На Тоше Проески постхумно му беше доделен орден за заслуги за Македонија за високите дострели во неговата професионална музичка дејност.

Орденот го заслужи со исклучителниот придонес во промовирањето и збогатувањето на македонските културни вредности, како и за неговите активности на хуманитарен план преку реализирање на голем број хуманитарни концерти и добротворни настапи, а со тоа и афирмација на Македонија во светот.

Претседателот Ѓорге Иванов, орденот за заслуги му го врачи на Кристијан Ристески, внукот на Тоше Проески.

„Ќе бев среќен како и сите вие ако денес Тоше беше овде и лично го примеше овој орден. Тоше Проески беше како Диоген со фенерот кој со музика ја бараше хуманоста во луѓето. Тој е човекот кој нè поттикна со пишување нови страници од кои потомците по нас ќе умеат да ја дознаат вистинската димензија на зборовите, љубов надеж и верба. Со хуманитарните настапи и концерти нè задолжи да го продолжиме неговото дело. Со својот пример овој херој на современото време беше борец за вистинските вредности во животот. За неговиот искрен и длабок хуманизам и неговите уметнички квалитети и обединувачка енергија денес постхумно му доделуваме орден за заслуги за Македонија. Со овој чин Македонија свечено се обврзува да го продолжи сеќавањето за својот голем син да ја негува уметноста и хуманоста со која нè збогати,“ истакна меѓудругото претседателот Ѓорге Иванов.

На настанот покрај членовите на семејството Проески, негови соработници и пријатели, присуствуваа вицепремиерот Васко Наумовски, поранешниот претседател Киро Глигоров, министерката за култура Елизабета Канческа-Милевска, ректорот на Универзитетот Свети Кири и Методиј Велимир Стојковски, градоначалникот на општина Крушево Васко Дамчески.

Тоше Проески е роден 25 јануари 1981 година, неговиот прв официјален настапат е на Златно славејче на 12 годишна возраст.Во неговата кратка но богата балканска музичка кариера ги издаде албумите „Некаде во ноќта“,„Синот божји“, „ Ако ме погледнеш во очи“, „Ден за нас“, „По тебе“ „Божилак“, „Игри без граници“.Постхумно се објавени „The hardest thing“ и „Тоше и пријателите“. Настапува на фестивали, освојува награди и ги полни концертните сали. Неговата музика го обедини Балканот.

Покрај уметничките квалитети, импонираше со својата хуманост, етичност и духовност. Во 2004 година беше именуван за амбасадор на добрата волја на УНИЦЕФ. Освои бројни награди за најдобар пејач, најдобри албуми, најтиражни албуми и најдобри песни. Неговиот живот трагично заврши на 17 октомври 2007 година во сообраќајна несреќа кај Нова Градишка во Хрватска.крај/сж