонскиот јазик. Големо достигнување е за нас што успеавме да извојуваме уште една и правна и политичка битка на меѓународен план, но за тоа требаше многу трпение, многу лобирање, напорна работа од страна на сите субјекти вклучени во овој процес”, додаде Ивановски.

Инаку, по Русија, Србија, Казахстан и Монголија, Македонија ќе биде петтата земја во светот која ќе има кирилична верзија на национален домен.

Директорот на МАРнет, Сашо Димитријоски се осврна на техничкиот процес околу регистрацијата на македонскиот национален кириличен домен, додавајќи дека тој беше ставен во официјалното барање на Република Македонија, поднесено до Интернет корпорацијата за доделување на имиња и броеви (ICANN). Се очекува организацијата ИАНА, која е под надлежност на Националната ИТ Агенција на САД, што поскоро да го внесе .мкд доменот во системот.

Министерот Ивановски упати благодарност до граѓаните на Република Македонија, кои со гласање преку анкета го избраа доменот (.мкд)./крај/мф/сд