Бирото за стоковни резерви вчера во целост ги демантира тврдењата за злоупотребите со тутунот што во саботниот број на „Време“ ги изнесе поранешниот директор на Бирото Ванчо Пеловски

Бирото за стоковни резерви вчера во целост ги демантира тврдењата за злоупотребите со тутунот што во саботниот број на „Време“ ги изнесе поранешниот директор на Бирото Ванчо Пеловски, а со демант се огласи и повиканиот Страшо Нелковски, член на Комисијата за утврдување на квалитетот на тутунот во Бирото.

Со тоа се разгоре војната за тутунот од државните резерви што пред десетина дена ја почнаа ВМРО-НП и луѓето блиски до поранешната власт против актуелните функционери.

„Договорот за извоз на ферментиран тутун е потпишан од Ванчо Пеловски од една страна и Стевче Коцевски од страната на ‘Македонија табак’ Експорт импорт – Скопје, на 18 ноември 1999 година, со број 07-995/1 и 03-3735. Протоколот број 01-722/1 и 03-1595 од 11 декември 2000 година, за намирување на обврските е потпишан од истите луѓе. Дописот за фактури за извезениот тутун во БиХ, Хрватска и во Египет од ‘Македонија табак’ ДООЕЛ Скопје е потпишан од Васе Аврамоски“.

Тоа се дел од документите што Бирото вчера ги понуди како контрааргумент на тврдењата на Пеловски.

„Господа учители и ученици-душегрижници за народните пари на Република Македонија, ако сакате уште вакви бисери, еве неколку: Експорт-импорт банка 209 милиони пропаднати, пет милиони уплатени на Кипарска фирма со македонско потекло, ги нема ниту парите, ниту пченицата. Триста и триесет милиони отстапено побарување од ‘Жито Битола’ на фирма на Смиленски, ги нема ниту парите, ниту пченицата…”, се вели во соопштението од Бирото.

Поранешниот генерален директор на „Македонија табак-тутун“ ДООЕЛ Скопје Страшо Нелковски, кој сега е член на комисијата за процена во Бирото за стоковни резерви, тврди дека не го потпишал договорот, ниту имал каква и да е врска со „исчезнувањето“ на седумте милиони евра од тутунот од државните резерви во 1999 година.

За тоа, Пеловски ги обвини Нелковски и „структурите околу него“ откако од Бирото за одговорни ги посочија функционерите од владата на поранешниот премиер Љубчо Георгиевски.

– Јас на 15 јули 1999 година дадов оставка на директорската функција во „Македонија табак“. Не бев на функцијата ниту физички, ниту формално во тоа време, така што никаков договор со Бирото не сум можел ни да потпишам – изјави Нелковски.

Тој, во прилог на своите тврдења, презентира документи чија исправност и веродостојност не успеавме да ги провериме.

Д. М.