Распуштениот оџа Рамадан Рамадани од петок започнува со собирање потписи за смена на поглаварот на Исламската верска заедница(ИВЗ) Сулејман Реџепи.

Распуштениот оџа Рамадан Рамадани од петок започнува со собирање потписи за смена на поглаварот на Исламската верска заедница(ИВЗ) Сулејман Реџепи.

Тој најави дека доколку не успее оваа легална процедура, ќе организира протести пред ИВЗ.

“Јас како член на ИВЗ изјавувам дека не се согласувам и не сум задоволен од претставувањето на Сулејман Реџепи и барам од оџите и верските авторитети на ИВЗ  веднаш да преземат мерки за разрешување на Сулејман Реџепи“ стои во декларацијата, која од петок ќе им биде достапна на места низ централното градско подрачје на верниците од Скопје. За смена на поглаварот Рамадани имал поддршка од верниците од 20 џамии.

„Значи ова е директно враќање на легитимитетот од базата, сè со цел да престане ова нелегитимно претставување кое се состои од неговиот нелегитимен избор во 2006 година, што беше под крајно сомнителни и многу милитантни околности и второ, промената на уставот на ИВЗ што се случи во 2008 година без претходно да биде во согласност со процедурата на стариот устав“ изјави Рамадани.

Тој негира формирање на паралелна исламска верска институција.

„Ние муслиманите немаме друга ИВЗ за да може да му ја препуштиме на некој човек да нè застапува нелегитимно и затоа е и оваа борба околу нашето претставување. Ние немаме друго освен да се вратиме кај базата и кај верниците и од таму да го црпиме легитимитетот“ вели тој.

Не сака споредувања со Јован Вранишковски и за него ова е внатре-муслиманска работа.

„Но ако има некој тука кој е под српско влијание се знае тие кои учеле во школи во Кумровец и на факултети во Белград. Тоа не важи за мене“ вели Рамадани.

Исламската верска заедница утрово пак, го обвини Рамадани за ширење на вахабизам, радикализам и за неговата нелегална функција.

„Тешко на тој народ кој би останал во рацете на еден насилник, расколник, како што е профилот на Рамадан Рамадани, како бивш колега кој што никогаш не заслужил да го повикуваме како колега“ рече  Рифат Вуисљанин од Здружението на улемаи при муфтивството на Исламската верска заедница.

Според нив, изборот Рамадани за оџа бил нелегитимен.

„Рамадани во 2003. година со употреба на насилство и оружје, заедно со радикална вехабистичка група, влегол во институцијата на ИВЗ и присилно го натера тогашниот муфтија да го предложи за оџа и со ’калашњикови’ зеде декрет без никакво право и легална процедура од тогашниот поглавар на ИВЗ“, изјави  Вуисљанин.

Рамадан Рамадани беше обвинет од ИВЗ дека шири вахабизам и му беше забрането да одржува молитви.

Жестоките превирања на релација ИВЗ и приврзаниците на Рамадан Рамадани пред неколку недели прераснаа во инцидент од кој најдебелиот крај го извлекоа верниците. Наместо петочна молитва, скопскиот муфтија беше избркан со клоци и тупаници./крај/фф