Македонија
Издадени 155.444 лични карти и 208.509 пасоши во 2013
Вкупно 155.444 лични карти и 208.509 пасоши биле издадени во 2013 година, стои во извештајот од областа на управно надзорните работи на Министерството за внатрешни работи.
„Во 2013 година, издадени се вкупно 155.444 лични карти, од кои 109.377 се лични карти на македонски јазик, додека 46.067 се двојазични лични карти. Лани за првпат лична карта извадиле 35.978 лица, а 103.552 биле заменети по разни основи. Во матичните книги определени се вкупно 39.322 нови матични броеви, а донесени се вкупно 815 решенија со кои се поништува погрешно определен матичен број, додека донесени се 3.312 решенија за промена на личното име”, стои во извештајот.
Минатата година биле издадени 208.509 патни исправи што е 24 проценти помалку во однос на 2012 година, а на 1.090(948 во 2012г.) лица им се одземени пасошите.
Во Извештајот се наведува дела во дипломатско – конзуларните претставништва на Република Македонија во странство, обработени се вкупно 2.071 поднесено барање за патни исправи, од кои вкупно се издадени 2.071 патна исправа и тоа, во САД – Њујорк, Чикаго и Детроит се издадени 643 патни исправи , во Австралија – Канбера и Мелбурн – 277 патни исправи и во Германија- Бон, Берлин и Минхен-446 исправа.
Во делот на постапките за стекнување и отпуст на македонско државјанство е постапувано по 1.654 барања за стекнување на државјанство на Р.Македонија и 1.096 барања за отпуст од македонско државјанство. Притоа, донесени се 2.608 (2.352) решенија, од кои 2.368(2.130) се позитивни, а 240 (222) негативни. Од вкупниот број позитивни решенија, 1.157(1.073) се за прием во државјанство, 154(120) решенија за утврдување државјански статус, а 1.057 (937) за отпуст од државјанство на РМ. Наедно издадени се и 85.581 уверенија за државјанство.
Во текот на 2013 година поднесени се вкупно 4.799(4.141) барања за издавање на одобренија за набавување на оружје, од кои се издадени 2.266(2.304) одобренија, 1.065 барања се одбиени, а останатите 1.468 барање, сево постапка на одлучување. Регистрирани се вкупно 6.871 парчиња оружје, од кои 2.576 се ново регистрирани, а 4.295 се пререгистрирани парчиња оружје.
Во областа на сообраќајот, лани во Р.Македонија биле регистрирани вкупно 415.392 возила, при што, за првпат се регистрирани 44.349 нови и половно -увезени возила, регистрацијата е продолжена на 369.505 возила. Исто така, издадени се 21.345 нови возачки дозволи, на лица кои за прв пат полагале возачки испит, потоа важноста е продолжена на 71.636 дозволи, а издадени се и 6.656 дупликати.крај/мф/сд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Охрид најкритично во Далјан, се излеа и Кочанска река – извештај за состојбата по обилните дождови
Обилните врнежи на дожд предизвикаа зголемен водостој на реките и локални излевања во повеќе делови од државата, информира Центарот за управување со кризи (ЦУК), според состојбата до 18:00 часот.
Во Штипско–Кочанскиот регион е регистрирано локално излевање на Кочанска река кај селото Горни Подлог, каде што интервенира КЈП „Водовод“ Кочани со механизација. Оризарска река има излевање кај селото Грдовци, а на терен интервенира Водостопанство „Брегалница“, додека полицијата од Кочани го обезбедува подрачјето и го регулира сообраќајот. Зрновска река се излева пред вливот во Брегалница, а состојбата ја следи Регионалниот центар за управување со кризи. Злетовска река и Брегалница имаат зголемен водостој, но без излевање. На патниот правец Македонска Каменица – рудник Саса се интервенира поради одрон.
Во Охрид, најкритична е состојбата во населбата Далјан по излевање на реката Далја. ЈП „Водовод“, „Нискоградба“ и „Комуналец“ интервенираат со механизација, додека Територијалната противпожарна единица и Дирекцијата за заштита и спасување со пумпи вршат испумпување на водата од поплавените објекти. Регионалниот центар за управување со кризи Охрид ги координира пријавите преку бројот 112. Кај Коселска река, во правец на селата Ливоишта и Вапила, се преземаат мерки за заштита на патниот правец.
Во Кичево, поради претходните врнежи, дел од површините се заезерени, а состојбата со поплавените објекти на улицата „Прилепска“ е непроменета. ТППЕ, ДЗС и ЈП „Комуналец“ вршат испумпување и обезбедување на теренот, додека Општина Кичево и Црвениот крст се грижат за евакуираните лица.
Во Битолскиот регион, во Општина Битола се вршат теренски контроли од страна на РЦУК и општинските служби. ЈКП „Комуналец“ интервенира во населбата Стрчин, „Македонија пат“ расчистува на регионалниот пат Р-2333, а Водостопанство ја следи состојбата на реките Шемница и Црна. Во Ресен и Демир Хисар се врши испумпување и заштита на загрозените површини.
Во Куманово, Липково и Крива Паланка состојбата се следи од РЦУК, општините и Водостопанство, а „Македонија пат“ и комуналните претпријатија вршат превентивно расчистување и посолување на ризични патни делници.
Во Тетово се интервенира со механизација на патиштата кон селото Ѓермо и месноста Бањиче. Во Мала Речица полицијата и инспекциските служби постапуваат по уривање на потпорен ѕид, а во Желино се интервенира по излевање кај реките Стримница и Палатица. На Попова Шапка, по координација со РЦУК Тетово, патот се расчистува со механизација. Во Гостивар, ЈП „Комуналец“ и Водостопанство преземаат мерки по пријавени излевања.
Македонија
ЗНАМ: Одбивањето лидерска средба е признание за политичка слабост
Движење ЗНАМ за Наша Македонија ја поздрави иницијативата на претседателот на Владата за одржување лидерска средба, оценувајќи ја како одговорен и државнички чекор насочен кон стабилност, дијалог и политичка зрелост во, како што наведуваат, клучен момент за државата.
Од ЗНАМ реагираат дека денешната прес-конференција на претседателот на СДСМ, Филипче, покажала отсуство на капацитет и волја за конструктивен политички дијалог, при што, според нив, наместо аргументи се нудат поделби, навреди и неосновани обвинувања.
„Кога се нема аргументи и резултати, се посегнува по стари сценарија – плашење на јавноста, теории на заговор и етикетирање на политичките противници“, се наведува во реакцијата, додавајќи дека, наместо соочување со сопственото минато, СДСМ повторно бега од разговор и се крие зад техничката влада.
Од Движење ЗНАМ за Наша Македонија нагласуваат дека се залагаат за целосно и непречено функционирање на институциите, одговорно носење одлуки и изнаоѓање конкретни решенија во интерес на граѓаните и државата. Според нив, на Македонија ѝ е потребна политичка храброст и зрелост, а не блокади, уцени и калкулации.
Во соопштението се посочува дека иницијативата за лидерска средба претставува можност релевантните политички чинители да покажат одговорност кон државата и граѓаните, при што одбивањето на дијалог, како што наведуваат, е признание за слабост.
ЗНАМ порачува дека останува определено за транспарентност, почитување на демократските процеси и враќање на довербата во институциите, како предуслови за стабилна држава и јасен, одговорен пат на Македонија кон полноправно членство во Европската Унија.
Македонија
Променливо облачно утре, дожд и снег најавени за северозападните делови
Времето утре ќе биде променливо облачно со сончеви периоди. Кон крајот на денот и во текот на ноќта, во северозападните делови од земјата ќе има повремени врнежи од дожд, додека на планините се очекува снег. Ќе дува слаб до умерен ветер од јужен правец. Минималните температури ќе се движат од -9 до -2 степени, а максималните од 3 до 9 степени.
Во Скопје се очекува променливо облачно време со сончеви периоди и слаб променлив ветер. Утринската температура ќе се спушти до -6 степени, а дневната ќе достигне околу 4 степени.
Во наредните денови следува нестабилен период. Во сабота ќе има локални врнежи, на планините и повисоките места од снег, а во пониските предели од дожд и снег. Врнежите ќе бидат пообилни во западните делови, каде што се очекува и дополнително зголемување на снежната покривка.
Во недела и понеделник ќе дува умерен до засилен северен ветер со брзина над 60 километри на час, а ќе има и повремени локални врнежи од снег. Температурите ќе бидат во опаѓање, при што на одредени места дневните температури ќе останат под нула степени.
Од вторник се најавува период на стабилно и суво време.

