Саша Андоновски, еден од обвинетите во аферата со незаконската децентрализација на земјиштето спроти Соборниот храм во Скопје, вчера беше уапсен на скопскиот аеродром.

Обвинетиот за „БаЧило“ се врати од странство

Саша Андоновски, еден од обвинетите во аферата со незаконската децентрализација на земјиштето спроти Соборниот храм во Скопје, вчера беше уапсен на скопскиот аеродром.

Тој со семејството четириесетина дена беше надвор од земјава. Слезе од авион што долета од Виена, но нема информации во која земја престојувал кога му беше одредена мерка притвор и беше распишана потерница.

Андоновски е еден од 24 обвинети дека со малверзации ја оштетиле државата за околу 44,5 милиони денари и еден од 11-те на кои истражен судија им одреди притвор. Тој беше заменик-министер за економија, а обвинет е дека во својство на претседател на второстепената владина комисија за денационализација, спротивно на законот, одобрил денационализација на земјиште.

Против него и другите обвинети, МВР на 28 ноември лани поднесе кривична пријава за перење пари, измама, злоупотреба на службената положба и за противзаконско посредување. Истражен судија на 4 декември лани нему и на уште десетмина им одреди притвор. Бидејќи беше недостапен, по Андоновски прво беше распишана интерна, а подоцна и меѓународна потерница.

Веднаш по апсењето, Андоновски вчера беше однесен пред истражен судија.

Веќе втор месец во притвор за овој случај се овчарот Иснифарис Џемаили, нотарите Никола Стоименовиќ и Гордана Ракочевиќ, адвокатката Ленче Димчевска, поранешната директорка на скопскиот катастар Емилија Алексова, пензионерот Ордан Миланоски, Спасе Димитров, Гроздана Манасиевска, Саша Славковиќ и Миле Наумчески. Според истрагата, поголемиот дел од парите што како отштета за добиток уништен во конфликтот во 2001 година по судски пат го доби Џемаили бил употребен за купување и препродавање државно земјиште. Обвинетите со хипотекарни договори и фиктивни заеми му ја намалувале вредноста на земјиштето, а потоа си го препродавале.